Zophar Na Paara
11
Bawa Zophar ŋmba wra yiri Naamah na wre na u nyu wɔ mbo,2 “Mu paaraa tataara ŋga,
nyina na mu wo tna,
mbe ndro wa ka taa yo,
na ree?
3 Mu jawa na mu kewɛɛ,
nyjɛ mu yuu ŋga,
we ti o nyu tɔ ra?
Mu jawa na na,
mu titɛɛrɛ kee yo o na,
ndro wa jaa mu yiɛ kee yo,
mu pan ra?
4 Mu yo Nyiɛkpɔɔ pan na,
‘Ni pe chasi mu yiɛ,
a ŋga ni piin kro nyu.’
5 Ni chaa mbe Nyiɛkpɔɔ,
na mu nyu wɔ,
mbra nyu nyaa,
mbra paara mbe mu taan,
6 mbe ti mbe mna,
kachindɛ lam nya,
a mu na chin na,
kachindɛ nyini nɛɛ.
Ki fna mu chin na,
Nyiɛkpɔɔ kuraa mu sisam,
yɛ ti mu mu kɛ.
7 Mu jaa Nyiɛkpɔɔ,
ndra ndra kee nɔɔ loo ra?
ndee mu jaa Jaŋgafun wre,
kee nyjɛ u pini lam chin ra?
8 Nyiɛkpɔɔ kee nyjɛ u pini,
yire kpɔɔ mu tro,
kena ŋgi mu jaa pe hin?
Yi lam juo mu tro,
hali yi n wa nyukɔɔrɔ ni,
kena ŋgi mu chin hin?
9 Nyiɛkpɔɔ kee yire,
na mu yi soolo,
yi titnɔmu wɛ tra na,
a yi valam wɛ epo na.
10 Na Nyiɛkpɔɔ tia,
pe mu yii mu le nyuŋgo,
ndee mu sɛ na mu ni,
kala lihaa,
ŋmbi we jaa mu shɔ,
u kɛɛ hin?
11 Kpra yi na, Nyiɛkpɔɔ
mblɛ pe leele fana pre chin,
a na u sisam kee nya,
u ki chin.
12 Na mu chaa,
mbe nyaa bubnɔ katoo tra,
mu ta yaari,
mbe wɛ ŋga mu na chaa,
mbe jijio kala chin na.
13 Na mu muyɛ wru,
mu Nyiɛkpɔɔ ŋga,
mu kɛnyi yire nyjeeri,
mu u tali,
14 mu sisam kee,
nyjɛ mu pini yire ti,
mu tia hankɛ kee kro yili,
mu katoo,
15 kre mu jaa,
yiɛ yire nyjeeri,
mbe nyifɛɛrɛ wa mu gbo,
mbe yire gbiŋmbi,
a fiɛrɛ wa mu yii.
16 Na ki pan ma,
mu mu kanyana kro fɛɛ,
imi na nyumu fuu mbe tro,
mbe mu ki kee fɛɛ kre.
17 Mu tnimu we pe chasi,
mbe wɛ lafo yila na,
a nyjila ŋga kia nyu mu na kre,
we nyu mu pan,
na nyisee nyu yi.
18 Yaka wa mu tɔɔra,
ŋgi na hin?
Kaanhaa wa mu pan.
Mu muyɛ le
mbe fɛ mbe kun,
mbe nya na mu wuu chasi.
19 Mu sni, a ya ka wa ŋnu mu ndie,
mbe fiɛrɛ mu yii,
a lenɛɛrɛ we mu ŋai.
20 La, sisampefɛɛnlɛ pre
we fun nyiɛlɛ na,
a pia jaa shɔ,
kumu na pie na kaan,
na ki pe wru.”