Job Na Bildad Nyu Wɔ
9
A Job na Bildad nyu wɔ mna yo mbo,2 “Yɛŋgɛ na,
nyjɛ mu yo yire pe kpra.
Kena ndro we jaa fraka,
Nyiɛkpɔɔ yiɛ ŋgaa?
3 Ŋmbi we ja,
mbe Nyiɛkpɔɔ nyu kaanri hin?
We jaa mu wie,
kaalɛɛ kagbeŋge,
mbe ma jaa nunu chom,
kuraa nyu wɔ.
4 Nyiɛkpɔɔ kachindɛ,
na u jaŋga kpɔɔ mu tro,
ŋmbi we jaa yire u yiɛ,
mbe tamu ta hin?
5 We ti mbe nyua kɔ ki titɛɛ,
na ki n chin,
a na u krɔ kun mbe u ki kna,
mbe wa kanyjuula.
6 Wre u tii mbe tra seeri,
mbe jɔŋgɔ ki titɛɛ.
7 Wre u paara yila pan,
mbe kia yili,
a wre u tii,
mbe wɔɛlɛɛ wa chiɛnri.
8 Wre chiin wra nyjeeri nyaa,
na dɛŋglɛ yi,
na nyaari epo,
ŋga ki mbapilɛ waa na.
9 Wre u wɔɛlɛɛ pe,
mu yi kan yi lawee.
10 Wre u kawako kee piin,
a ndro wa jaa yi nɔɔ loo,
na kekpɔɛ pini,
a yia jaa tɔɔnri.
11 Na u tro ni mbɛɛ na kuraa kre,
mba u nya,
a na u ni wa mu tro,
mba u chin.
12 Na u yira tini mu shɔ,
ŋmbi we jaa ki shɔ u kɛɛ hin?
A ŋmbi we jaa u wie na,
‘Yira ŋgi mu pini hin?’
13 Na Nyiɛkpɔɔ krɔ kun,
ŋmbi we jaa ki nyu yii hin?
hali Rahab,
ŋmba wi epo yurɔ kpɔɔ wre,
kuraa seeree u yiɛ.
14 Na pan ki nyi imi,
kena mni mbe pe,
mbe yire Nyiɛkpɔɔ yiɛ,
mbe ni nyu wɔ hin?
Na ni yire u yiɛ,
mba kee ka ta mbe kaala.
15 Kii wa na ni n yaka pe,
nde na ni yire u yiɛ,
mba kee ka ta mbe ni nyu wɔ,
ŋga mbe jaa pe kro yi na,
mbe ŋmba we ni kpra kun wre tali,
mbe u ni fooro le.
16 Na Nyiɛkpɔɔ ni kala lii,
u kala li haa,
a ni u yeeri kuraa kre,
ni shɔnli na,
wa ndie tɛɛ ni kee na.
17 We ni gbun mbe chan,
na nyiɛ fuflɛ ni,
mbe ka ya ni kanyana na finfin.
18 Mi naa yo,
mbe kolo taa ŋu kre,
na ka ya kuraa ni dɔɔya na.
19 Na kra kro faŋga na,
wre wi jaŋgafun,
a na kprakuɔn na ki kro,
ŋmbi we jaa u yeeri,
kala lihaa hin?
20 Na ni wo we tna kuraa kre,
ni nyu we ni gbun na pimi ni,
a na kala ka n wa ni na,
mbe ndro ta,
mbe yo kuraa kre,
ni nyu we ni chan.
21 Kii wa na kee sisaa,
ka n wa ni na,
a nde ŋga kie ni da kpan,
ni kee ka ma na ni ŋmaa ni.
22 Kee ŋga ni yuu kre yi na,
imi na Nyiɛkpɔɔ,
we chichie pefun kla,
pan chɔɔ,
we sisampefun kla na.
Kena klaa nunu kre yi.
23 Na lewo chichie,
fo mu ku kre,
ki pe titɛɛrɛ Nyiɛkpɔɔ pan.
24 Na tra to,
sisampefun wre kɛɛ,
mbe Nyiɛkpɔɔ,
ki kprakunfɛɛnlɛ yiɛ gbun,
mbe tɔ.
Na wre bɔkɔ,
ŋmbi we ki pe hin?
25 Ble nyjɛ mbe li tra mna kre,
yi feni nyaanyaa,
mu wɛ tafɛŋgɛfun na,
hali ble nunu chom n wa,
mbe pe yɛshɔɔrɔ ble.
26 Pan ni ble tro nyaanyaa,
na pe pɛlɛ kan krɔ na,
lɔɔ yiɛ na, kra shie na ki ni,
pan yi tro na shie,
na nyuu yurɔ nya mbe wa.
27 Ni chaa mbe tɛɛ mbe kee,
nyjɛ na ni paara yire fɛɛ,
mbe mba nyu nyaa,
mbe ŋga kii wa ni na yo na,
28 na ki pan ma,
mbe ni kanyana kre ti,
mbe fiɛrɛ ni yii, ŋgi na hin?
Na ni chin na ni pimi li,
Nyiɛkpɔɔ yiɛ.
29 Mi titi chin na pe klu,
mu ni gbun na pimi ni,
ŋgi na mbe tuwi,
mbra niyɛ tɔɔra finfin ŋga hin?
30 Hali na ni zemna,
ŋga nyu ki sheli tɛɛ mu weli,
31 Nyiɛkpɔɔ we ndruu,
ni ŋunɔ mbe le pooro wee,
mbe ni yirɛ nyjɛ ni le,
niyɛ na ni gbo nyifɛɛrɛ.
32 Nyiɛkpɔɔ n pe lewo na mi wi,
mbe ni jaa u kala nyu wɔ,
mbaa yo mi na wre,
we fni kala lihaa.
33 A ndro ŋmbi we jaa yire,
mi na Nyiɛkpɔɔ lalaa,
mbe yo we o lalaa gbeele hin?
34 Ndee mbe kaan ŋga u yire,
ni na kre shɔ u kɛɛ,
mbe ki ni piɛrɛɛ ti hin?
35 Na ki pan ma,
mbe jaa paara u pan gbun ni,
a le rɛ, imi na ki pe ŋga,
mba jaa paara.”