Job Paara
6
A Job na kna mna yo Eliphaz pan mbo,2 “Na kra pe na ni kanyana,
na ni fooro lie ŋga we jaa kra,
3 ka yi snamu we na wɛ
epo nyu tablɔ snam na.
Kre ki tia ndaa paara,
na ni n na jawa kre.
4 Pan ki nyi na o Tafun,
Nyiɛkpɔɔ u ni waari,
na u snimi ni,
a yi tuwe sisaa nyina
mu le ni wejiŋge nu,
Nyiɛkpɔɔ tia fiɛrɛ kee,
pan mu taala ni na.
5 Na bubnɔ nyaa ta na kaa,
wra gble le kpɔɔ,
a na nuu sro ta wra nyɛni,
fɔna klo u ta.
6 Na weŋge n wa chiin nu,
yi tnamu yi ŋgi hin?
Ndee yira ŋgi ki pin mu da,
na ŋgochrɛwɛ fiŋge,
kre ni hin?
7 Na mu ni ŋga kre sro kre,
ki niŋge wa pe ni na.
8 Oh! Na mbe na yira,
ŋga ni chaa ta,
mbe Nyiɛkpɔɔ na ni ŋga,
ni lɛɛ yira ŋga ni chaa.
9 Na kie na nyu,
mbe wra ni gbo to,
mbe kala na kɔ.
10 Na pan ni chin,
na we ni pe ŋga,
hali imi na ni yaa,
mu da ŋga na ki kɛ ni,
mbe na ti mbe ni yiɛ na shɔ,
Mi titi chin na,
Nyiɛkpɔɔ pe cheche,
a ni n ndikana pe,
u nyu kee na tun.
11 Faŋga ŋgi kii wa ni nu,
a ni je mu tni na lii tɛ hin?
Ni dankna kro kɔ,
a ni faŋga kɔ ni nu.
12 Ni faŋga n pe na dnɛ yi,
a ni wejiŋge n sheli,
na swafre yi.
13 Jaŋga ka n wa ni pan,
mbe ni tɛɛ mbe ni yɛ shɔ,
a lawee ka n wa,
mbe ni tro mbe yafun ta.
14 Na kala lewo da,
a sra wɔ u na,
hali na ki pan na,
u laa Nyiɛkpɔɔ fiɛrɛ kro,
ki fna mbe u nɔɔlɔ ya u na.
15 La, mba jaa kaan ni nɔɔlɔ pre na,
pan pe nyi na lafolo,
ŋga na lewo wa jaa ndra taa yi,
na nyiɛ pan mu le ki nu mbe ki nyi,
na nyiɛ kun mbe ki yua.
16 Pan pe nyi na bɔbɔnlɛ yi,
kie wo mbe sheli nyumu yiɛ,
na na dnɛ yi,
17 na ki wo weere nyjila,
mbe ki sheli kia jaa fo mbe sɛ,
a na ndram wɛɛri,
mbe mu ki cha,
mbe la lafoelee nu.
18 Na jafalifɛɛnlɛ,
na pe yurɛ fun pe kolo na,
pie sɛ ku mbe fun,
tablɔ tra kre nu.
19 Tema kolo kunfɛɛnlɛ,
nyumu chaa na tro,
a Sheba jafalifɛɛnlɛ na kaan,
na pie nyumu ta mbe gbɔ.
20 La, ŋga pra da,
lafolo waara kre nu kre,
pe dankna na kɔ.
21 Pan ni e nya,
na kre lafolo waara kre yi,
yaa ja mbe ya ni na,
e ni nya kanyana nu,
a fiɛrɛ e yii.
22 Ni e wa tali sro tun ra?
Ndee e wa da mu yaka tɛɛ,
mu ni ndra lɔ tun ra?
23 Ndee e da mu ni shɔ,
ni loŋgoolo kɛɛ tun ra?
Ndee e wa da mu ni lɔ,
ndrashelifɛɛnlɛ kɛɛ,
mu wa tun ra?
24 E ni nyina,
mbe pieri mbra ndru,
e ni nyina mna ni fɔɔn pe.
25 Kpra kee mu nya ŋga,
ki yaa ndie,
la, kee chiriri ka ma e ta,
na yuu ni pan.
26 E jawa na kewɛɛ,
ni yuu fuflɛ na,
a na pan yi, kena ŋgi ki tia,
e na lewo ŋmba dankna ki kɔ,
wre nyu woni hin?
27 Mni a e na chaa,
mbe kɛɛn tɛɛ,
mbe yire ki na mbe bijro lɔ,
ndee a e na chaa,
mbe e nunu titi prɛ hin?
28 E ni yiɛ kotolo le chichie,
kala ma ni fnɛ e pan.
29 E kala fɔŋgɔ cha e yo,
yaa ni gbun na pimi ni finfin,
a yaa ni mɛɛ kla waara ma,
nii wa mu fraka tɛ.
30 Kee sisaa ka yili ni nyuu tuu?
Ni chichie chin,
mu sisaa chin.