Job Paaraa
29
Job na paara mna yo mbo,2 “Nyiɛpɔ nyjɛ yi tro kre la ni ta,
ŋgi na hin? Yire ble yire nu,
Nyiɛkpɔɔ yiɛ naa wa ni na.
3 A wra ni ŋga nyisee,
a ndaa nyaa ki na,
mna ja na nyaari,
wɔmu nu.
4 Yire ble yire nu,
ndaa nyanyjɛm lii,
a Nyiɛkpɔɔ na ni wru nunu,
mna ni katoo dwan.
5 Jaŋgafun wre naa wa ni jaara,
a ni biile na ni fɛ mu kun.
6 Kre nyjila kre, na ni nui,
na ni sikaala nɔnɔ bɔ ni na,
a ni olive simi naa fuu
yi tre dnɛ na,
na lafolo nyumu yi.
7 Kre nyjila kre, ndaa shie,
na jiin chia jlonwee nyu
na wa ka,
mi na chia loplombo ni.
8 Kre nyjila kre na
yirifumblɔ ni nya,
mbe pra ni kaan kolo.
Na ni paan mbe loplombo yiri,
mbe yire sholo.
9 Na ŋunu loplombo paara,
a ndaa paan mbe pe pieri,
mbe kɛnyi taa nyu na.
10 Hali na lekpɔɛ ni nya,
mbe pe nyu ku,
mbe pe paara mbe pra.
11 Kre nyjila kre ndro
ŋmba we ni kee loo,
mbe ni nya kro,
naa ni chichie yuu,
na ni kaan mɛɛ.
12 Ŋgi na hin?
Ndaa shianfɛɛnlɛ,
mblɛ pe nyɛni na yafun chaa,
pre shio na waa.
Na yaa bijile mblɛ praa,
ndro chaa,
mbe u ya pe na kre na.
13 Leele mblɛ pra da kumu kɛ
na pre naa ni kaan mɛɛ,
a ndaa tia lekuchiɛlɛ,
lɛɛ na nyjii pe na.
14 Chichie na kefrakaa,
pe na ni wejiyirɛ,
nyjɛ ni leni yi,
ndee ni dodoŋgi,
na ni nam ŋga ni poo yi.
15 Ndaa nyɔɔ fuunlo,
na finla na.
16 Shiafɛɛnlɛ lɛ na wi mi,
a ndaa fumblɔ kala lii,
na pe kaan.
17 Ndaa sisampefɛɛnlɛ
pre jaŋga shio pe kɛɛ,
mnaa mblɛ na praa jaŋga lii,
pre shio na waa.
18 Ndaa jawa na,
‘Ni ble nyjɛ mbe li we nɛɛ,
na tanyiɛ yi,
mbe ndaa ku mi titi nyuŋgo.
19 Pan ndaa nyi na tiŋge,
ŋga didinyi yi da nyumu na yi,
a mɛŋɛ na woni ndroo ki wrɛ
na nyjila kro nu.
20 Ndaa jawa na,
ni yɛnyiŋge kre we kro ma,
mbe ni faŋga wa na kɔ ni nu.’
21 Na ni paara,
leele naa ndie chaan,
na ndru ni pan,
mbe pieri komm,
mbra ni paaranyinaa sri.
22 A na ni paara a ni nyu to,
ndro wa paara na,
a ni kee naa lee pe ndie titi.
23 Ndro kro naa ni paaraa sri,
imi na falifun nyiɛ siri kre.
24 Na leele pre
kaanhaa kɔ kre,
ndaa tɛɛ na pe nyina,
mbe ki pe le gbeŋmbaa.
25 Mi ndaa paara na pe nyina,
kolo ŋga na pie tro.
Ndaa pe pe pan na,
ŋunuu wa u wifɛɛnlɛ yiɛ,
na pe bre pe nyɛni nyjila.