Tnimu Sheli Tra Ŋga Nu
7
Tnimu sheli mu lewo ŋga,tra ŋga nu,
pan lewo ble nyjɛ we li yire,
pan yi nyi u pan na,
wru pe u wru tnumu shelee nu.
2 Pan lewo nyi na tnu ŋmba,
u nyimi chaa mbe tni wi,
ndee na ndro ŋmba,
pe wru a u tnumu tun,
mu tni na u fɔtɔɔrɔ sri,
yɛnyiɛ ni wi.
3 Kie pe nyjila tataara yi ŋga,
na ni n chin nyjɛ nu ni nyi,
na ble wɔ,
fooro bribri nu ni nyi.
4 Na ble wɔ a ni sni ŋga,
jawala wa ni ti,
ni chaa mbe nyiŋge se,
nyaanyaa mbe ni yiri.
Pan mbe gbila dɛŋglɛ na,
chiin mbe ndram saan.
5 Klɛ ni tɔ,
a fnimi na yilii yi nu,
a fiɛnlɛ ni wejiŋge tɔ poŋgo.
6 Ni ble nyjɛ mbe li tra mna yire,
pan yi shie nyaanyaa,
na kpɛɛrafun u yoŋgo tini.
A ni n wa na kaanhaa ka ni.
7 Oh, Nyiɛkpɔɔ jande sɔɔnri na,
pan ni ŋmaa nyi na nyu fuflɛ,
ŋga pe fɔ mu wo yi,
ki tia ni yɛshɔɔrɔ kro kɔ.
8 Nyini ŋga ki ni nya aŋga kre,
wa ni nya na fio,
Pie ni haa cha,
a na ni n wa na.
9 Imi na tlo fɔɔn ndro yiɛ na,
mbe wa ki nya kre,
pan lewo ŋmba u shie,
kuulo ndoo kre,
wa ndru mbe pan na.
10 Na u sɛ wa ndru,
mbe pan u kro na,
a mblɛ pra u chin kre,
wa u chin na,
11 Ki tia mba ni nyu tɔ,
mbe paara.
Mbe paara,
ni kanyana kre ndra na,
mbe taan mbe ki ni da.
12 Nyiɛkpɔɔ, mu jawa na,
epo yurɔ sisaa wre wi mi,
a mu leele wɔ pra ni sri ra?
13 Na ni jawa,
ni dɛŋglɛ kie ni bre,
mbe ni jɔɔn tni wo ti,
mbe ka kun ni taanraa na.
14 Hali yire kee nyjɛ kɔkro ni,
na ni sni mu tia,
ndaa fiɛrɛ ŋunɛ ŋunu,
mbe ni sni mbra seeri.
15 Na pe ni yii lagboe nu,
mu gbo kuraa kre,
ki prɔ ni pan imi na ni,
wejiŋge nyi ŋga na.
16 Sra wɔ ni na, ni tnimu ŋga nu,
kena e ni ti mbe ni ku,
ni n chin ŋga ni tni na piin.
17 Nyiɛkpɔɔ,
lewo wi ŋmbi kuraa,
a u kee mu shian,
a mu yiɛ wa u na,
ma ŋga hin?
18 Na nyiŋge se kpan,
mu paan na u le,
na u pini na le nyjila kro nu.
19 Kena ma yiɛ laa ni na fiɛn,
mbe ti mbe ni ŋu fiɛn chiɛri ra?
20 Na ni sisaa pe,
yira ŋgi ki kun mu na hin?
a mu kro mu na ni dɔɔtaa,
ma ŋga hin?
Mni a mu ni le nyini ma hin?
Ndee ni kaari tuuro,
mu pan ra?
21 Ŋgi ki tia ma ni sisam ti,
mbe ni kɛ,
mbe yiɛ wɔ ni punɔɔ,
ŋga ni punu na hin?
Kia mu mbe ni ku,
mbe kro bloŋgo nu.
Mu ni haa cha,
la ma ni nya na.”