Lewo Ŋmba O Tafun Wre Wɔ
2
Yira ŋgi ki tia waŋgra leele mblɛpe n Nyiɛkpɔɔ chin
pre na gble leni,
na kewɛɛ jawa ma hin?
2 Pe ŋulo yiri mu yire,
a pe jaŋgafɛɛnlɛ sɛ tni
mu jina to,
mu yiri mu o Tafun Nyiɛkpɔɔ,
na ŋunu ŋmba u wɔ wre taan,
na yuu na,
3 E ti mbe o tɔɔnrɔ mɛnyi,
nyjɛ pe le o na yire knumu
mbe wa,
mbe oyɛ shɔ pe kɛɛ.
4 Ŋmba uu wa mu tni nyjeeri wre,
laa mu to na pe tɛɛ,
pe kee nyjɛ pe jawa yire na.
5 A u krɔ tɛɛ mu paara pe pan,
mu pe le fiɛrɛ kpɔɔ mbo,
6 Ni ni ŋunu tɛɛ,
ni nyua cheche Zion na.
7 Ŋunu wre yo mbo,
“Kee ŋga ni Tafun Nyiɛkpɔɔ yo
kro, mbe yi kpali.
U yo ni pan mbo,
‘Ni biblɔ wi ŋu, a mu lɛ wi mi.
8 Ni wie mbe ni waŋgra leele,
mblɛ pe n ni chin pre wru
mbe mu ŋga na krɔyira yi.
A mbe ti mu tra ta poŋgo.
9 Tɔɔnrɔ kanyie ni mu tɛɛ
mbe pe pile,
mbe pe kla na chɔ juaraa yi.’”
10 Kena yire ŋulo,
e jawala ta,
waŋgra jaŋgafɛɛnlɛ,
e ndie tɛɛ jaaraa na.
11 E o Tafun Nyiɛkpɔɔ wre sumi,
na fiɛrɛ, na seeree ni.
12 E na lɛɛlɛ u yiɛ, na kre ma,
u krɔ wi kun na e ni nyaanyaa,
mbe u e kla mbe ki e fo.
Mblɛ pe feni mbe sɛ to u na
pre kro we pe dwan.