Elihu Na Paara
32
Ŋga kra pan ma kre, Job nɔɔlɔ taarɛ pre wa n sra u nyu wɔ na. Ŋgi na hin? Job na pe na u fraka uyɛ pan. 2 La, Barakel biblɔ Elihu, Buz ndro ŋmba wra yiri Ram sele nu wre, krɔ na kun na Job ni, na u uyɛ pini na u fraka, na Nyiɛkpɔɔ yiɛ taanla. 3 U krɔ na kun na Job nɔɔlɔ taarɛ pre ni na, na pe nsra kee ka ta mbe yire ki na mbe Job gbun na pimi ni, a nde pra je mna yo na u pimi li. 4 Elihu na frɔ mna chin mu paara mu Job nyina, ŋgi na hin? Job nɔɔlɔ taarɛ pre naa lopom u na. 5 Ŋga wra nya na leele taarɛ pre paara a pe nyu to kre, fuŋga u krɔ na yiri.6 A Elihu na kna mbo,
“Ni yɛlɛ nyjɛ ni li n da yaka,
la, yire lɛ mu wɛ ni na,
kre ki tia fiɛrɛ ni yii,
a ni n ja,
mbe ŋga ni chin yo e pan.
7 Ndaa jawa na lɛlɛm we paara,
mbe blɛlɛɛlɛ kachindɛ kee yo.
8 La, ŋumu ŋga kii wa lewo nu kre,
Jaŋgafun wre ŋumu
wre u paan na nɔɔloo ni.
9 Kena ki n pe na lɛlɛm chiin,
ki paan kachindɛ ni,
a blɛlɛɛlɛ chiin ma pe kee,
ŋga ki fraka nɔɔ ndru.
10 Kena ni yuu e pan na,
E ndie tɛɛ ni pan,
mbe kee ŋga mi chin yo e pan.
11 Ni yire mu e shie a e paara,
mu ndie tɛɛ kee nyjɛ e yuu,
yire kro na,
hali a e na kee,
nyjɛ ee paara haa chaa.
12 Ni frɔ ta, mu ndie tɛɛ e pan,
la, e wa n wa mu ja,
mu yo Job pan na, u sisaa pe,
kee nyjɛ u yo yire krɛrɛ,
e wa n ja mu u nyu wɔ.
13 Yaashia yo na e kala chin,
e ti mbe Nyiɛkpɔɔ u nyu wɔ,
la lewo ma.
14 La, mi ma Job paara,
mu taan, na mi na wi,
mba na kee nyjɛ e yuu,
nyjɛ ka tɛɛ mbra u nyu wɔ.
15 Job, pe nyu kee kɔ,
a pe n kee ka ta mbe yo na.
16 Ŋga pe nyu ku ŋga,
ni pieri tɛ ra?
Ŋga pee wa mu yire,
a pe n kee ka ta,
mbe mu nyu wɔ ŋga,
17 kalaa wa ni pan,
mbe ni ta mbe yo.
Mbe ŋga ni chin yo mu pan.
18 Ŋgi na hin? Kaalɛɛ ni nyi,
a ŋumu ŋga kii wa ni nu,
kre na chaa mbe ni paara.
19 Pan ni lam nyi na simi,
ŋga pe le gbolo nu,
mu ki nyu lɔli mu tɔ yi.
Pan ni sɛ pe na,
yurɔ hlɛ gbolo ŋga nu,
pe simi le kra chaa mbe ja yi.
20 Ki fna ni paara mbe niyɛ ta,
ki fna ni nyu nyaa,
mbe kala yo.
21 Mba paara mbe ndro yiɛ le,
ndee mbe ndro pni.
22 Ŋgi na hin? Na ni yo,
mbe paara mbe ndro pni,
Nyiɛkpɔɔ ŋmba wi ni gbeelefun,
wre we ni kla fuŋgaami.