Job Na O Tafun Nyiɛkpɔɔ Wre Nyu Wɔ
42
A Job na kna mna O Tafun Nyiɛkpɔɔ wre nyu wɔ mbo,2 “Ni chin na mu jaa kee kro pe,
a ndro wa jaa mu tɔ kolo,
kee ŋga mu chaa mbe pe na.
3 Mu ni wie na,
‘A jawala lafun ŋmbi,
u ni nyu kaanri ŋga hin?’
Yɛŋgɛ yi, yirɛ nyjɛ nɔɔ ni n chin,
kee ni yuu,
yi kee kawako ni,
ni pan kuraa mu tro.
4 Mu yo ni pan na,
‘Ndie tɛɛ, mbe ni paara,
mbe mu wie kee,
mbe mu ni nyu wɔ.’
5 Ni ndie mu kee ndru,
la, fuŋga ni mu nya nyini ni.
6 Ki tia ni niyɛ le fiɛn,
mu bloŋgo na tɔɔnrɔ fa,
a ki nyina na,
ni ni jawala chinɛ.”
7 Ŋga o Tafun Nyiɛkpɔɔ na yire kee nyjɛ yo Job pan mu kɔ kre, a Nyiɛkpɔɔ na kna mu yo Teman ndro Eliphaz wre pan mbo, “Ni krɔ kun na ŋu na mu nɔɔlɔ shiin pre ni, ŋgi na hin? Ni kee nyjɛ e paara kre n fraka na ni sumifun Job kee nyjɛ u yo yire yi. 8 Kena e nablɛm kɔɔnashin, na mbapilɛ kɔɔnashin cha, e sɛ na pe ni ni sumifun Job pan, e pe tɛɛ e yurɛ sroo sra wɔ e eyɛ ŋga, mbe ki tna ni pan. Na e kɔ, ni sumifun Job we nyiɛtali mbe e ŋga, a mbe u nyiɛtalaa shɔ, a mba e jijiere ŋga e prɛ kre le mbe e pe sisaa. Ni kee nyjɛ e yo yire krɛrɛ ka n wa mu fraka mu da na nyjɛ ni sumifun Job yo yire ni.” 9 Kra tia Eliphaz, Bildad, Zophar pre na kee ŋga O Tafun Nyiɛkpɔɔ wre na yo pe pan kre pe, a o Tafun Nyiɛkpɔɔ na Job nyiɛtalaa kre loo.
10 Ŋga Job na nyiɛtali mna u nɔɔlɔ pre ŋga mu kɔ kre, a o Tafun Nyiɛkpɔɔ na ndru mna Job dwan, a wra uyɛ ta na. Wra u ŋga u yirɛ nyjɛ yira yili u kɛɛ yire ma gbee shiin. 11 Ŋga kra pan ma kre, Job lɛ biile bilɛ, na u jaala, na leele mblɛ pra u chin fa kre kro, na pan mu fni u katoo mna sukpɔɔ li wa. Pra paara mna u bre, mna u gbun nyiŋge kanyana kee nyjɛ o Tafun Nyiɛkpɔɔ na tia yira u da kre na. A pe kro na u ŋga swafinyi chɛchiɛri, yire na swanyiɛ feelee ni.
12 O Tafun Nyiɛkpɔɔ wre na Job dwan kre nyjila kre nu, mu wɛ u jle kre na. Wra ta mbaala kagbenyi kɛmbɔjijirɛ, na nyuuma kagbenyi kɔɔnanu, na nablɛm mblɛ pe san mu pe mbra shiin shiin na fali na pe ni kagbeŋge, na bubunlɔ kagbeŋge. 13 Wra ndru mna bibilɛ kɔɔnashin na bichiɛlɛ taarɛ se. 14 Wra u bichlɔ jlo wre mɛɛ tɛɛ Jemimah, mna shiinwo wre ŋga Keziah, mna taarɛwo wre ŋga Keren-Happuch. 15 Job bichiɛlɛ pre nyumu ŋmbrɔ n sra n wa tra kre nu kre nyjila kre. A pe lɛ Job na pre, na pe lɛmblɛ kro ŋga krɔyirɛ imi na ki fna.