Job Paaraa
31
Ndaa nyu yo na,mba bichable le,
mbe ti u niŋge kro ni na.
2 Jawala ŋgi Nyiɛkpɔɔ,
ŋmba u wa nyjeeri wre,
jawa na lewo ni hin?
Ndee fɔtɔɔrɔ ŋgi we u ŋga hin?
3 Ki pe kpra na,
we lewo sisampefun kro kla.
4 Nyiɛkpɔɔ u ni kooloe,
nyjɛ na ni tro kro chin,
mu na ni dumble kro tɔɔnri?
5 Kena na ni tro,
fanaa kolo ka na,
ndee mu kafinɛ wru,
mu pe ni tnumu kre,
6 kena Nyiɛkpɔɔ wre u ni kra,
mbe le chichie,
we nya na kala ka n wa,
ni na.
7 Na ni fun u kolo na,
ndee na ni tia sisam pee,
niŋge ni yii,
ndee na ni niyɛ tɔ,
na nɛɛrɛ kee ka ni kre,
8 kena leele plɛ pe ni see yirɛ,
nyjɛ ni luu yire wru mbe li,
ndee mbe ni see yirɛ,
klɔ mbe wo.
9 Na ki pan na ni tia,
ni tnifun chɔ niŋge ni yii,
ndee a ni sɛ ja u krɔ kro,
na u sri kre,
10 kena Nyiɛkpɔɔ u ti,
mbe ni chɔ sɛ blɔ fɔŋgɔ,
shɔlɔ tre,
mbe blɔ fɔŋgɔ sni na u ni.
11 Na ki pan ma, kie pe sisam,
ŋga kie pan na nyifɛɛrɛ,
na pimi gbɔɔn ni.
12 Kre sisam kre we na pe na,
kanhun ŋga ki yirɛ sroi,
na yi klai yi,
mbra yira ŋga ni ta kro kla.
13 Na ki pan na ni n kpra li,
na ni sumifɛɛnlɛ ni,
a pe kee ka ta,
mu yo mu ni taan,
14 a Nyiɛkpɔɔ ni wie ki yi kre,
mni sembremu,
mbe ki nyu wɔ u yiɛ hin?
15 Ŋmba wra ni faanri,
mu wa ni lo lɛɛ kre
ma wra pre faanri na ra?
A wre chɔɔ ma,
wra o kro shiin pre gbeele,
mu le o loolo lɛɛ ra?
16 Na ni da mu je,
shianfɛɛnlɛ pan,
pe niŋge yira na,
ndee mu da mu tia lekuchlɔ,
fooro li kre.
17 Ndee na ni da mu li mu yɔɔ,
mu tia bijro sɛ sni klo kre,
18 a na mi ni bijro wre pɔɔri,
mu yire ni nyanyjɛbim nyjila,
a ni sɛ pe na u lɛ wi,
ndee a ni yire,
ni bimi mu lekuchɔ wre le,
19 ndee na ni shianfun,
ŋmba u n yoŋgo ni nya,
ndee mu pɔlɛfun wa nya,
na dodoŋgi n wa u pan,
20 a ni nsra u ŋga,
mbayooro dodoŋgi
a u le, a gbɛŋgɛ le u nu,
a u yire ki na mu ni dwan,
21 ndee na ni da mu kɛ yire
mu bijro piɛri kala li ndoo,
ŋga ni jawa na mbe tam li,
kre ndra na kre,
22 kena ni kɛ ki kun,
mbe yire ni patia
sooloo na mbe to.
23 Ŋga ndaa fiɛ na Nyiɛkpɔɔ,
we ni kla,
a ndaa u yɛnyiŋge kre fiɛ,
kre ndra na,
mba ja mbe yire,
kee nyjɛ ka pe.
24 Na ndaa kaan swanyiɛ na,
ndee mna nyu nyaa,
mu yo swanyiɛ titi pan na,
‘Ŋu wi ni ndra.’
25 Ndee na ndaa niyɛ kpɔɔri,
na ni wejiyirɛ nɛɛrɛ,
ndee na yirɛ nyjɛ ni fna,
mu ta yire ni,
26 ndee na ndaa yila
chiɛnrɛɛ le,
ndee mna yeŋge nyumu le,
mna yi sumi,
27 a ni loloŋgo na ni fana,
mu ni wa mu fun,
mu tia ni sɛ yi sumi kre,
28 kena yire kee nyjɛ,
krɛrɛ pe sisam,
nyjɛ na pie jaa yire,
mbe ni gbun pimi ni.
Na ki pan ma,
kena ni ayɛte Nyiɛkpɔɔ,
ŋmba uu wa nyjeeri wre na.
29 Ni n da mu tia ni yiɛ shɔ,
ni loŋgoolo,
ndrapɛɛnrɛ kee na,
a ni n da mu na ni loŋgo le,
na u tɛɛ u katala nyjila tun.
30 Ni n na da mu nyu nyaa,
mu sisam kee yo,
mu ni loŋgo sun,
na u ku tun.
31 Ni katoo leele kro,
wa n da mu li mu kɔ,
mu yiri mu wie na,
‘E ŋmbi u n yɔɔ hin?’
32 Kre fuŋu n wa a ni u nya,
mu tia u ŋunu fimi na tun.
Nyjila kro nu,
ndaa kolo kunfɛɛnlɛ yiri,
na shie ni katoo.
33 Na ki pe na,
ndaa ni sisam ndra,
imi na plɛ pini kre,
mbra ni pimi kee ndra,
ni loloŋgo nu kre,
34 kena lenɛɛmu ndaa fiɛ,
mnaa fiɛ na ni sele leele,
we ni le fiɛn,
kre kra tia ndaa pieri,
a ni n sra yili fimi na.
35 Oh, na mbe na Nyiɛkpɔɔ ta,
mbe wra kee,
ŋga ni yuu ŋga loo.
Ni niyɛ kna mbe ni nyu wɔ.
Kena e ti mbe,
Jaŋgafun wre ni nyu wɔ,
e ti mbe ŋmba u kala taari ni
na wre u kalɛɛ nyunɔ,
mbe pan.
36 Kpra na,
mbe na kaalɛɛ yire pɔ,
mbra hlu ni patiɛ na,
mbra niyɛ kpɔɔ,
mbe na yi pɔ ni ndra na,
na ŋujuulee ni le.
37 Mbe na ŋmba u kala taari,
ni na wre nyina,
kooloe nyjɛ na ni tro kro,
a mbe na gbun ta
na ŋunu pɔ wi,
mbra yili u yiɛ na.
38 Na ni tra ŋga na ni fali
kre shɔ,
ki tafɛɛnlɛ pan jaŋga na,
39 ndee na ni ki yirɛ kun mu li,
mu tii ki ndra fɔlɔ tɔ,
mu ki tafɛɛnlɛ ŋga,
a ki tia pra kala nyaa kre,
40 kena na yua we yiri
tra kre nu kre,
mbrambra na nyaa,
yi ki shɔ mbe ta.”
Job paaraa nyu to.