Job Na Zophar Nyu Wɔ
21
A Job na Zophar nyu wɔ mbo,2 “Na e chaa mbe ni bre,
kena e ndie tɛɛ e loo ni pan.
3 E frɔ ta mbe ni paara,
na ni waa paara mu kɔ,
na e chaa mbe e na ni piin,
mbra tɛɛ.
4 Mi na lewo ma o ta,
kre ki tia mba jaa frɔ ta kre.
5 Na e ni nya,
ki fna mbe e fo,
mbe e kɛ taa nyu na,
mbra ni le.
6 Na ni kee nyjɛ yi ni da yire le,
ki weere wo ni na,
a ndaa seeri.
7 Yira ŋgi ki tia,
sisampefɛɛnlɛ na ŋmaa lii,
mbra mɔɔ pe tnimu nu,
mbra jaŋga taa ŋga wo?
8 Pe biile we yiri,
mbe lawee ta mbe tni,
a pie pe nanae nya nyini ni.
9 Yaka na pe ta pe kalonyi nu,
a fiɛrɛ kee ka na pe da,
a Nyiɛkpɔɔ na pe ndie tini,
kee ka na.
10 Pe nablɛm ja na ndru,
a pe naloolo na sii,
pra lɛɛ wɔ.
11 Mbe pe biile fiɛnfiɛn,
na yeni mbra yoo mbra tro
na yurɛ biile lɛ.
12 Mbe pra juru,
na yambrawa nyaara,
mbra mɛɛ koni,
mbra bnɔɛ foo,
mbra yɛshɔɔrɔ lii.
13 Yɛlɛ nyjɛ pie li kro,
yɛshɔɔrɔ nu pe nyi,
mbe sɛ su na,
pie ku wejinyiŋge nu.
14 A nde pe je na yuu,
Nyiɛkpɔɔ pan na, ‘Laa o na,
o n na mu kolo ka haa chaa,
mbe chin.
15 Nyiɛkpɔɔ Jaŋgafun,
wre wi ŋmbi,
mbe o u sumi hin?
Na o u tali,
ŋgi oo ta u pan hin?’
16 La, pre titi nyumu n wa,
pre titi kɛɛ.
Ki tia ni kee ka ma,
na pe sisam jawala,
nyjɛ pe kaan yire ni.
17 Gbee mni Nyiɛkpɔɔ,
sisampefun kania foo,
na fri wo?
A gbee mni u tia katala kee,
na u dani hin?
Kena u krɔ kuun,
na sisampefun ni ŋgaa?
18 Gbee mni u pe foo na woni,
imi na fuflɛ kpɔɔ lee
yua kpakpɛɛ nu,
mbe yi wru kre.
Ndee mbe pe pe imi na,
fuflɛ yirɛ fue pini kre hin?
19 Pe ki yuu mbo, ‘Nyiɛkpɔɔ,
lewo sisam ŋga u pe,
teeri na u biile ndie tinii?’
Ki fna mbe u sisampefun,
wre titi ndie tini,
mbe wre titi ki nya.
20 Ki fna mbe sisampefun,
wre titi u klaa nya na nyini ni,
mbe Nyiɛkpɔɔ Jaŋgafun wre,
krɔ kuɔn kre naa mbe le.
21 A na ki pan na nyiɛpɔ,
nyjɛ pe kun mu tɛɛ,
u pan yire nyu to,
a wra shie, u kee ka ma,
na u biile mblɛ u ti kro ni.
22 Ŋmbi we jaa Nyiɛkpɔɔ,
ŋga jawala hin?
Wre u lekpɔɛ kro kpra kuun.
23-24 Wre u tia wa na uyɛ taa,
mbe faŋga ta,
mbe sɛ su u kum ble,
mbe ku wejinyiŋge nu.
25 A wre u tia wa na lee,
kanyana sisaa nu,
hali wa tnamu ka ta mbe li fio.
26 La kumu nunu pe kro we ku,
mbe sni bloŋgo nu,
a dɔmblɔ we pe kro ka.
27 Ni chin na jawala e wrui ni na,
mbe ni taa mbe ni pe sisaa.
28 E na wie na,
‘Sena lekpɔɔ wre katoo,
ŋga nu sisampefɛɛnlɛ pre,
na nyi kre nyi hin?’
29 Leele mblɛ pe kolo kuun kre,
e n pe wie kee ka tun ra?
A kee nyjɛ pe yuu e pan kre,
mni e yi jawa hin?
30 Pe yuu na,
na Nyiɛkpɔɔ krɔ kun,
a u tia kee sisaa ka pe kre,
kra sisampefun nya.
31 Ndro na sisampefun kepele,
ŋga u pe yo u pan,
ndee mbe kee ŋga u pe,
kre ka pe u na mbe fɔlɔ tɔ.
32 A na u ku, a pe sɛ u le,
mbe pe ndro tɛɛ,
wra u faŋga sri.
33 Tra ŋga nu pe shie,
mbe sɛ u le kre tna u pan,
mbe lenɛɛrɛ taa u na,
mbe plɛ yiɛklu u pan.
34 Kena mni ee pe,
mbe jaa kewɛɛ nyjɛ e yuu,
nyjɛ tɛɛ mbe ni bre hin?
Kee nyjɛ e yuu,
yire kro pe kafinɛ kee.”