17
Ni dankna kɔ,a ni nyjila da,
ni n na yaka sri na,
na ŋga mbe sɛ kuulo bɔkɔ,
2 Leele mblɛ pe ni piin,
na tɛɛ kre, pe krɔ tɛɛ,
mu ni fɛ mu kun.
3 Nyiɛkpɔɔ, na mu n ya ni na,
ŋmbi we yire mbe ni shɔ,
mbe wa hin?
4 Ŋu mu ni nɔɔlɔ pre jawala tɔ,
a ki tia pe n na kala nɔɔ ndru,
kena maa ti
mbe pe yiɛshɔ na pe ni ja.
5 Na ndro yila tnu ŋga we ta na,
mu u nunu wɔ mu ŋga kre,
u biile pie ki kanyana nya.
6 Nyiɛkpɔɔ, ŋu mu tia leele kro,
kee ta na yuu ni na,
na tɛɛnrɛ hlu,
na woni ni yiɛ na.
7 Fooro tia ni nyɛni chiin,
a ni nyiɛlɛ n na nyaa chiriri na,
a ni sɛ pe na yira ndile yi.
8 Leele mblɛ pe fraka pre,
ni nya a ki pe fo,
a pra yuu na ni n Nyiɛkpɔɔ,
chin kre ki tia.
9 Lewo ŋmba u chin,
na u fraka kre wa laa,
ŋga u yii na,
faŋga we ta mbe ya.
10 La, na pe kro pan,
mu yire ni yiɛ fuŋgaami,
mba kachiŋu nunu
chom kuraa nya pe nu.
11 Ni ble nyjɛ mbe li,
tra mna kro kɔ,
a ni jawala na ni lɛɛ kee kro,
fun ni nu.
12 Ni nɔɔlɔ pre blee,
kaari nyisee,
a na ble wɔ,
mbe praa yuu mbo,
‘Nyisee mbra mna.’
13 Ni dankna kro wa,
kuulo ndoo,
na mbe sɛ ni dɛŋglɛ chan,
ndramwɔɔ nu mbe sni wa.
14 A na mbe faŋga lam yeeri,
‘Ni lɛ.’
Mbe dɔŋgɔ yeeri,
‘Maa,’ ndee ‘Ni jaa,’ kre,
15 kena sena ni kaanhaa,
nyi na hin?
A ŋmbi we nya na kaanhaa,
wa ni pan hin?
16 A na ni shie kuulo ndoo,
dankna wa taa ni kro,
mbe o sɛ.”