Job Na Paara Na
27
Job na paara na mbo,2 “Ŋga Nyiɛkpɔɔ wree wa na le,
a u n ni kala yo mu ni ŋga,
mu tia ndaa kala nyaa ŋga,
3 a nii wa ŋmaa ni,
a u ŋumu wa ni nu,
ndaa ŋuni ŋga,
4 mba nyu nyaa,
mbe kefɔɔn ka yo,
ndee mbe ti mbe,
kafinɛ kee ka yili ni nyuu.
5 Mba kee nyjɛ e yuu yire
shɔ mbe li na yi pe kpra fio,
hali mbe sɛ su ni kumu ble,
ŋgi na hin?
Ni chin na ni fraka.
6 A mba laa ni frakaa kro,
a mba ki wa fio,
ŋga ni tro ŋga,
ni jawala n na ni gbuun,
na pimi ni kee ka na.
7 Nyiɛkpɔɔ ni tali,
mbe ni loŋgoolo kala nya,
na sisampefɛɛnlɛ pre lɛ.
Mbe mblɛ pe yiri mu ni taan
pre ndie tiniɛ ta,
na mblɛ pe n fraka pre lɛ.
8 Ŋgi na hin?
Na Nyiɛkpɔɔ lewo ŋmba,
u n u chin wre chieri mu wa,
mu u ŋmaa shɔ u pan,
dankna ŋgi kii wa,
u pan na hin?
9 A na kala kpɔɔ ka u da,
a wra nyɛni,
Nyiɛkpɔɔ wa loo u pan.
10 A we yɛshɔɔrɔ ta,
Nyiɛkpɔɔ nu,
mbe kro mbra u tali chɔɔ?
11 Fuŋga mbe e nyina,
imi na Nyiɛkpɔɔ wre jaŋga da,
a mba Jaŋgafun wre,
kolo ndra e na.
12 Yire titi u jaŋga kre nya,
kena yira ŋgi ki tia,
e na kewɛɛ nyjɛ yuu ŋga hin?
13 Kolo ŋga na Nyiɛkpɔɔ,
we tro na sisampefun ni,
kre mbe e nyina kre.
14 Imi na u biile nɛɛ mu da kpan,
brɔfiɛŋunu nyu na pie ku,
a pia sro ta mbe li mbe yɔɔ.
15 A pe mblɛ pie kro pre,
yira sisaa kie le pe nu,
mbe pe gbo,
a pe lekuchiɛlɛ,
wa jaa pe nyɛni.
16 Hali na u swafiŋge fa
mu ble na tablɔ yi,
ndee mu wejiyirɛ ta,
nɛɛrɛ kuraa kre,
17 yirɛ nyjɛ u ta mu tɛɛ yire kro,
Nyiɛkpɔɔ leele pie yi ta,
mbe le, mbe kprafɛɛnlɛ
u swafiŋge kre ta,
mbe yɔɔlɛ mbe wru.
18 Sisampefun katoo ŋga u sin,
mu tni kre we pe na,
sepe vavaara yi.
Pan kie pe na lawee shiefun,
pata ŋga u sin na jiin yi.
19 Na mu u snihaa nya,
swafun wi.
La, kia mu, mbe kre lawee,
kre yili u kɛɛ,
wre naa yo we ŋunu,
mbe nyi kre,
na u yi cha mu la.
20 Fiɛrɛ kpɔɔ we u yii,
mbe u pe na nyumu ki u wru.
Nyiɛ fuflɛ we pan,
mbe u wru blee mbe sɛ.
21 Fuflɛ ŋga ki wɛɛri,
mu yiri yilafinhaa,
we paan u wru mbe sɛ,
na u ni mbe pe u chaa la.
22 We na chaa mbe fɛ,
mbe shɔ ki kɛɛ,
kie u wru jaŋga na,
kia u fooro le.
23 Fuflɛ kre kuraa yiɛ we shɔ,
na ki u wru jaŋga ni,
mu yili u tnihaa.