Job Na Eliphaz Nyu Wɔ
23
A Job na kna mna Eliphaz nyu wɔ mbo,2 “Aŋga ni taanraa we nɛɛ.
Ŋgi na hin?
Nyiɛkpɔɔ ndra shelee li ni na,
a ndaa kala nyaa.
3 Na kra pe na mbe na u nya,
mbra jaa sɛ mna u nyi kre,
4 mbe na sɛ yire u yiɛ,
mbra ni kala yo,
mbe na ni kee kro yo u pan.
5 Mbra loo kee ŋga,
we na yo ni pan.
6 We na pnaŋa ni
na jaŋga na ree? Ɔɔhɔn.
We na ndie tɛɛ ni pan.
7 Kie na ti mbe ndro,
ŋmba u fraka kre,
na kolo ta mbra u kee kro,
yo u pan,
mbe kra ti mbe ndaa shɔ,
ni kpra kunfun wre kɛɛ.
8 A kree ŋga, na ni sɛ
yilafinhaa o, u n wa wa,
a na ni sɛ yila tohaa o,
mba u nya wa.
9 Na u sɛ nyjeeri,
ndee tapan haa wa,
mu sɛ na tnumu tuni,
a ni sɛ wa mba u nya.
10 La, ŋga ni pini kro u ki chin,
na u ni pe mu le,
mbe yili chasi,
na swanyiɛ yi.
11 U dumble na ni taa,
mba chiɛn mbe tro kokoo na.
12 A ni n laa u nyu kee kro tun,
ni u kee nyjɛ u ni nyina,
yire yii mu le lɛɛ,
mu wɛ ni blenyini sro na.
13 Wre chiin wi Nyiɛkpɔɔ,
ŋmbi we jaa u nyu kaanri hin?
Ŋga ki tna u pan u pini.
14 Kee ŋga u jawa na ni ni,
kre we pe,
yire kee yire tataara wa,
a u yi jawa mu tɛɛ.
15 Ki tia na ni yire kee yire jawa,
a ndaa u fiɛ, na seeri u yiɛ.
16 Nyiɛkpɔɔ wre tia,
ni gbun yɔ ni na,
Jaŋgafun wre tia fiɛrɛ ni yii.
17 A nde wɔmu kprikpri,
ŋga ni u ni yiɛ juule kre,
wa ti mbe ni pieri,
mbe mba paara.