“E yiri e o Tafun Nyiɛkpɔɔ ŋmba uu wa nyjila kro nu wre ŋga mɛɛ, e ti mbe ndro kro u mɛɛ cheche kre ŋga mɛɛ, kii wa na lewo wa jaa u ŋga mɛɛ ŋga ki fna na u ni. 6 Nyiɛkpɔɔ, ŋu chiin wi o Tafun Nyiɛkpɔɔ, ŋu mna nyjeeri, na yirɛ nyjɛ yii wa ki nu kro wa, mna tra na yirɛ nyjɛ yii wa ki na kro wa, ŋu mna epo na nyjɛ yii wa ki nu kro wa. Ŋu mu yira kro kaan ŋmaa, a yira kro na mu sumi nyjeeri wa. 7 Ŋu o Tafun Nyiɛkpɔɔ, ŋu mna Abram wɔ mna yili Ur na Babylon tra nu mna sɛ u ŋga mɛɛ Abraham. 8 Ŋu mna u loloŋgo nya na kprafun wi, a mna nyu nunu pe na u ni na mu u nanae ŋga kre tra ŋga nu Canaan leele, na Hittite leele, na Amora leele, na Perizzite leele, na Jebusite, na Girgash leele nyi mu tni kre. Mu li mu nyu ŋga mna yo u pan kre na, ŋgi na hin? Mu fraka.

9 Nyiɛkpɔɔ, mna kanyana ŋga o tolɛɛlɛ pre na nya Egypt tra nu kre nya. A ŋga pra da epo nyiɛ kre na mna nyɛni mu mu yeeri kre mna loo pe pan. 10 Mna kawako, na kekpɔɛ pe Ŋunu Pharaoh na u loplombo, na tra kre leele kro yiɛ na, ŋgi na hin? Mna nya imi na Egypt leele pre naa pe fiŋge, mnaa peyɛ kpɔɔri pe na. Ki tia mna mɛɛ tɛɛ wa, a kii wa mu pan mu su aŋga na. 11 Mna tia epo kre na peeri pe yiɛ, a pra nyaari tra waa na mu tro ki nu, la, mna tia epo kre na pe loŋgoolo mblɛ praa pe kɔŋgɔ nini kre li, a pra tii tapan na pe dnɛ wa latɛɛ nu. 12 Na pe nyaari na shie nyisee na, mbe mu ti tlo ŋga ki pe na pilaasi yi yiɛklu pe pan, a na ble wɔ mbe mu ti kanhun pe na pilaasi yi, mbe praa nyaa ki na mbra shie. 13 Nyiɛkpɔɔ, mna yire nyjeeri mu tii nyua Sinai na, mna paara mu leele pre pan. Mna pe nyina mu kee, na mu mbra nyjɛ yi nyu, mu fraka yire. 14 Mna tia pra mu Wuuble cheche kre chin, a mna yire mu sumifun Moses na mna pe ŋga mu mbra yire, na kee nyjɛ mna chaa. 15 Klo na pe ta, a mna tia sro na yiri nyjeeri mu wo pe pan, a gbɔɔ na pe ta, a mna tia nyumu na yili dnɛ kpɔɔ kre nu, a pra ta mu gbɔ. Mna nyu yo pe pan na pe sɛ tra ŋga mna yire mu jaŋga na mna pe ŋga kre wru mbe tni.

