Elihu Paara
34
A Elihu na yo mbo,2 “Yire kachimblɛ,
e ni kee ŋga mbe yo loo,
yire mblɛ pan jawala nyi kre,
e ndie tɛɛ ni pan.
3 Ŋgi na hin?
Ndie kala chaa mbe loo,
imi na ndile sro taan chaa kre.
4 E ti mbe o kro kee,
ŋga ki fraka haa cha,
mbe chichie le mbe twan.
5 Job yo mbo, ‘Ni n sisaa ka pe,
a Nyiɛkpɔɔ je na,
wa ni kala yo mbe ni ŋga.
6 Kii wa na ni fraka,
nde Nyiɛkpɔɔ ni le,
na kafnu wi mi,
kii wa na ni n pimi li,
nde u snimi ni suulo mu pra,
a yi klɛ wa jaa tra.’
7 Ndro ŋmbi u pe na Job wi,
a u n Nyiɛkpɔɔ le mu nya hin?
8 Wre na sisam pefɛɛnlɛ,
pe nyaari nyjila kro nu.
9 Ŋgi na hin? Wre u yuu mbo,
‘Na mu gbeŋmba na mu ti,
mbe Nyiɛkpɔɔ yiɛshɔ mu na,
tnu ŋgi mu ta hin?’
10 Kena yire mblɛ e kala nɔɔ ndru
kre, e loo ni pan,
Nyiɛkpɔɔ Jaŋgafun wre haa le,
na sisam pee ni, a wa punu.
11 Kee ŋga lewo pini kro,
u ki fɔtɔɔrɔ taa,
u kepele ŋga u pini,
fɔtɔɔrɔ u u kaan.
12 Ki n fna mbe ndro ki le,
jawala nu kuraa,
na Nyiɛkpɔɔ we kefɔɔn pe,
ndee na Jaŋgafun wre,
we kpra fɛɛlɛ.
13 Ndro ŋmbi wra u wɔ,
na wre wi tra ŋga tafun hin?
A ŋmbi wra u tɛɛ,
waŋgra ŋga kro ŋunu hin?
14 Na wra u jawala pe,
na we u ŋumu ŋga nu,
ŋmaa nyi kre shɔ,
15 leele kro we na chaa mbra ku,
mbe lewo na ndru,
mbra sɛ bloŋgo nu.
16 Na nɔɔloo wa mu pan,
kena loo mu ndie tɛɛ,
kee ŋga ni yuu ŋga na.
17 Lewo ŋmba u kpra fun kre,
we jaa waŋgra le ra?
A ŋmbi we ja mbe Jaŋgafun,
ŋmba u fraka wre gbun,
pimi ni hin?
18 Wre u yuu ŋulo pan mbo,
‘Lewaala lɛ yire.’
Na yuu lekpɔɛ pan na,
‘Sisampefɛɛnlɛ lɛ yire.’
19 Wre u lebiile kro le,
na pee nunu,
a u n swafun le,
na u wɛ shianfun na.
Ŋgi na hin?
U kɛnyu tnumu lɛ pe kro.
20 Pie jaa fo mbe ku ndroo,
mbe leele na seeri.
Jaŋgafɛɛnlɛ pre ja na kuu,
nyjila ŋga ni ndro n kɛ taa,
pe wa na.
21 U yiɛ wa kooloe,
nyjɛ na leweele troi na,
a u pe dumble kro nyaa.
22 Wɔmu, ndee wɔmu kprikpri,
lawee ka n wa,
mna sisam pefun,
we jaa sɛ ndra.
23 Ki n Nyiɛkpɔɔ shian,
na we yo lewo,
u paan yire u yiɛ,
mbe u u le chichie,
mbe chiin u kpra kun.
24 Na u yo we jaŋgafun kla,
wa ndro wie yaka.
Na u u kla mu kɔ,
mbe u wa tɛɛ u titɛɛ.
25 Ŋgi na hin?
U pe kepele kro dɔɔtaa,
u pe koni pe juɛn na ndroo,
mbe pe kla.
26 U pe ndie tinii,
pe sisam ndra na,
mbe ndro kro pe nya.
27 Ŋgi na hin? Pe laa u kro,
a pe n u kooloe,
yire ka le mu nya.
28 Pre pe tia shiafɛɛnlɛ,
nyɛnɛɛ na dani u na,
mu tia wra pɔlɛfɛɛnlɛ,
nyɛnɛɛ ndru.
29 A na u yo wa paara,
ŋmbi we ja mbe u gbun,
na pimi ni hin?
A na u yiɛ ndra lewo na,
ŋmbi we u nya hin?
a nde wre u waŋgra,
na ki leele le,
30 a wa kolo ŋga mbe leele,
mblɛ pe n u chin kre,
mbe pe ŋunumu li leele na,
mbra pe peerii mɛnyi pɛɛlɛɛ.
31 Na ki pe na lewo we yo,
Nyiɛkpɔɔ pan na,
‘Ni ndie tinɛɛ ta,
la, mba sisaa pe na,
32 kena ni nyina fɔɔn ŋga ni pe,
mbe mba ka pe na.’
33 Ŋga mu Nyiɛkpɔɔ je ŋga,
kena mu chaa mbe u ŋga,
mu chaa pe mbe mu ŋga ra?
Ŋu titi ki nyu wɔ mu wru,
mi ma mbe ki nyu wɔ mu pan,
kena ni nyina kee ŋga mu chin.
34 Leele mblɛ pe kala chin,
na kee nɔɔ ndru,
kre yuu ni pan na,
35 Job kee nyjɛ u yuu yire,
jawala n wa yi nu,
a yi n nɔɔloo ni.
36 Oh. Job we kala nya,
mbe sɛ yiɛ.
Ŋgi na hin? U kee nyu woni,
na sisampefun wi.
37 U sisam kɔkro ni,
u ndikana pini Nyiɛkpɔɔ na,
mu yire o yiɛ na,
na Nyiɛkpɔɔ pini na tɛɛ,
na paara na u taanla na yaa.”