O Tafun Nyiɛkpɔɔ Paara
38
Nyiɛkpɔɔ na yiri nyiɛ fuflɛ nu mna Job nyu wɔ, mbo,2 “Ŋu wi ŋmbi,
a mna ni nyu kaanri
ni kachindɛ na ŋga hin?
Mu na kee nyjɛ nu,
jawala n wa yuu ŋga hin?
3 Yiri mu yire na blɔ wi ŋu,
mbe ni mu wie kee,
mbe mu ni nyu wɔ.
4 Nyjila ŋga ndaa tra nɔɔ leni kre,
na sena mu nyi hin?
na muu jawala ni kpɔɔ,
kena yo ni pan.
5 Ndro ŋmbi wra ki damu tnɔ hin?
Ni yo mu ndro ŋmba wra maŋa,
tini mu ki kra wre chin rɔ?
6 Ti mbe ni mu wie ɛ.
Yira ŋgi na tra yire hin?
ndee ŋmbi wra ki jenu dnɛ,
nyjɛ yi ki yii, yire kan hin?
7 Nyjila ŋga ni bnimi nyu
wɔɛlɛɛ na chaa na mɛɛ koni,
a nyjeeri bitumblɔ naa gble leni,
na yɛshɔɔrɔ lii kre hin?
8 Na epo nyumu gbun,
mu yili ki lawee,
ŋmbi u krɔ yiri na toni
ki na hin?
9 Ŋga ndaa tloe tɛɛ mu ki tɔ,
mna wɔmu kprikpri tɛɛ,
mu ki juule,
10 mna lawee ŋga nu ki fna,
mbe da kun mu tro,
mna ki krɔɛ paari yirɛ,
na ki krɔɛ pe,
11 na nyjila ŋga ni ndaa yo,
ki pan na ‘Mu da haa yi kre,
maashia tro mbe sɛ yiɛ,
lawee ŋga nu mu mbapilɛ,
nyjɛ mu waa,
na muyɛ kpɔɔri yire,
we jaa da kre.’
12 Job, mu da mu yo ndram pan,
na ki saan tun ra?
A na mna yo ma ki pan,
kra li mu kee na woo?
13 Mbe ki ti mbe kra feni,
mbra tra kuun,
mbe sisampefɛɛnlɛ ni,
mbe laa ki na ra?
14 Nyisee ki tii mbe tra yiɛ chinɛ,
mbe ki nyumu pe na choo,
ŋga nu pe yira chie mu le yi,
mbe ki kulo kulo na yoŋgo yi.
15 Sisampefɛɛnlɛ n na,
nyisee chaa mbe nya,
na ki pan,
kena pe jaŋga kro kɔ.
16 Mu da mu sɛ lawee ŋga nu,
epo blo na yilii tun ra?
ndee mu da mu nyaari,
epo tapan tuun?
17 Mu da mu kuulo lawee krɔ,
nyu nya tuun?
Na mu da,
mu yire yirɛ nyjɛ ka nya,
ki yo mbe ni loo.
18 A mu chin imi tra,
ŋga kpɔɔrɔm da ra?
na mu ki chin, ki yo ni pan.
19 Lawee ŋgi nu yila yilii,
na paan hin?
a lawee ŋgi nu ndram wɔmu,
nyi mu tni hin?
20 A mu jaa yi nyina,
mna yie sɛ mbe da,
mbe ndruu ti yi ndru pan
yi lawee ra?
21 Ni shɔnli na mu ki ja,
ŋgi na hin? Mu lɛ,
a ŋga ndaa yirɛ kro gbeele kre,
na muu wa.
22 Nyuŋgo ŋga nu,
ni nyiɛ sugbeŋge,
na nyiɛ subie teeri kre,
mu da mu le wa tuun?
23 Yire krɛrɛ, ni yi nyu yii,
mu tɛɛ na kala ble sri.
Ni yi yii mu tɛɛ na ŋunɔ,
ndee kakrɔ ble sri.
24 Na nyiɛ nyini, kolo ŋgi na,
ki troi na nyini hin?
Ndee lawee ŋgi nu,
yila finhaa fuflɛ troi na yilii,
mbe tra shɔ mbe ta hin?
25 Na nyiɛ pan mu na fuu kpɔɔ,
ŋmbi u kooloe woni ki pan hin?
Ndee mu na nyiɛtwanraa nyina,
mna ki fna mbe tro hin?
26 Nyiɛ paan mbe tra ŋga na,
ndro n wa kuraa nyiŋge,
hali tablɔ tra ŋga nu ndro n wa,
kuraa, ki bawa nyiŋgei.
27 Mbe ki ti wejiŋge nyjii,
tra waara gbeŋglen na,
mbe nyaa fun mbe yili ki nu.
28 Nyiɛ, na sugbeŋge lɛ,
wi ŋmbi hin?
29 Ŋmbi lɛɛ nyiɛ subie yili hin?
A ndro ŋmbi u sugbeŋge,
se hin?
30 Ŋmbi wra tia nyumu,
na sheli na dnɛ yi,
a epo yiɛ na nyjii,
mna sheli kre hin?
31 Ŋmbi we jaa wɔɛlɛɛ chichiele,
nyjɛ yii wa nyjeeri,
nyjɛ chaa, mbe yi pɔ,
ndee mbe yi saan hin?
32 Mu ja mbe wɔɛlɛɛ nyina,
nyjila ŋga nu ki fna yi yilii?
Ndee mbe wɔɛlɛɛ,
nyjɛ yi pe na sisire,
na u biile lɛ yire nyina,
kolo ŋga na yie tro hin?
33 Mu mbra nyjɛ,
yii wa nyjeeri chin ra?
A mu jaa ti mbe yi tnumu tun,
tra yiɛ na mna ra?
34 Mu ja mbe paara,
na tloe ni ra?
Mbe yo yi pan na nyumu ki yili,
yi nu mbe pan ra?
35 Mu jaa ti mbe nyiɛ,
na nyini ra?
A ŋu pan pe paan na yuu na,
‘Oo wa mna ra?’
36 Ŋmbi u loloŋgo ŋga kachindɛ,
ndee mu jawala ŋga nɔɔloo hin?
37 Ŋmbi nu kachindɛ nyi,
mbe u jaa tloe tɔɔnri hin?
Ndee mbe nyjeeri nyumu,
le yirɛ yire nyu nyaa hin?
38 Ŋmbi u tii,
mbe bloŋgo ndri mbe sheli,
Mu tia tra klo klo hin?
39 Ŋu mu sro chaa,
na blɛkpɔɔ biile kaan ra?
Ndee ŋu mu tia blɛkpɔɔ,
na lii na yɔɔ yi ra?
40 Na pe yiri pie ndra,
mbe sni pe snihɛɛ nu,
ndee mbe ja mbra yurɛ sri.
41 Na gɔɔgɔɔ biile sro cha mu la,
na kila na sro chaa na nyɛni,
na woni mi Nyiɛkpɔɔ na,
ŋmbi u pe kaan sro hin?