Job Paara Tɛ
28
Swafiŋge tuu haa wa ki yɛ,a lawee ŋga nu pe,
swanyiɛ jee wa ki yɛ.
2 Tra pe tɔɔnrɔ tru,
la, yaawa rɛ, dnɛ pe,
nyani na ki woni.
3 Yire yirɛ nyjɛ krɛrɛ,
swa tuufɛɛnlɛ kaniɛ wru,
mbe sɛ le wɔmu kprikpri
nu tra, mbe sɛ yi haa cha.
4 Pie sɛ haalee,
mna leele n wa,
ndee lawee ŋga nu lewo,
jele n da mu taan tun nu.
Mbe sɛ wee jujuom ŋga nu,
pie yi ta mbe wɔ,
mbe pɔ maŋa na,
mbe tii ki nu.
5 Tra ŋga na pe sro fali,
kre chɔɔ,
ki tapan pie sɛ le,
mbe kanhun gbɛɛri dnɛ na,
mbe ki juari,
6 mbe dnɛ chiɛnri wee,
nyjɛ pe yeeri sapphire wɔ,
mbe swanyiɛ wɔ yi bloŋgo nu.
7 Wee ŋga nu swa tuufɛɛnlɛ,
lee kre, hanyini sisaa,
ndee nyuu wa n wa,
mu da mu ka lam nya.
8 A jira, ndee nyaalam yurɔ,
wa n da, mu tro wa tun.
9 Lewo we kɛ tɛɛ,
mbe dnɛ shelee juari,
mbe sɛ le nyuɛ nɔɔ na.
10 Mbe ja mbe tro dnɛ ndoolo,
mbe sɛ dnɛ chichiele nya,
mbe yoori.
11 Pie sɛ lɔɛ ndrɛ tuulo,
mbe yirɛ nyjɛ yi ndra wa,
kro wɔ mbe yili fimi na.
12 La, sena mu tro,
mbe kachindɛ nya hin?
A lawee ŋgi nu,
nɔɔloo nyi hin?
13 Lewo wa jaa,
kachindɛ damu chin,
a wa jaa ki cha tra ŋga nu.
14 Epo latɛɛ yo mbo,
‘Ki n wa mi nu.’
15 Ma ja mbe swafiŋge,
ndee swanyiɛ titi tɛɛ mbe ki lɔ.
16 Kre swanyiɛ titi,
ndee dnɛ chichie titi n wa,
mbe jaa ki lɔ.
17 A ma jaa swanyiɛ,
ndee dnɛ chichie,
ŋga pe yeeri crystal kre,
wru mbe gbun ki na.
18 Hali dnɛ chichiele nyjɛ,
pe yeeri coral na jasper,
na ruby yire, yi ndrɔ n sheli,
mu da na kachindɛ ni.
19 Ma jaa Ethiopia dnɛ chichie,
titi ŋga pe yeeri,
topaz kre wru,
mbe gbun kachindɛ na,
a swanyiɛ titi wa jaa ki lɔ.
20 A na pan yi, kena sena
kachindɛ yiri kuraa wo?
A lawee ŋgi nu,
nɔɔloo nyi hin?
21 Pe kachindɛ ndra,
yira ŋga kii ŋmaa ni kro na,
hali pe ki ndra,
hanyiɛlɛ mblɛ pe tro,
nyjeeri ŋga kro na.
22 Hali dɔɔya, na kumu kee
ŋga pe yuu yi mbo,
‘Ki kee pe yo a wre loo ndie ni,
o n da mu ki nya tun.’
23 Nyiɛkpɔɔ chiin u ki kolo chin,
a wre chiin u chin,
lawee ŋga nu ki nyi.
24 Ŋgi na hin? Wre u yirɛ,
kro nyaa lawee kro nu.
25 Wre u fuflɛ ŋga jaŋga,
mna epo damu nyina,
26 wre u nyiɛ paan nyina,
na nyiɛtwanraa nyina,
mna kie na tro.
27 Wre wra kachindɛ le,
mna nya na ki kee shian,
a wra ki pe mu le,
mna nya na ki nyu.
28 Bawa wra yo lewo pan mbo,
‘Nyiɛkpɔɔ fiɛrɛ ki paan,
na kachindɛ ni,
a na mu sisam pee fun,
kre mu nɔɔloo taa.’”