Eliphaz Paaraa Shiinwo
15
A Teman ndro Eliphaz wre na kna mbo,2 “Job, na kachiŋu na wi ŋu,
ma naa kee wɛɛ nyjɛ,
mu yuu ŋga yuu.
3 Mu paaraa yire kro,
ka n kolo wru,
kakra mu lii waara.
4 Mu kee nyjɛ mu yuu yire,
yie jaa lewo jawala waa fun,
mbe u laa Nyiɛkpɔɔ kro.
5 Mu nyu kee nyina
na sisampefun wi ŋu,
mu nyu tna titi.
6 Ŋu titi nyu kee,
ki mu chan,
mi ma ni ki yo na,
mu nyu kii yo.
7 Ŋu pra klu mu se,
waŋgra ŋga nu ra?
Pra klu mu mu se,
a Nyiɛkpɔɔ na chin,
mu nyuɛ gbeele ra?
8 Ŋu chiin mu kala chin ra?
ndee ŋga Nyiɛkpɔɔ,
naa u jawala nyinai,
na mu wa wa ra?
9 Kee ŋgi mu chin,
a o n ki chin hin?
jawala ŋgi ni mu nyi,
a ka n wa o pan hin?
10 Nyjuro finyi fɛɛnlɛ,
na blɛlɛɛlɛ pan o twan,
pe wɛ mu lɛ na lopom kple.
11 Nyiɛkpɔɔ gbunyiŋge kee,
yo mu pan,
mana taan ni o yi kee yuu,
mu pan, a mu yi je.
12 Mu tia mu jawala sɛ,
na mu ni lee,
a mu nyiɛlɛ pɔɔrɔ shɔ,
13 a mu krɔ wru na Nyiɛkpɔɔ ni,
mu tia yire kee nyjɛ nyini,
na yilii mu nyuu.
14 Lewo wi ŋmbi,
mbe u jaa pe chasi,
ndee mbe jaa fraka,
Nyiɛkpɔɔ yiɛ hin?
15 Na Nyiɛkpɔɔ,
nyjeeri bitumblɔ kuraa,
nsra pe chasi u pan,
a kra tia u nsraa kaan
pe na,
16 kena yire haa ŋgi,
kii wa lewo pan hin?
Lewo pe sisam pefun titi,
a sisam pee tna u pan,
na nyumu yi.
17 Job, ndie tɛɛ,
mbe ni mu nyina kala,
ti mbe ni ŋga ni chin,
yo mu pan.
18 Kee nyjɛ kachimblɛ na loo,
pe tolɛɛlɛ pan kre,
pe nsra yi ka ndra.
19 A pre chiin,
Nyiɛkpɔɔ na ŋga tra kre,
waŋgra ka ndro nsra chaa,
pe nu mbe ti pe laa,
Nyiɛkpɔɔ wre kro.
20 Sisam pefɛɛnlɛ mblɛ
pe leele fiŋge kre,
kanyana wa na pe sri,
nyjila ŋga pie li kro nu.
21 Na ki pan na kee kro nyu,
mu pe ŋga kre,
kee nyjɛ pe ndru yi fiɛrɛ kee,
a juolo wa pe ti.
22 Pe n na kaan,
na pie shɔ katala kɛɛ,
kumu pe sri mbe ki pe wru.
23 Pe chin na pe kumu nyjila da,
a pie kaari kɔkɔsakie sro.
24 Kanyana na jawala tɔɔraa,
tia fiɛrɛ kpɔɔ pe yii,
mu wɛ pe na,
a pe pɔɔrɔ shɔ,
na ŋunu shie ŋunɔ,
25 ŋgi na hin? Pe kaŋgroe kru,
na nyini Nyiɛkpɔɔ na,
na peyɛ kpɔɔri,
Jaŋgafun wre yiɛ,
26 mu pe ŋunɔwiyirɛ,
nyjɛ nu faŋga nyi wru,
na paan mbe wi Nyiɛkpɔɔ ni.
27 Kii wa na kaara wa,
pe yiɛ na,
a pe sɛlɛ kpɔɔ kpɔɔ,
28 nde kajɛɛ na kalonyi nyjɛ,
yi juari mu wo mbruru nu,
pie tni.
29 Pe swa, na pe wejiyirɛ,
nyjɛ pe ta yire we kɔ pe kɛɛ,
yia jaa tra kre shɔ mbe ta.
30 Pia shɔ kumu kɛɛ,
pe kro leele we soo.
Nyiɛkpɔɔ nyu fuflɛ,
kie pe wru.
31 Yaa ti mbe praa peyɛ fana,
mbra kaan yirɛ wɛɛ na.
Ŋgi na hin?
Pia tnu ka ta yi nu.
32 Pe nyjila naa yo kie da kre,
na pe pe fɔtɔɔrɔ,
ŋga pie ta kro ta,
mbe pe na tiŋge ŋga wrɛ,
ki nyaara mu wo yi.
33 Pan pie pe na afoo tiŋge
ŋga sɛnyi pe knumu,
mu wo bibre yi,
ndee na olive tiŋge,
ŋga ki fin mu wo yi.
34 Leele mblɛ pe n Nyiɛkpɔɔ,
chin pre kɔlɔ yi kumu,
a mblɛ pe dɔli yirɛ shio pre,
kanhun kie pe kalonyi sro.
35 Pre leele mblɛ,
kefuɛn pe jawa,
a ki kɔlɔ yi sisampee,
a kafinɛ kee bribri yi pe nyi.”