Job Na Bildad Nyu Wɔ
19
A Job na Bildad nyu wɔ mbo,2 “Ŋgi ble kee nyjɛ ni e ni tɔɔra,
nyjɛ nyu we to wo?
Ee ni gbo na paaraa ni.
3 Gbee mni yi ŋga,
na pan e ni tɛɛlɛ,
a nyifɛɛrɛ n na e kuun,
kefuɛn yoo na.
4 Na yɛŋgɛ yi kuraa,
na ni fun kolo na kre,
mi chiin na ni punɔɔ kre,
keshian nyi,
yire wo yi ŋgi hin?
5 E eyɛ kpɔɔri ni na,
mu yila ni kanyana kre na,
na paara na ni taanla.
6 La, e jawa e chin na,
Nyiɛkpɔɔ u punu ni na,
mu u asau wa,
mu ni fɛ mu kun.
7 Kii wa na ni nyɛni,
na pe ni pe sisaa,
a nde ndro n shɔ ni pan,
ni nyɛni na shɔfun chaa,
a wa n wa mbe ni,
kala yo mbe ni ŋga.
8 Nyiɛkpɔɔ ni tɔ kolo,
a ni trohaa cha mu la,
u tia wɔmu ni trohaa tɔ.
9 U ni buuro kro shɔ ni pan,
mu ni ŋujuulee laa ni ndra na.
10 U ni tini mu wla,
mu ni viŋge mu wa,
u ni kɔ mu wa na tiŋge yi,
a ni ku,
a ni dankna kro kɔ.
11 U krɔ kun na ni ni kpɔɔ,
a u ni tɔɔnri mu chaa,
u loŋgoolo nu.
12 U tia u ŋunɔwifɛɛnlɛ pan,
na wii na ni ni,
pe pan mu ni katoo fɛ mu kun,
mu yirɛ tle tle,
mbe nduu mbe le ni kro.
13 U tia ni leele kro ni je,
a ni nɔɔlɔ kro fɛ mu laa ni na.
14 Ni nyimi leele kro fɛ mu ni ti,
a ni nɔɔlɔ kro ni kee fɛɛ.
15 Fumblɔ mblɛ praa lee ni pan,
na chiɛlɛ mblɛ praa ni sumi,
pre ni le na fuŋu wi mi,
pe ni le kuraa na waŋgra,
ka nu ni yiri.
16 Na ni nyu nyaa,
mu ni sumifun yeeri kuraa,
wa pan,
hali mbe u tali mbe pra,
mbe u je.
17 Na ni ŋu a ki wo,
ni chɔ na kuraa,
ki ndio u pan,
ni lo na ni lɛbiile kro,
yiɛ woni ni na.
18 Hali biile fiɛnfiɛn kuraa,
yiɛ woni ni na,
na pe ni nya,
mbe praa ni piin mbra tɛɛ.
19 Ni nɔɔlɔ mblɛ mi na pre,
naa mbra kro,
ni pe na afuŋgo,
yira yi pe pan,
mblɛ ndaa kori,
pre kro yiri
mu ni taan.
20 Fuŋgaami,
ni wejikaara kɔ ni na,
a ni kro kajle bribri,
ni ŋgatre chiin yi kro,
ndaa tro.
21 Jande, e ni fooro le,
ni nɔɔlɔ, e ni fooro le,
Nyiɛkpɔɔ ni le nyibie.
22 Yire we ndru mbra ni nini,
na Nyiɛkpɔɔ wi naa?
Kena e n fna,
ni tɔɔraa na ma tun ra?
23 Oh, na kra pe na,
ndro naa ni kee nyjɛ ndru,
mbra yi nyunɔ,
yurɔ hlɛ na mbra tɛɛ,
24 ndee mbe pra yira kaanri,
tɔɔnrɔ ni prim na,
ndee mbra yi kaanri,
dnɛ ka na,
mbe yira kro wa nyjila kro nu.
25 Ni chin na ni shɔfun wre wa,
na le,
a waŋgra nyukɔɔrɔ ble kre,
we jele kan tra ŋga na.
26 Hali na ni wejikaara ŋga kla,
mbe nyi, mbe Nyiɛkpɔɔ nya.
27 Mi titi we u nya na nyini ni,
ndro ma we u nya,
mbe yo ni pan.
Kre ble kre,
la ni ta ti ti.
28 E yuu na yire ma na nini,
mbo, ‘mi wi na niyɛ ni.’
29 Yire titi e brɔfiɛŋunu kre fiɛ,
ŋgi na hin? Nyiɛkpɔɔ krɔkuɔn,
ki paan na brɔfiɛŋunu kre ni,
mbe leele ndie tini,
a ee chin na Nyiɛkpɔɔ,
kpra kunfun wre wa.”