Zophar Paaraa
20
A Zophar Naamah ndro wre na kna mbo,2 “Job, mu kee yire mu yuu,
yire ni jawala tɔɔra,
ki tia mbe paara.
3 Mu paara mu ni taan,
mu n ni ŋga buuro,
a ni jawala ni pe na,
ni mu nyu wɔ.
4 Kpra na, mu chin na,
mu yire yirɛ kro wa nyjila,
ŋga Nyiɛkpɔɔ,
na Adam wa tra ŋga na,
5 kre sisampefun n wa,
mu yɛshɔɔrɔ li mu sɛ yiɛ,
pan leele mblɛ pe n,
Nyiɛkpɔɔ chin pre,
yɛshɔɔrɔ nyi fiɛn imi.
6 Uyɛ kpɔɔrɔm tia u gede
uyɛ pan mu sɛ nyiɛ na,
hali a u ndra sɛ su tloe na.
7 We ku mbe fun,
na fuflɛ bloŋgo wru,
mbe mblɛ pe u chin,
pre na wie mbo,
‘A sena u sɛ hin?’
8 Pan we pe na ŋunɛ,
nyjɛ lewo ŋunu,
mbe yi fun u ndra,
a wa yi sɔɔnri na yi,
ndee na lewo yirɛ nya nyiɛlɛ,
na ndroo mbe ndruu yi chaa la.
9 Nyini ŋga kra u nya kre,
wa u nya na,
pia u nya lawee ŋga nu,
wra nyi kre nu na.
10 Shianfɛɛnlɛ mblɛ yirɛ,
wra shɔ pe pan kre,
u biile fna mbe yi fɔlɔ tɔ,
mbe pe ŋga.
11 U yirifum nyjila faŋga,
ŋga kii wa u nu kre,
we ku na ki ni,
mbe sni bloŋgo nu.
12 Kii wa na sisamu pee tna,
u pan na yira taan u le nyuu,
mbe ki ndra u ndile tapan,
mbra ki tɛɛnrɛ juru.
13 Wa jaa ki wɔ mbe wa,
kena na ki pan ma,
u nyuu wa we ki ti.
14 La, na u li kie sro u lɛɛ,
kie pe na wɔɔ sisaa tuwe,
ŋga u nu kre yi.
15 Sisampefun we yɛtaara yirɛ,
nyjɛ u jɔli yire we yi hlu
mbe wo,
Nyiɛkpɔɔ we ti
u yi tuuru.
16 Kie pe na wɔɔ sisaa nyumu yi,
mbe tii u nu.
Wɔɔ sisaa wre ŋgaala,
we kro u nu mbe u gbo.
17 A lɔɔ ŋga nu nyumu taan,
yilii na paan kre,
wa ki nyumu ta mbe gbɔ.
18 A yirɛ nyjɛ u fna mu ta yire,
wa yi ka ta mbe li,
yie yili u kɛɛ.
Wa yirɛ nyjɛ u ta yire,
ka tnu li.
19 Ŋgi na hin? Wra shiafɛɛnlɛ
fiŋge mna pe ti waara,
mna nyinyi nyjɛ,
wre titi nsraa sin,
shɔ jaŋga na leele pan.
20 Kpra yi na wa jaa frɔ,
u niŋge yira na,
a u jajaara kre tia,
yaka na u da.
21 Na ki pan na yaka n kro,
mbe u ta mbe ka na kre,
kena u yɛtaara yirɛ kro nyu to.
22 Yirɛ nyjɛ yii wa u pan,
tataara yire na ki kɛ ni,
fooro lie we wɛ u na,
mbe u wejiŋge u yii kpɔɔ.
23 Na u yira ŋga u chaa ta,
mu ka mu yɔɔ kre,
kre nyjila kre Nyiɛkpɔɔ,
we u krɔ kuɔn kpɔɔ kre tɛɛ,
mbe u ndie tini.
24 We yo we fɛ mbe shɔ,
tɔɔnrɔ snimi kɛɛ,
mbe sɛ to snimi ŋga,
pe swafre tɛɛ mu pe nyu na.
25 Na u yo we ki tini,
mbe foli u wejikaara nu,
mbe ki nyu chɔmm,
ŋga ki chiɛnri kre u ndɛlɛ tini,
mbe ki ti fiɛrɛ kpɔɔ u yii.
26 Yirɛ chichiele,
nyjɛ u cha mu tɛɛ kro,
ndramwɔɔ kprikpri,
we yi shɔ u kɛɛ,
kanhun ŋga yirihaa pe n chin,
we le u nu,
mbe yirɛ nyjɛ yi kro,
u katoo kre sro peii.
27 Nyjeeri we u sisam wɔ,
fimi na,
mbe tra yiri mbe u taan.
28 Nyiɛkpɔɔ krɔ kun ble kre,
nyumu we pan,
mbe u katoo yirɛ kro fo,
mbe sɛ.
29 Kre kolo ŋga Nyiɛkpɔɔ jawa,
mu tɛɛ sisampefun pan,
a u kɔlɔ yi kre.”