Job Na Zophar Nyu Wɔ
12
A Job na kna mna Zophar nyu wɔ mbo,2 “Yɛŋgɛ yi na
yire chiin lɛ kachimblɛ,
na e ku kena kachindɛ kɔ.
3 La, imi na e kala chin,
pan chɔɔ ni kala chin na,
e n wɛ ni na kolo ka na,
kee nyjɛ e yuu yire krɛrɛ,
leele yi chin.
4 Mi titi chin na ni fraka,
a kala ka wa ni na,
mbe ndro ta mbe yo,
a Nyiɛkpɔɔ na ni talaa ndru,
a nde fuŋga,
ni nɔɔlɔ ni pini na tɛɛ.
5 Leele mblɛ
na kanyana n wa kre,
pe ndra pɛɛnrɛfun le fiɛn,
mu na jawa na ŋmba,
u mbulɔ mu to wre wo kɔ.
6 Yaka na gunu,
juo ndie u katoo,
a mblɛ pe Nyiɛkpɔɔ,
krɔ kuun kre,
yaka na pe tɔɔra,
pe jawa na,
Nyiɛkpɔɔ wa pe kɛɛ.
7 Na mu chaa mbe kala twan,
kena sɛ hanyiɛlɛ,
na nyaalam yurɛ wie,
mbe pe mu nyina.
8 Ndee na mu chaa,
yirɛ nyjɛ yii wa tra wie,
pie mu nyina,
ndee na mu yurɛ mblɛ,
pee wa epo nu wie,
pie paara mu pan.
9 Pre yurɛ mblɛ krɛrɛ chin,
na o Tafun Nyiɛkpɔɔ wre,
kɛ ki yira kro wa.
10 Yira kro ŋmaa,
na lewo na nyjuro ŋumu kro,
O Tafun Nyiɛkpɔɔ wre,
kɛɛ yi nyi.
11 Imi na kayooro tna ndie kre,
pan chɔɔ sro tna ndile na.
12 Blɛlɛɛlɛ pan kachindɛ yiri,
a lɛlɛm ki paan na nɔɔloo ni.
13 La, Nyiɛkpɔɔ pan kachindɛ,
na faŋga yiri,
a wre u wa jawala,
na nɔɔloo ni.
14 Yira ŋga,
Nyiɛkpɔɔ we kla kre,
ndro wa jaa ki gbeele,
a ndro ŋmba we le nyuŋgo kre,
lewo wa jaa u wɔ.
15 Na u nyiɛ tɔ na kia pan,
wam kie yire,
a na u yo nyiɛ yi pan,
yie jaa pan kpɔɔ mbe tra kla.
16 Nyiɛkpɔɔ nu faŋga nyi,
a wra wi mbe to.
Wre kɛɛ ndro ŋmba pe fana,
na fanafun wre kro nyi.
17 Wre u jawala ŋgafɛɛnlɛ,
jawala woni pe ndra,
mbe ti mbe kpra kunfɛɛnlɛ,
pe jijiele.
18 Wre u ŋulo jaŋga shio,
pe kɛɛ,
mbe pe pɔ na pre titi greree ni,
na tinlɛ lɛ.
19 Wre u kɔmfoɔe trei tra,
na mblɛ pe jaŋga li mu mu,
pre koni pe jɔɛn na.
20 Wre u tii,
mbe jawala ŋgafɛɛnlɛ,
mblɛ na leele kaan pre,
paara mbe pra,
mu na loplombo jawala,
woni pe ndra.
21 Wre u ŋulo jaŋgafɛɛnlɛ,
yiɛ leni nyumu,
na ti mbe faŋgafɛɛnlɛ faŋga,
na koo pe nu.
22 Wre u yirɛ nyjɛ
yi ndra wɔmu nu,
yire woni fimi na.
23 Wre u tii,
mbe waŋgra mɛɛ shɔ,
mbe u pe kla,
a wre u tii mbe waŋgra kpɔɔ,
mbe u ki leele gbun,
mbe nyina.
24 Wre u tra ŋga yɛkulo,
jawala kee woni pe ndra,
mbe ti mbe pe kila mbe tro,
tablɔ tra ŋga nu,
kooloe n wa nu finfin.
25 Pre pe fɔɔn wɔmu nu,
mbra fuula na gbɔgbɔɔlɔ lɛ.”