Job Na Bildad Nyu Wɔ
26
A Job na kna mbo,2 “Mu chaa mbe ya,
fɔɔnrɔfɛɛnlɛ na,
a mi wi ŋmba ni kɛnyi gblɛ,
kena kolo ŋgi na,
mu ni shɔ hin?
3 Mi wi ŋmba, ni n kala chin,
a mu paara,
mu ni nyina kpɔɔ,
mu tia ni chin,
na jawalafun wi ŋu.
4 Kena ŋmbi u tia mna yire,
kee nyjɛ yuu ŋga hin?
A ŋmbi jaŋga ni yire kee,
nyjɛ yilii mu nyuu hin?
5 Leele mblɛ pe ku, mu wa
kuulo ndoo epo tapan,
pre kro pe jawala,
pe tɔɔra kpɔɔ.
6 Kuulo ndoo,
ŋga nu pe leele klai kre,
yaka wa jaa ki tɔ,
mbe Nyiɛkpɔɔ wa ki nya.
7 Nyiɛkpɔɔ u nyjeeri na tra nyaa,
mu chan,
a yira pɛli,
a yi n gbun yaka na.
8 Wre u tloe tɛɛ mu nyumu fo,
a ki snam wa jaa yi vru.
9 Wre u tia tloe na paan,
na yeŋge toni.
10 Wre u sam gbun nyisee,
na wɔmu pan epo yiɛ na.
11 Wre u paara mbe pilɛɛsi,
nyjɛ yi nyjeeri yii yire,
na fiɛ mbra seeri.
12 Wre wra u jaŋga tɛɛ,
mu epo nyu yii,
a kra ku dimm.
Wre wra yire u kachindɛ na,
mna Rahab ŋmba wi,
epo yurɔ kpɔɔ wre,
pile bujibuji.
13 Na Nyiɛkpɔɔ ŋu,
mbe ki ti mbe nyjeeri chiɛnri,
a u jaŋga ni u tɛɛ,
mu epo wɔɔ sisaa wre gbo.
14 Yire kee nyjɛ krɛrɛ,
Nyiɛkpɔɔ kee,
nyjɛ u pini yire chiɛri yi,
a yi chiɛri yɛ u ju,
mu yo o pan.
Ŋmbi we ja mbe u jaŋga kpɔɔ,
kre nɔɔ loo hin?”