Bildad Paara Shiinwo
18
A Bildad Shuah ndro wre na kna mbo,2 “Job, Nyjila ŋgi nu mu paaraa,
ŋga nyu we to wo?
Kala chin, mu o ŋga kolo,
mbe o ka paara na.
3 Mni a mna o jawa na,
nui lɛ wre ŋga hin?
Mu o le na jijiele lɛ wre.
4 Ŋu titi mu muyɛ krɔ kuun,
kena ŋu ndra na,
leele we yila mbe yili,
tra ŋga nu ree?
Ndee Nyiɛkpɔɔ u yila,
mu krɔ kre na,
mbe nyuɛ klɔ yi titɛɛ ra?
5 Pie sisampefun kania fɔ
mbe fii mbe kia nyi na.
6 U kania we fii,
mbe u nyuŋgo lam wɔ,
kania ŋga u jaara kre we fii.
7 Na ki pan ma,
faŋga ŋga ni u nyaari kre,
ka we kun ki na.
Mbe u jawala kee,
na u ŋunɔ mbra chaan.
8 We nyaari mbe sɛ to pɛlɛ nu,
mbe ki u yii jele na.
9 Mbe pɛlɛ u yii gbamgbam,
u yeŋmbele na wa jaa yili.
10 Pe maŋa pɛlɛ pɛɛri u na,
mu ki ndra tra,
mu pɛlɛ titi le u trohaa.
11 Mna we tro kpan,
fiɛrɛ wa mu taa u kro,
na u dumble tɔɔnri.
12 Kanyana tni mu nyu nyaa,
na u sri,
a katala kiyɛ kna mu na u sri,
mbe u wɔ mbe to.
13 A yira sisaa we u,
wejikaara tɔ poŋgo,
mbe ti u kɛnyi,
na u jeelee fɔɔn.
14 Pie u tini mbe wɔ u katoo,
ŋga nu u yo yaka
waa jaa u tɔɔra kre nu,
mbe u ŋunɔ mbe u sɛ,
fiɛrɛ kumu ku.
15 Kanhun we pan mbe u katoo,
na yirɛ nyjɛ yii wa ki nu,
kro sro mbe yi kaari tɔɔnrɔ.
16 We pe na tiŋge,
ŋga didinyi yi ku,
a ki wrɛ yua ki na yi.
17 Na ki pan ma,
ndro wa u kee sɔɔnri,
tra ŋga nu na fio,
a u mɛɛ we fun waŋgra nu.
18 Pie u ni mbe yili nyisee nu,
mbe sɛ na u ni wɔmu nu
pie u wɔ kuraa,
waŋgra ŋga nu.
19 Wa biile,
ndee nanae ta u leele nu,
a lawee ŋga nu wra tni fa kre,
u sele ndro wa kro ki nu.
20 Leele mblɛ pee wa,
yila fin haa,
na yila to haa wa kre kro,
na pe u kee kre loo kre,
weere kpɔɔ we wo pe na.
21 Yɛŋgɛ na, lewo ŋmba,
u sisam pini kre,
pan u tni haa nyi,
na lewo ŋmba,
u n Nyiɛkpɔɔ chin,
lawee ŋga nu we tni yi.”