Elihu Paara Taarɛwo
35
Elihu na yo Job pan mbo,2 “Mu jawa na ki nyu,
na mu yire mbe yo na,
‘Ni fraka Nyiɛkpɔɔ yiɛ ra?’
3 A mna wie na,
‘Na ni sisaa pee ti,
tnu ŋgi mbe ta hin?’
4 Ni chaa mbe ŋu,
na mu nɔɔlɔ,
mblɛ mu jaara pre ki nyu wɔ.
5 E yiɛ wa e le nyjeeri,
e le imi na yire,
na tloe lalaa le mu da.
6 Na mu sisaa pe,
mni kie u pe hin?
Imi na mu sisaa nɛɛ,
mu da kpan,
kie ka kun u na ra?
7 A na mu fraka,
yira ŋgi we ta mu pan hin?
Ndee yira ŋgi we ta,
mbe shɔ mu kɛɛ hin?
8 Na mu sisaa pe,
lewo chiin we ki kanyana nya,
a na mu fraka lewo we ki tnu ta.
9 Leele ja na nyɛni,
pe fiŋgee ndra na,
mbra shɔfun chaa,
mbe u pe shɔ faŋgafɛɛnlɛ kɛɛ,
mbe pe wuu.
10 A pe wa wa nyu nyaa,
mbe yo na,
‘A sena ni gbeelefun
Nyiɛkpɔɔ wre nyi hin?
Ŋmba u tia o na dankna taa,
nyjila sisaa nu,
11 ŋmba u o nyina kee tataara,
mu wɛ nyaalam yurɛ na,
mu tia o kala chin,
mu wɛ hanyiɛlɛ na kre?’
12 Sisampefɛɛnlɛ yɛkpɔɔmu,
ndra na na o nyɛni
mu u yeeri, wa loo o pan.
13 Kpra na, Nyiɛkpɔɔ wa ndie
tɛɛ kewɛɛ talaa na.
Jaŋgafun wre na yire kee,
yire loo.
14 Kena na mu kee wa u yiɛ,
na u sri mbe u ki nyu wɔ,
a mu yo na mu n na u nyaa,
kena mni we pe,
mbe mu kee kre loo hin?
15 Mu jawa na Nyiɛkpɔɔ,
na lewo ndie tini,
a u kee ka ma,
na sisam pee ni.
16 Ki tia kewɛɛ bribri mu yuu,
kee nyjɛ mu yuu tataara,
yire krɛrɛ,
jawala n wa ka nu.”