10
A Job na paara Nyiɛkpɔɔ pan mbo,“Fuŋgaami ŋga, waŋgra ni bin,
ki tia ni yɛjeere tɛɛ,
na ŋga kii wa ni na kro yuu,
mu pan.
2 Maa shia klu,
mbe ni gbun na pimi ni,
ti mbe ni chin sisaa,
ŋga ni pe.
3 Kena ki nyu mu pan,
na mu ndra shelee li,
ndro ŋmba ŋu titi pe na?
Sisam pefun rɛ,
mna wre le na tɛɛ?
4 Nyini ŋga ni lewo yirɛ le kre,
kre ni ma ŋu yirɛ le.
5 Mu ble n nyukɔɔrɔ ni,
na lewo na nyjuro wi.
6 Kena mni a mu yiɛ nyina,
a mna ni sisam tɔɔnri,
ma ŋga hin?
7 La ŋu titi chin na ni n pimi li,
a na ndro n wa,
mbe jaa ni shɔ mu kɛɛ.
8 Ŋu mna mu kɛ tɛɛ,
mna ni faanri mu ni gbeele,
kena mni a mna chaa,
mbe ni kla ŋga hin?
9 Sɔɔnri na ŋu mna ni faanri,
na pe choo tɛɛ mu chɔ faanri,
kena mu ndruu ti
mbe ni kaari pooro na ree?
10 Imi na pe naara woni,
nɔnɔ nu brɛbrɛ kre,
pan mna ni gbeele,
ni lo sefoo nu,
11 mna kaprɛ tɛɛ,
mna ni kajle soolo yiyɛ na,
mna kaara na hlɛ tɛɛ,
mna ni tɔ.
12 Ŋu mna ni ŋga ŋmaa,
a ki nyina na mu ni kori,
mu kɛ tɔ ni nyiɛ na.
13 La, fuŋga ni chin na,
mu kee ndra mu jawala nu,
fuŋga ni chin kee ŋga,
mnaa chaa mbe pe.
14 Mna ni le na,
mbe sisaa ka pe,
mbe ma na ni sisam ti,
mbe ni kɛ.
15 Na ni pimi li, kena ni atɛ,
hali na ni n pimi li kuraa kre,
mba jaa ndra yire,
ŋgi na hin? Kanyana na
nyifɛɛrɛ bribri nu ni nyi.
16 Na ni yo mbe ndra yile,
mu ja mbra ni sri
na blɛkpɔɔ wi,
mbe ti mbe ni mu,
kawako jaŋga kre nya.
17 Nyjila kro nu mu leele ta,
pra dansiɛrɛ lii na ni taanla,
a ki tia mu krɔ na kuun,
na ni ni kpɔɔ,
a kia jaa nyjii.
18 Kena mni a mna tia,
pra ni se wo?
Na ndaa ku a nyini na chin,
mu ni nya kuraa, kaa ki prɔ.
19 Na pe nsra ni se,
ndee na ndaa ndru,
a pra ni wru ni se haa,
mna sɛ le, kaa ki nyu.
20 Kena ni ble chiɛri nyjɛ,
mbe li yire nyu n to tun ra?
Yiɛ wɔ ni na,
mbe ni yɛshɔɔrɔ li chiɛri,
21 mbe chiin sɛ,
mna ndro kro shie,
a pia ndru mbe pan na kre,
kumu lawee ŋga nu,
wɔmu kprikpri nyi kre nu.
22 Bawa ndram wɔmu sna,
a tutom na woni yira kro na,
pan bawa kania nyi,
na ndram wɔmu titi yi.”