Bildad Paaraa
8
Bawa Bildad, Shuah ndro wre na kna mna Job wie mbo,2 “Ŋgi ble mu kewɛɛ
nyjɛ mu yuu ŋga nyu we to wo?
3 Nyiɛkpɔɔ Jaŋgafun wre,
wa jaa kpra fɛɛlɛ.
Wa kpra yo,
mbe ndru mbe nyu chinɛ.
4 Ŋga mu biile na sisaa pe,
mna u taan,
wra pe ndie tini,
imi na ki fna.
5 Na mna yiɛ tɛɛ Nyiɛkpɔɔ na,
mbra Jaŋgafun wre tali,
6 na mna fraka,
mu pe chasi u yiɛ,
we na ya mu na fuŋgaami,
mbra ndru mbe mu ŋga,
mu yire haa na.
7 Yɛtaara yirɛ nyjɛ,
we na mu ŋga kre,
yie na wɛ nyjɛ yi yili,
mu kɛɛ yire na.
8 Na mu fa leele pre kee jawa,
mu chin na pra twan,
pe tolɛɛlɛ pan.
9 Aŋga biile lɛ wre,
o n yaka chin.
O na mu na,
pan o ble troi to,
na yira ndile yi.
10 Ti mbe fa leele pre,
kachindɛ kee nyjɛ pra yo yire,
paara mbe mu nyina.
Ndie tɛɛ jawala kee,
nyjɛ pie yo mu pan yire na.
11 Gbandaa tiŋge we ja
mbe lɛ lawee ŋga,
ki n pe mafaan nu ra?
A braŋgɔ we jaa lɛ,
lawee ŋga nu,
nyumu n wa nu ra?
12 Nyjila ŋga ni ki n ta mu lɛ,
mbe pe ki kun kre,
kie klu mbe ku nyaanyaa,
mbe wɛ nyaa na.
13 Leele mblɛ pe Nyiɛkpɔɔ je,
kre kɔlɔ yi kre,
pe n wa na dankna ka ni,
pan pie kla.
14 Yira ŋga na pe kaan kre,
pe yira waara,
ŋga na pe peyɛ wru mu taa,
kre pe na sepe vavaara yi,
kra mu mbe kla.
15 Na pe yo pie gbun ki na to,
too pie to,
a na pe kɛ taa ki na,
pie ki yii mbe la.
16 Sisampefɛɛnlɛ pre,
pan pe nyi na yira ŋga pe luu,
mu nyumu wo ki na chiriri,
a yila na ki gbuun yi,
kie wrɛ fun,
mbe kagbla shɔ mbe ta.
17 Kie didinyi wa mbe dnɛ mbiile,
mbra tro haa chaa dnɛ ndoolo.
18 La, na mu ki tini mu kɔ ki titɛɛ,
kia pe ki titɛɛ wa na,
mbe ki titɛɛ wa yo na,
‘Ni n da mu mu nya tun.’
19 Na ki pan ma,
kena ŋmaa kɔ ki nu,
mbe nyaa fɔnyi fin,
ki titɛɛ wa.
20 O chin na Nyiɛkpɔɔ,
na frakafun fɛɛ,
a wa ya sisam pefun na.
21 We ti mbe mu yiɛ shɔ,
mbe ti mbe mu tɛɛ.
22 Nyifɛɛrɛ we mu loŋgoolo gbo,
a lawee nyjɛ nu pra nyi fa kre,
ma yi nya na.”