Job Paara Tɛ
24
Ŋgi ki tia,Nyiɛkpɔɔ Jaŋgafun wre,
a u n ble wɔ mu tɛɛ,
na kpra kuun ŋga hin?
A mblɛ pe u chin kre na,
kre ble ŋga sri,
na prai ŋga hin?
2 Leele dnɛ nyjɛ ni pe tɛɛ,
mu sam gbun yire klɔ,
yi titɛɛ mbe tra ta kpɔɔ,
pe shie na mbaala
mblɛ pe ju ni,
pra shie na kaa wa.
3 Pe bijile bubunlɔ juu pe pan,
na lekuchiɛlɛ nablɛm,
mblɛ pe san, mu pe tle,
pe pan kre shio pe pan.
4 Pe pɔlɛfɛɛnlɛ ŋunɔi jaŋga na,
mbe laa kolo ŋga pe yii na,
mu na shianfɛɛnlɛ nini,
pe trɛ nu jaŋga na,
mbe pe fɛ mbe sɛ ndra.
5 Pan shianfɛɛnlɛ pre,
kila na tro,
na nyaalam bubunlɔ,
mblɛ pee wa tablɔ tra nu pre lɛ,
mbra sro chaa,
mbe pre na pe biile li.
6 Seele nyjɛ yi n pe pe wee nu,
pe shie na sro chaa,
na pe yurɛ kaan,
na shie na tre sɛnyi yaai,
sisampefɛɛnlɛ seele nu.
7 Yonyi n wa pe pan,
ki tia wejiwaara pe sni,
weere nyjila pia yaka ta,
mbe tɔ.
8 Na nyiɛ paan nyambie yire na,
kie pe nyiŋge poŋgo,
mbe pe sɛ le dnɛ weele nu,
na pe n lawee ta,
mbe ndra le.
9 Sisampefɛɛnlɛ pre shie,
mbe sɛ shianfun bifiun,
tini jaŋga na,
mbe laa nyinimi na,
mbe sɛ u tɛɛ fɔlɔ nyu na.
10 Shianfɛɛnlɛ pre n yonyi ni,
ki tia wejiwaara pe tro.
Pie na yua kuun,
a nde klo pie na sni.
11 Pie olive tre mbe yi simi wɔ,
mbe yua fɛɛri mbe yi tɛɛ,
mbe simi gbɔwo pe,
la, pre titi, gbɔɔ klo pe sni.
12 Na mu le kakpɔɛ yire na,
mu leele mblɛ pe kuu,
kre jiɛn loo.
A mblɛ pe gbun mu pra,
pre na nyɛni,
na yafɛɛnlɛ chaa.
A nde Nyiɛkpɔɔ wa,
sisampefɛɛnlɛ pre wa yii
u sisam na.
13 Pe plɛɛ wa mu yiri,
mu Nyiɛkpɔɔ chiŋgɛ kre je,
mu u kolo wa,
a pia tro u lawee.
14 Na ble wɔ,
mbe linkufun yili fimi na,
mbra shianfɛɛnlɛ,
na pɔlɛfɛɛnlɛ kuu,
a na ble wɔ kre,
pe ndrai na shie na juu.
15 Na chachaa tni,
ndram u chaa mbe ki hulo,
mbe u yiɛ ndra wɔmu nu,
mbra yuu na,
‘Ndro wa ni nya.’
16 Na ble wɔ, kre jiolo lee,
kalonyi nu na juu,
na nyiŋge se,
mbe pe le pe nyinyi nu,
mbe krɔ tɔ peyɛ na.
Ŋgi na hin?
Pe n na nyisee chaa,
mbe yaka pe.
17 Wɔmu kprikpri pe pe pan,
na nyisee yi,
a nyisee pe pe pan,
na wɔmu kprikpri yi,
fiɛrɛ yirɛ nyjɛ yii wa wɔmu nu,
yire pe wru nɔɔlɔ.
18 A nde pan pe nyi,
na tafɔkɔ yi nyumu yiɛ na,
Nyiɛkpɔɔ pe tra kre sun,
ki tia ndro wa jaa sɛ,
pe tre seele nu.
19 Imi na bɔbɔnlɛ woni,
mbe nya,
yila wrɛm nyjila,
mbe pe ki cha mbe la kre,
pan kuulo ndoo sisampefɛɛnlɛ,
shio jaŋga na.
20 Lɛɛ ŋga nu pe yili kre,
we pe fɛɛ,
mbe pe kaari dɔmblɔ sro.
Ndro na sisampefun sɔɔnri,
la, pe kuari mbe wo na tiŋge yi.
21 Sisampefɛɛnlɛ pre,
gbendee, na chiɛlɛ,
mblɛ pan biile n wa,
pre pe dnumu na lii.
A pra lekuchiɛlɛ fooro chin.
22 Nyiɛkpɔɔ u u faŋga teeri na,
jaŋgafɛɛnlɛ tinii mbe sɛ pe kla,
kii wa na pe jaŋga li mu mu,
a nde kaanhaa ka n wa,
pe pan.
23 Nyiɛkpɔɔ we ti mbe pe wuu,
mbra jawa na,
yaka wa jaa pe ta.
La, u yiɛ wa pe na,
nyjila kro nu.
24 Pie u kpɔɔ fuŋgaami,
maa to na pe u cha mu la,
pie u tre tra, mbe u wru,
mbe sɛ u le faŋga,
imi na pe ndro kro pini kre.
Pan we pe na pe
shɔlɔ zezee chieri mu wa.
25 Na pan ma kre kee ŋga nyi,
kena ŋmbi we jaa yo na,
kala ni fnɛ hin?
ndee mbe ni nyina na kee,
ŋga ni yuu kre n pe kpra hin?”