Elihu Paaraa Jijirɛ Wo
36
Elihu na yo mbo,2 “Frɔ ta chiɛri,
mbe ni mu nyina na,
kaalɛɛ wa mbe ni yo,
mbe Nyiɛkpɔɔ ŋga.
3 Ni jawala juo, kena mbe ki tɛɛ,
mbe nyina na,
Nyiɛkpɔɔ ŋmba wi,
ni gbeelefun wre,
na kprafun wi.
4 Ni chaa mbe mu chin,
na ni kee nyjɛ ni yuu yire,
na kafinɛ ma,
a ŋu na jawalafun titi,
e paara kre.
5 Jaŋgafun wi Nyiɛkpɔɔ,
a lewo kee u shian.
Jaŋgafun wi, a na u kala yii,
wa laa ki kro.
6 Wa sisampefun ti,
mbe u ŋmaa li mbe mu,
a wre u shianfun kala yuu,
na u kaan.
7 Wra yiɛ wɔ lewo frakafun na,
wre u tia pre na ŋulo,
na ŋunumu lii,
a wra pe kaan kpɔɔmu,
nyjila kro nu.
8 La, na pe tɔɔnrɔ mɛnyi,
le leele na,
mu tia pra kala nyaa kre,
9 wre u tii mbe pe chin,
sisam ŋga pe pe,
na yɛkpɔɔmu kee ŋga pe pe.
10 A we pe fraka,
mbe ti pe ndie tɛɛ,
mbe laa pe sisamu pee kro.
11 A na pe Nyiɛkpɔɔ nyu loo,
na u sumi kre,
kie ti mbe pe ble hɛnyi,
nyjɛ pie li yire,
mbe yi nyu pe na.
12 La, na pe nsra ndie tɛɛ,
pe nyu kee we sɛ,
na pe ni dɔɔya nu,
mbe ku, na pe n jawala ni.
13 Mblɛ pe n Nyiɛkpɔɔ chin pre,
pre pe krɔ tii lɛɛ,
hali na u pe ndie tini,
ki na kuraa kre,
pia nyɛni mbe shɔfun haa cha.
14 Na ki pan ma,
pie nyifɛɛrɛ kumu ku,
pe yirifum nyjila,
15 Nyjila shelee na kanyana nyjila,
yire ni Nyiɛkpɔɔ teeri,
na leele tinii na mbrai uyɛ na.
16 Nyiɛkpɔɔ u mu shio,
fooro lie kɛɛ,
mbe sɛ mu yire lawee vankam,
mna yaka wa jaa da mu na nu,
mbe mu ŋga yira ŋga mu chaa,
sro taan ŋga mu li wejinyiŋge nu.
17 La, fuŋgaami ŋga,
sisam tia pe mu gbun pimi ni,
kpra kuɔn na pimi lie
mu yii mu le nu.
18 Mu yɛ dɔɔta mbe ndro,
wa swa tɛɛ mbe mu jawala lɔ,
ndee mbe pe dɔli yira kpɔɔ,
ka tɛɛ mbe mu jawala kna.
19 Mu yɛtaara yirɛ na jaŋga kee,
nyjɛ mu pini yire,
we jaa ya mu na mbe ki ti,
mbe ma fooro li ra?
20 Maa ti mbe wɔmu la mu ta,
mbe mu sɛ leele tini,
mbe yili pe kalonyi nu,
mbe sɛ pe fiŋge.
21 Dɔɔta mbe ma kna,
mbe sɛ le sisam nu,
kre ndra na pe yila mu,
mu penle na kanyana ni.
22 Nyiɛkpɔɔ jaŋga kpɔɔ,
ŋmbi we ja mbe ndro nyina,
kala na wre wi hin?
23 Ndro wa jaa Nyiɛkpɔɔ nyina,
ŋga ki fna u pe,
ndee mbe u yiɛ gbun,
na u sisaa pe.
24 Sɔɔnri na mu u ŋga mɛɛ,
u kee nyjɛ u pe yire na,
yire leele le, na mɛɛ koni,
na u kaan.
25 Ndro kro ŋga u pe nya,
mu yire haalee na yi le.
26 Nyiɛkpɔɔ kpɔɔ,
a lewo wa jaa u nɔɔloo,
lewo wa jaa u yɛlɛ nyu chin.
27 Nyiɛkpɔɔ wre u nyumu tini,
na shie nyjeeri,
mbe ti mbe ki kaari nyiɛ,
mbra woni tra.
28 Wre u tii mbe nyumu yili,
tloe nu, mbe pan nyiɛ,
mbe da lewo kro na.
29 Ŋmbi we jaa kolo ŋga na u tro,
mu tloe nyaa mu chan nyjeeri,
nɔɔloo hin?
Mbe chin kolo ŋga na u tro,
a nyiɛ na twanri na yilii,
u tnihaa wa?
30 Le imi na u tia,
nyiɛ na nyini nyiɛ yiɛ na,
a epo tapan wa
mu wɔ kprikpri tɛ.
31 Kre kolo ŋga na Nyiɛkpɔɔ tro,
na waŋgrɛ le,
mu tia sro bɔ pe na.
32 Na nyiɛ nyini, wre kɛɛ ki nyi,
a mna u chaa,
bawa kie nyi mbe tro.
33 Na nyiɛ twanri,
ki nyina na nyiɛ fuflɛ chaa,
mbe gbun,
hali nui kuraa chini,
na nyiɛ fuflɛ paan mbe gbun.