Job Paaraa
30
La, fuŋga rɛ,bilɛ mblɛ pe n da na nini,
pe ni pini na tɛɛ.
Lewaala lɛ pe lɛɛlɛ,
a mba ti mbe pe lɛɛlɛ lewaala
pre ya ni nyikaanla na,
mbe ni mbaala shie kple.
2 Kee ŋgi pre leele mblɛ,
we jaa pe ni pan hin?
Mblɛ faŋga ki kɔ pe nu ŋga?
3 Shian, na klo ki pe kuu,
didinyi pie tini mbe klɔ,
ŋgaala ni tablɔ tra,
waara kre nu blee,
mbe chiin yaka ta mbe ka.
4 Nyaalam wrɛ didinyi nyjɛ,
nu tnamu n wa,
yire yi pe sro.
5 Pra pe ni, mu yili pe wolo nu,
na pe gble na juolo lɛ.
6 Pra pe ni, jaŋga na,
a pra sɛ tni lafooloe,
nyjɛ nu nyumu n wa nu,
a pe plɛ na sɛ tni dnɛ,
na tra lam weele nu.
7 Pra klo peyɛ na,
na nyɛni tinyi wrɛ ndoolo,
na yurɛ lɛ.
8 Pe n mɛɛ ni,
lewaala kpokpo lɛ,
a pra pe ni,
mu yili tra kre nu.
9 Aŋga, pe biile pe ni pini na tɛɛ,
na mɛɛ koni,
na woni ni na.
10 Pe yire haalee na ni le,
na afuŋgo yira yi,
mu na paan na tɛɛnrɛ hlu,
na woni ni yiɛ na.
11 Aŋga, ŋga Nyiɛkpɔɔ tia,
ni taa ka na ŋga,
ŋga pe chaa pe pini ni na.
12 Nyjila kro nu, pan ki nyi,
na wii pe wii, na ni ni,
mu mɛnyi pɛɛlɛɛ pɛɛri ni na,
na ni nini.
13 Pe kolo tɔ ni na,
na ni chaa mbe kla,
na yuu na,
‘Ndro n wa mbe jaa ya u na.’
14 Na pe paan ni pan,
lawee nyjɛ yi ni tɔ yire
vromboe nu pie yili,
mbe yi juari mbe wo ni na,
mbe yi ni brɛri.
15 Fiɛrɛ ni yii kpɔɔ mu wɛ ni na,
a ndro n na ni kaan buuro na,
pan ki pe na fuflɛ ki sɛ na ni ni,
a ni yɛtaara yirɛ fun na tlo yi.
16 Fuŋgaami ni ŋmaa kɔ,
a mba jaa shɔ
ni kanyana kɛɛ.
17 Na ble wɔ,
mbe ni kajle na ni yaa,
yia nyjii mbe ni wuu.
18 Nyiɛkpɔɔ u jaŋga kpɔɔ tɛɛ
mu ni yii dodonyi na,
mu ki tɛɛ mu ni pɔ,
a ki pe na dodoŋgi,
ki ni yii lagboe nu,
19 mu ni viŋge mu wa tra,
mu tia ni kaari bloŋgo.
20 Oh. Nyiɛkpɔɔ,
ni nyɛni mu mu yeeri,
la, mu n shɔ ni pan,
a ni yiri mu yire sholo,
a mu pieri na ni le.
21 Mu mu jaŋga tɛɛ,
na wii na nini,
hali mu tii ni fooro chiɛn.
22 Mu ni viŋge mu wa,
nyiɛ fuflɛ nu,
mu tia fuflɛ,
kre ni wru jaŋga na.
23 Ni chin na,
mu ni ŋmaa shɔ ni kɛɛ,
mbe sɛ na ni ni lawee,
ŋga nu mu shie,
na leele kro ni kre nu.
24 Kpra na,
na ndro kala nyaa,
na fooro lii na nyɛni,
na yafun chaa kre,
pra tuwi mbe ufun wre,
pe sisaa na.
25 Mblɛ pee wa,
kanyana nu kre,
ni nsra nyɛni mu pe ŋgaa?
A ni nsra fooro li
mu shiafɛɛnlɛ ŋgaa?
26 A nde na ni dankna,
na chichie sri,
fɔɔn mbe kɔɔ ta,
a na ni nyisee chaa,
mbe nya, wɔmu mbe nya.
27 Kanyana nu ni nyi,
nyjila kro nu,
ki tia ni lɛɛ n to ni nu.
28 Ni wejiŋge chinɛ mu wɔ kro,
nde yila ma ki ni sro,
A ni sɛ yire leele fnindoo,
na nyɛni na yafun chaa.
29 Pan ni nyɛni na tro,
na ŋmbokuŋmboe lɛ,
ndee na kuweele lɛ.
30 Wejiŋge wɛɛri ni na,
mu tia ni wɔ, mu foolo.
31 Fa kre mɛɛ tɛɛn ndaa ndru,
la, fuŋga rɛ, nyɛnɛɛ,
na fooro kee ni ndru.