Elihu Paaraa
37
Nyiɛ fuflɛ kre tia ni,gbun yɔ ni na,
a ndaa seeri poŋgo.
2 E kro, e Nyiɛkpɔɔ mana loo,
kee yilii u nyuu na paan,
na nyiɛtwanraa yi.
3 U tia nyiɛ na nyini,
na tro nyiɛ yiɛ na,
hali mbe sɛ yili lawee kro nu.
4 Na nyiɛ nyi mu tro,
mbe u mana chiin gunu ki nu,
mbe u fuu, mbe twanri,
mana kpɔɔ ni.
Kii wa wa maa,
mbe u ti ki nyi plipli mbe tro.
5 Na Nyiɛkpɔɔ mana yili,
ki kawako kee nyini pini.
U kekpɔɛ pini,
nyjɛ nɔɔ waa jaa loo.
6 Wre u yuu sugbeŋge pan mbo,
‘Wo tra na,’
mbe yo nyiɛ pan mbo,
‘Pan na jaŋga ni.’
7 Wre u tii mbe ndro kro laa,
u tnumu ŋga u pini na,
imi kie pe mbe pe u kee,
ŋga u pini nya.
8 Na ki pan ma kre,
mbe yurɛ fɛ mbe ndra.
9 Mbe nyiɛ fuflɛ gbun kpɔɔ,
mbe ki ti lawee kro nyjii.
10 Nyiɛkpɔɔ mana fuflɛ we ti,
mbe nyumu nyjii,
mbe sheli mbe pe na dnɛ yi.
11 Wre u tii mbe nyumu sɛ pɔ,
nyjeeri tloe nu,
mbra nyini tloe yire nu.
12 Wre u tii mbe tloe na feni,
mbra kuun nyiɛ yiɛ na,
mbra ŋga we yo pini.
13 U tii mbe nyiɛ yili tloe nu,
mbe pan mbe leele ndie tini,
ndee mbe u leele fooro le,
mbe ti nyiɛ pan mbe tra nyiŋge.
14 Job, ndie tɛɛ mu Nyiɛkpɔɔ
kawako kee yire jawa.
15 Mu chin kolo ŋga na,
Nyiɛkpɔɔ tro,
a tloe na nyini ra?
16 Mu chin imi ki pe,
a tloe pɔ nyjeeri,
a yi n gbun yaka na ra?
Wre wi Nyiɛkpɔɔ jawalafun titi,
wre kawako kee nyjɛ,
u pini yire ka yi.
17 Na ki pan na tapan haa fuflɛ,
gbun mu tro tra na,
mbe ki ti mbe ndram wɛɛri,
mbe e na chaa,
mbe ku e dodonyi nu.
18 Mu jaa ya Nyiɛkpɔɔ na,
mbe u nyjeeri nyaa,
mbe chan ra?
Ki sheli na dwanle,
ŋga pe swafre tɛɛ mu pe yi.
19 O nyina kee ŋga ki fna,
o yo Nyiɛkpɔɔ pan,
o chaa mbe o kala yo u pan,
a o n chin kee ŋga oo yo.
20 Ni yo Nyiɛkpɔɔ pan na ni chaa,
mbe paara na u ni ree?
A yira ŋgi kee lewo we cha,
mbe uyɛ ŋga
mbe u u jɔli ŋga hin?
21 Na fuflɛ gbun mu tloe pɔ,
mu laa yila yiɛ na,
a ki pe chasi,
mu na chiɛnri nyjeeri,
ndro wa jaa yiɛ yire mbe ki le.
22 La, na Nyiɛkpɔɔ yɛnyiŋge,
ŋga ki chiɛnri kre paan,
ki chiɛnri mu wɛ yila ŋga,
waa jaa le kre na.
23 Ndro wa jaa da Nyiɛkpɔɔ,
Jaŋgafun wre na.
U jaŋga kpɔɔ, u fraka,
na kpra lii,
ki tia wra ndro fiŋge.
24 Kre ndra na ndro kro u fiɛ.
Ŋgi na hin?
Leele mblɛ pe jawa,
na pe kala chin peyɛ pan kre,
u n pe le mu nya.”