O Tafun Nyiɛkpɔɔ Wre Paaraa
39
Mu chin nyjila ŋga nu,sajemble sii ra?
Ndee mu chin nyjila ŋga nu,
kafaala sii hin?
2 Mu chin nyiɛpɔ nyjɛ pe lii,
mbe chiin se ra?
A mu chin nyjila ŋga nu,
pe sii ra?
3 Mu chin nyjila ŋga nu,
pe selɛɛ pe yaa,
mbe pe suulo mbe see?
4 Kia mu na pe biile pre lɛ,
mbe faŋga ta,
mbe peyɛ kun mbe laa,
pe loolo na, mbra tro nyaa.
5 Ŋmbi u nyaalam bubunlɔ,
mɛnyi saanla pe na,
a pe peyɛ ta na tro hin?
6 Mi ni pe ŋga tablɔ tra,
ŋga nu weŋge nyi kre,
a ki pe pe tnihaa.
7 A pe laa gblee nyjɛ yii wa,
chia na kre na,
a ndro wa jaa sɛ pe yii,
mbe paan yaka pe, na pe ni.
8 Nyambie ndrɛ na pe kila,
na kaa,
na wrɛ nyinyi chaa na tro.
9 Mu jaa nyaalam nuu tɛɛ,
mbe fali ra?
Ndee mu ja mbe ti,
mbe u le mu nagbɛɛ,
mbe sni blee ra?
10 Mu jaa maŋa le u na,
mbe wra bru,
mbe taa mu na ra?
11 Ma jaa na kaan,
u faŋga ŋga kii wa u nu na,
mbe mu tnumu kro wa u na ra?
12 Mu jaa kaan u na,
mbe u mu shɔlɔ tio,
mbe mu sɛ ble,
mu shunshun naa?
13 Krɔnisoolo u kuɛn nyaala,
na yɛshɔɔrɔ ni,
la, ma jaa u wru,
mbe gbun lɔɔchlo na.
Ŋgi na hin?
Wa jaa yiri mbe wɛ u na.
14 Krɔnisoolo u chrɛwɛ sii,
mbe yi le tra,
mbe tra wɛɛri mbe le yi nu.
15 Hali wa jawala ta,
na pie jaa yi taan mbe juari,
ndee na yurɔ we jaa,
yi taanla mbe juari.
16 Na u chrɛwɛ yire se,
a yi jiri mu kɔ,
u u biile pre pini,
na wre titi biile ma,
a u fɛɛ kuraa,
na wra chrɛwɛ se.
17 Ŋgi na hin? Mi Nyiɛkpɔɔ,
nsra u ŋga kachindɛ.
18 Nde na u kuɛn nyaa na feni,
soo na u nduufun kee,
titɛɛrɛ ni u pan,
ŋgi na hin? Wa jaa u yii.
19 Job, ŋu mu soo ŋga u faŋga ra?
ndee ŋu mu u san,
na u yulɔ yooro yire ni ra?
20 Ŋu mu tia wra feni,
na yeni na kpatɔ wi ra?
ndee na leele piɛri,
na u jiɛn kre ni ra?
21 Na pe soo nduu,
mbe sɛ ŋunɔ,
mbe u taan mbe waari,
ŋgi na hin?
U kaan u faŋga na.
22 We na tɛɛ, na u n na yaka fiɛ,
a u n na brɔfiɛn yiɛshiin fiɛ.
23 U nduufun wre ŋunɔ,
wiyirɛ bɔtɔ we na tini,
u mbɛɛ na,
mbe u snimi na chiɛnri plipli.
24 Mbe u yiɛshɔ,
mbe wra fiɛlɛ mbra tra kaa,
a na pe ŋunɔ wi bnɔ fɔ,
wa ja mbe yire titɛɛ.
25 Na pe ŋunɔ bnɔ kre fɔ,
a u loo, mbe wra jiin,
kre nyjila kre na
u ŋunɔ kre ndiom ndru haalee,
mbra ŋunɔwifɛɛnlɛ loplombo,
pre paaraa ndru.
26 Job, ŋu mu fufla nyina,
kachindɛ wra yiri,
mbe kuɛn nyaa,
mbra shie tapan haa ra?
27 Ŋu mu nyuu nyina kolo,
a wra u zeere leni nyjeeri ra?
28 Nyua wee u lee na sni blee,
nyua dnɛ ndoolo u lee,
mbe ndra.
29 Bawa u yilii na shie,
na u sro chaa,
a bawa u yire,
na sro nyaa haalee.
30 Nyimi u biile gboo,
lawee ŋga nu kaara fɔɔn nyi,
bawa mu pe nya.”