13
Job na yo mbo,“Kee nyjɛ e yuu ŋga krɛrɛ,
ni da mu yi nya,
mu da mu yi loo,
mu yi nɔɔ loo.
2 Kee ŋga e chin kro,
pan ni ki chin.
E n wɛ ni na kolo ka na.
3 La, Nyiɛkpɔɔ Jaŋgafun wre,
ni ni chaa mbe paara,
mi na wre oo wa,
kala ni.
4 La, yire e kala fnɛ,
mu taa ni na,
pan e kro nyi,
na yambla trafɛɛnlɛ
mblɛ pia jaa yaŋu tra lɛ.
5 Na e kro wra nyu tɔ kre,
kaa yire lɛ kachimblɛ.
6 E ndie tɛɛ ni pan,
mbe ni ni mandiɛ bɔ,
mbe e loo.
7 E chaa mbe sisam kee,
na kafinɛ kee yo ni na,
mbe Nyiɛkpɔɔ yo e ka pe.
8 Ee jaa kala li Nyiɛkpɔɔ pan ra,
ndee chaa e chaa,
mbe paara mbe u ŋga ra?
9 A na Nyiɛkpɔɔ e le,
we kee chichie ka nya,
e nu chɔɔ?
Yaa u fana,
imi na e lewo fana kre?
10 Na e denyjuu kun,
a e n kpra yo,
we e yiɛ kee yo e pan.
11 U yɛnyiŋge jaŋga kre,
kie ti mbe fiɛrɛ kpɔɔ wo e na.
12 E kachindɛ yomɛɛlɛ,
nyjɛ e gbuun kre,
tnu ka n wa yi nu,
pan yi nyi na bloŋgo yi,
a kee nyjɛ e yuu yire kro,
faŋga ka n wa yi nu.
13 E nyu tɔ, mbe ni ni kala yo,
mbe ŋga kie pan pan.
14 Mi ni kala cha mu niyɛ ŋga,
mu ni ndra wa jenyje.
15 Na Nyiɛkpɔɔ u ni kuu kuraa kre,
wre na mbe dankna,
a wre yiɛ mbe sɛ ni kala yo.
16 Aada kre kie ni shɔ.
Ŋgi na hin?
Ndro ŋmba u pimi li,
wa yire u yiɛ.
17 E ni kee ŋga ni yuu ŋga loo,
e ti mbe kee ŋga ni yuu,
kre le e ndie.
18 Ni niyɛ kna,
mbe sɛ ni kala yo,
a ni chin na ni wo we tna.
19 Ndro we ja,
mbe ni gbun na pimi ni ra?
Na ki pan ma,
kena mbe nyu tɔ, mbe ku.
20 Oh. Nyiɛkpɔɔ,
ni ŋga yirɛ shiin,
nyjɛ mbe mu tali ŋga,
mbe mba niyɛ ndra mu na.
21 Maa ni ndie tini ma na,
a maa mu fiɛrɛ kee yire tɛɛ,
mbe ni piɛri ma na.
22 Na mu ni yeeri,
mbe shɔ mu pan,
a na mu ti mbe ni paara naa.
Kena mu ni nyu wɔ.
23 Punɔɔ, na sisam kee,
mni ni pe hin?
ni nyina yi yi.
24 Mni a mu yiɛ wɔ ni na,
mu na ni jawa,
mu loŋgo ŋga hin?
25 Kena mu wrɛ waa,
ŋga fuflɛ wru tɔɔra ra?
A mu wi na yirɛ fue wɛɛ ni ra?
26 Kee susrom bribri,
mu nyunɔ mu tɛɛ mu ni taan,
mu na ni fɔlɔ toni ni bimi,
sisamu nyjɛ ndaa pe ni.
27 Mu sɛɛrɛ le ni jeelee na,
a lawee ŋga nu mbe tro kpan,
mu ni dumble tɔɔnri.
28 Mu ti mbe lewo fɔɔn,
mbe pe na yoŋgo,
ŋga dumblɔ ka yi ra?