9 Levi leele mblɛ pra kɛ le hlɛ kre jaara na lɛ, Azaniah biblɔ Jeshua, na Binnui ŋmba wra yiri Henadad katoo wre, na Kadmiel, 10 na Shebaniah, na Hodiah, na Kelita, na Pelaiah, na Hanan, 11 na Mica, na Rehob, na Hashabiah, 12 na Zaccur, na Sherebiah, na Shebaniah, 13 na Hodiah, na Bani, na Beninu.

14 Pe loplombo mblɛ pra kɛ le hlɛ kre jaara na lɛ, Parosh, na Pahath-Moab, na Elam, na Zattu, na Bani, 15 na Bunni, na Azgad, na Bebai, 16 na Adonijah, na Bigvai, na Adin, 17 na Ater, na Hezekiah, na Azzur, 18 na Hodiah, na Hashum, na Bezai, 19 na Hariph, na Anathoth, na Nebai, 20 na Magpiash, na Meshullam, na Hezir, 21 na Meshezabel, na Zadok, na Jaddua, 22 na Pelatiah, na Hanan, na Anaiah, 23 na Hoshea, na Hananiah, na Hasshub, 24 na Hallohesh, na Pilha, na Shobek, 25 na Rehum, na Hashabnah, na Maaseiah, 26 na Ahiah, na Hanan, na Anan, 27 na Malluch, na Harim, na Baanah.

28 Leele pre hamblɛ pre, srawɔfɛɛnlɛ, na Levi leele, na jlonwee nyu shiefɛɛnlɛ pre, na mɛkɔmblɔ, na Suminyuŋgo kre tnumu tunfɛɛnlɛ pre, na leele mblɛ pra yila Nyiɛkpɔɔ mbra yire, na mna peyɛ kun mu laa waŋgrɛ nyjɛ yira pe fɛ mu kun yire na kre, pre na pe chiɛlɛ kro, na pe bibilɛ na pe bichiɛlɛ mblɛ pra kee ŋga o pini kre nɔɔ loo kre, 29 pe kro na pan mu ya pe wolo pre na loplombo pre na, a o na da mu oyɛ ŋga Nyiɛkpɔɔ mɛɛ ni na oo li u mbra nyjɛ wra u sumifun Moses ŋga yire na, na o nsra li yi na mbe suŋgɔ o yii.

30 O nyu yo na waa o bichiɛlɛ wru mbe waŋgrɛ nyjɛ yi o fɛ mu kun yire leele ŋga mbe pe leŋge, ndee mbe pe bichiɛlɛ shɔ mbe o bibilɛ ŋga mbe pe leŋge.

31 Na ki pan na jafa lifɛɛnlɛ plɛ yiri waŋgra ka nu mu pan yirɛ, ndee shɔlɔ prɛ Wuuble, ndee ble cheche ka nu kre, waa yi lɔ. A na yɛlɛ kɔɔnashin da kpan, oo ti mbe o seele trɛ wuu, a o fɔɔlɛɛ nyjɛ yii wa leele na kro, oo yi ti mbe pe kɛ.

32 Yɛlɛ kro nu, oo le na o kro we na swafiŋge chɛchiɛri woni mbe pe ki tɛɛ mbra Nyiɛkpɔɔ Suminyuŋgo kre fɔɔlɛɛ bɛɛlɛ toni. 33 Mbe ka tɛɛ mbra paanu cheche kre fɔlɔ toni, yire na blenyini shɔlɔ sra, na yurɛ sroo sra, na Wuuble sra nyjɛ pe woni yire, na sra nyjɛ pe woni nyiɛpɔ fɔŋgɔ ble lie nu kre, na sra hɛnyi yire ni kre, na sra cheche yire, na sra nyjɛ pe woni na Israel leele ndra loni kre, mbe ka ta mbe Nyiɛkpɔɔ Suminyuŋgo kre tnumu tun.

34 Wre srawɔfɛɛnlɛ pre, na Levi leele pre, na leele pre kro kɛɛn tɛɛ mu chin nyjila ŋga ni ki fna mbe o jlom yire na paan na kejenyi ni, mbe pe yi tɛɛ mbra sra yurɛ mblɛ pe woni na o Tafun Nyiɛkpɔɔ kaan yire sroi imi na pe ki nyunɔ mbra hlɛ kre nu kre.

35 A yɛlɛ nyini ŋga oo na paan na o shɔlɔ jle nyjɛ oo kun, yire na o tinyi sɛnyi nyjɛ yie klu mbe nyina ni.

36 Imi na mbra yire nyina kre, oo na paan na o bijloe bilɛ, na o nui bilɛ jle wolo, na o sikaala, na o mbaala jle wolo ni mbe srawɔfɛɛnlɛ mblɛ pe tnumu tuni Nyiɛkpɔɔ Suminyuŋgo wa kre ŋga, mbe pe Nyiɛkpɔɔ ŋga pe lɛ.

37 A shɔlɔ jle nyjɛ oo tre mimi kre, oo sɛ srawɔfɛɛnlɛ pre ŋga yi yi Suminyuŋgo wa, yire na o tinyi sɛnyi chichiele, na o simi fɔnyi, na olive simi ni. A o shɔlɔ nyjɛ oo ta o seele nu kpan, oo yi yɔ kɛ kɛ, mbe yi nununu wɔ mbe Levi leele mblɛ pee wa o chiɛ yire na na yi shio pre ŋga. 38 Srawɔfun ŋmba wi Aaron nana wre, na Levi leele pre pe fna mbe o yire yirɛ yire wɔ mbe ŋga, mbe Levi leele pre yi yɔ kɛ mbe yi nunu wɔ mbe sɛ tɛɛ mna pe yirɛ teeri Suminyuŋgo wa kre, 39 Israel leele pre, na Levi leele pre kro fna mbra pe shɔlɔ, na simi fɔŋgɔ, na olive simi woni mbra paan na yi ni nyinyi nyjɛ nu pe Suminyuŋgo kre yirɛ bɛɛlɛ teeri kre nu. Yire nyinyi yire chɔɔ nu srawɔfɛɛnlɛ mblɛ pe tnumu tuni pre, na jlonwee nyu shiefɛɛnlɛ pre nyi.

Waa o Nyiɛkpɔɔ wre Suminyuŋgo kre wa kamɛŋɛ.