O Tafun Nyiɛkpɔɔ Wre Paaraa
41
Epo yurɔ kpɔɔ ŋmba pe yeeri,Leviathan wre,
ndro ŋmbi we jaa u yii,
na drawa ni hin?
Ndee mbe u ndile pɔ,
na maŋa ni hin.
2 Mu jaa maŋa le u mana,
ndee mbe u yii na drawa ni,
gbekaan na ra?
3 Na ki pan ma,
we mu tali, na mu u fooro le,
ndee we paara,
na mu ni brɛmm ra?
4 Ndee we nyu nunu pe na mu ni,
mbe mu u yii,
mbe u pe mu tnu,
nyjila kro nu ra?
5 Mu jaa u pe na katoo yurɔ wi,
mbe u le yira nu,
mbe mu bichiɛlɛ,
na pna na u ni ra?
6 Jafalifɛɛnlɛ we u chinɛ,
na yirɛ ni,
ndee pie u yɔɔlɛ,
mbe peyɛ ŋga ra?
7 Ŋmbi we jaa u wa gaŋga ni,
u hlɛ na hin?
Ndee lɔɔchlofɛɛnlɛ we jaa,
u waari chombo ni ndra na ra?
8 Na mu kɛ taa u na,
imi na we mu pe kre,
ma ki fɛɛ,
a maa kɛ taa u na na fio.
9 Kre ndro n wa,
mbe jaa u pe yaka,
na mu u nya to,
tutom kie wo mu na.
10 Ndro wa sro mbe da u na,
mbe u yire mbe yire,
kena ŋmbi we ja,
mbe u pe yaka hin?
11 Ndro ŋmbi uu wa yaka ni,
mbe shɔ ni pan,
a ki fna mbe ni ki tɔ,
mbe u ŋga hin?
Yira ŋga kii wa tra ŋga nu kro,
ni wo yi.
12 Mba paara,
mbe mba yurɔ wre jeelee,
na u faŋga, na u kpɔɔrɔm,
ŋga ki yiɛ nyi kre kee yo.
13 Ŋmbi we ja mbe u hlɛ laa u na,
ndee mbe krafi le,
u nyu na hin?
14 A ŋmbi we ja mbe u nyu nyaa,
ndee mbe pna na u ŋgaala,
fiɛrɛ wee yire ni hin?
15 U pnuŋgo kaara,
kre kaanri kaanri,
mu sheli mu mbra u na,
na yira ni pe ki yii,
mu mbra u na.
16 Imi na yi mbra kre,
fuflɛ kuraa wa jaa tro yi lalaa.
17 Imi na yi mbra yiyɛ na,
mu da kre,
yia jaa laa yiyɛ na.
18 Na u kɔɔnri mbe kanhun,
na yilii u mana,
mbe u nyiɛlɛ na chiɛnri,
na bnimi nyu yila yi.
19 Na u nyu nyaa,
mbe kanhun na nyini plapla,
mbra yilii u nyuu,
20 mbe wree na yilii u maweele,
na nyumu ki kani,
chɔ nu, kanhun na.
21 Na u ŋu, mbe kanhun to,
kaanlɛɛ na mbra shio,
mbe ka na nyini,
mbra yilii u nyuu.
22 Faŋga wa u yulɔ nu titi,
ki tia ŋmba we u nya kro,
fiɛrɛ we u yii.
23 U wejikaara kro juori,
mu mbra u na gbiŋmbi.
Hali kia jaa jɔŋgɔ u na.
24 U gbun haa sheli,
na dnɛ kpɔɔ yi,
pan ki sheli na dnɛ,
ŋga na pe yirɛ tre dnɛ taa yi.
25 Na u taan mu yiri,
mbe faŋgafɛɛnlɛ,
na fiɛ na u paan,
mbe pra ndru kro ni.
26 Na pe u su na brɔfiɛŋunu ni,
kia jaa u pe yaka,
a chombo, ndee wiyira ka n wa,
mbe jaa u pe yaka.
27 Pan u tɔɔnrɔ pini,
na yua kpakpɛɛ yi.
Na swafre pini na,
tiŋge ŋga ki fɔɔn yi.
28 Snimi wa jaa ti mbe u fɛ,
a na mu u wa vuŋmbɔ ni,
pan ki nyi na yira foo ni,
mu u wa.
29 A na mu u gbun na van ni,
pan ki nyi na,
yua kpakpaa ni mu u gbun,
a na mu u wa chombo ni,
tɛɛ we na mu tɛɛ.
30 U lɛɛ hlɛ pe na chɔ juaraa yi,
na u nyaari mu tro frɛrɛ nu,
mbe u tlo sni wa.
31 Na u tro epo lam,
mbe nyumu kre na mɔŋɔi,
mbra kani na simi pe taa,
kanhun na.
32 Na u tro epo nu,
mbe u tlo kre fniŋge,
mbe taa u na na tafɔkɔ yi.
33 Ma jaa yaka wru,
mbe gbun u na tra ŋga nu,
yurɔ ŋmba wra yaka fiɛ wi.
34 Yira ŋga ki kpɔɔ kiyɛ pan kro,
u ki le fiɛn,
a u ŋunumu lii yurɔ,
ŋmba u uyɛ kpɔɔri kro na.”