16 La, o tolɛɛlɛ pre na ndikana pe mna peyɛ kpɔɔ, pe nsra li mu kee kre na. 17 Pra je pe nsra ndie tɛɛ mu pan, a pe nsra kawako kee nyjɛ mna pe pe nu yire sɔɔnri. Pra ndikana pe, mna yiri mu mu taan, mna ŋunu wɔ peyɛ nu, ŋmba we ndru mbe sɛ na pe ni tnibim nu Egypt tra nu. La, ŋu wi Nyiɛkpɔɔ ŋmba mu sisam tii na kee, mu dumiɛn na mu fooro chiɛn kpɔɔ, a mu krɔ na kun nyaanyaa, a mu koroo kpɔɔ mu tro. Ki tia mu nsra pe wa. 18 Hali ŋga pra yirɛ nya mna yi tɛɛ mu sɛɛn pe na nuu pɔ wi, mna yo peyɛ pan na sɛɛn ŋga kra o wɔ mu yili Egypt tra nu kre yi kre, ndee mna jiɛnlɛ kee ŋga mu chin ŋga kro yo mu na kre, 19 mu foorochiɛn kpɔɔ kre ndra na, mu nsra laa pe kro tablɔ tra kre nu wa. Yire kee nyjɛ krɛrɛ kɔkro ni, na pe nyaari na shie nyisee na mnaa tii mbe tlo na nyaa pe pan, na ble wɔ mbe kanhun ŋga ki pe na pilaasi yi kre na nyaa pe pan mbe praa shie. 20 Mnaa yire mu Ŋumu na na paara na pe nyina ŋga pe fna mbe pe, mu nsra tia mu sro ŋga pe yeeri manna kre na kun pe nyu na, a na gbɔɔ pe ta mnaa pe kaan nyumu. 21 Mna pe le tablɔ tra kre nu yɛlɛ fuloe shiin, hali yaka nsra pe shian, a pe yonyi nsra wla pe na, ndee mna nyaari a pe jeelee na popo. 22 Mna ŋunumu, na waŋgrɛ le pe kɛɛ, mna tia pra wi mna trɛ nyjɛ yira sam le na pe ni yire shɔ, hali mna sɛ su haalee wee na. Pra wi mna Heshbon tra ŋga nu Ŋunu Sihon naa ŋunumu lii kre shɔ, kre na Bashan tra ŋga nu Ŋunu Og naa ŋunumu lii kre. 23 Mna tia pe biile na nɛɛ na wɔɛlɛɛ nyjɛ nyiɛ yiɛ na ŋga yi, a mna sɛ na pe ni tra ŋga kee mna yo pe tolɛɛlɛ pan na mu pe ŋga, mbe ki pe pe wo kre nu. 24 Pe biile na sɛ tra kre shɔ mu tni, a mna tia pra Canaan leele mblɛ praa wa tra kre nu pre ja, mna pre na tra kre ŋulo, na pe leele kro le pe kɛɛ, a pra pe pe imi na pe chaa. 25 Pra wi mna kakpɔɛ nyjɛ pra mboe sin mu fɛ mu kun shɔ, yire na trɛ tɛɛn ni. Pra wi mna kalonyi nyjɛ nu yirɛ chichie na nyi yirɛ wru mu ta, mna kɔlɔe nyjɛ pra tuulo mu wa fa, na tre seele, na olive tinyi seele, na tinyi li wee tataara shɔ mu ta. Pra yi ta mna ka mu yɔɔ, mna wejinyiŋge ta, a pe yiɛ na shɔ yirɛ chichiele nyjɛ mna pe ŋga yire na.

26 La, pra je mna ndikana pe, mna yiri mu mu taan, mna krɔ kna mu wa mu mbra yire na. Pre pra mu keenyanyofɛɛnlɛ mblɛ praa paara na pe nyina na pe laa pe sisam kro, mbe ndru mbe pan mu pan pre gbo, mna jiɛnlɛ kee yo mu mu taan. 27 Ki tia mna pe wru mu le pe loŋgoolo kɛɛ, a pra pe fiŋge. La, ŋga praa pe fiŋge kre, a pra chin na nyɛni na mu yeeri. A mna yire mu tnihaa wa nyjeeri mna loo pe pan, a mna yire mu foorochiɛn kpɔɔ kre na, mna pe shɔ mu yili pe loŋgoolo pre kɛɛ. 28 La, ŋga mna pe shɔ a wejiŋge na nyjii pe na kre, ki nsra mu, a pra ndru na pe kefuɛn yire pini mu yiɛ na. A mna ndru mna pe wru mu le pe loŋgoolo kɛɛ, a pra ŋunumu li pe na. A ŋga pra ndru mu nyɛni mu mu yeeri na kre, mna yire mu tni haa wa nyjeeri mna loo pe pan, mu foorochiɛn kpɔɔ kre ndra na, mna pe shɔ, pan mnaa ki pini nyjila nyjila. 29 Mna pe jaari na pe ndie tɛɛ mu mbra yire na, la, pra peyɛ kpɔɔ, mna mu kee kre je. Pra sisam pe mna mu mbra nyjɛ na lewo we jaa yire mbe ŋmaa ta yire taan. Pe ndikana na tia pra krɔ kna mu wa mu na, mna je pe nsra ndie tɛɛ mu pan. 30 Mna frɔ ta mu pe ŋga yɛlɛ tataara. Mna yire mu Ŋumu na mna tia mu keenyanyofɛɛnlɛ pre na pe jaari. Nde pra je pe nsra ndie tɛɛ. A kra tia mna pe wru mu le waŋgrɛ nyjɛ yira pe fɛ mu kun pre kɛɛ. 31 La, mu foorochiɛn kpɔɔ kre ndra na, mu nsra tia pe kro na kla, ndee mna pe wa, ŋgi na hin? Mu dumiɛn kpɔɔ, a fooro chinfun Nyiɛkpɔɔ wi ŋu.

32 Kena o Nyiɛkpɔɔ, mu kpɔɔ, a mu jaŋga kpɔɔ, a mu kee fiɛrɛ ni mu tro. A mu lii mu nyu nunu koroo kre na. Le kala ŋga nyini o nyaa Assyria ŋunu kɛɛ mu pan mu su aŋga na, wre na o ŋulo, na o loplombo, na o srawɔfɛɛnlɛ, na keenyanyofɛɛnlɛ kro. 33 Kaalɛɛ nyjɛ yi o nya nyjɛ krɛrɛ nu kre, mu kpra li, mu fraka, la, wre o sisaa pe. 34 O ŋulo, na o loplombo, na o srawɔfɛɛnlɛ, na o tolɛɛlɛ pre nsra li mu mbra yire na, a pra mu jaaraa, na mu kee nyjɛ mna yo pe pan yire krɛrɛ je. 35 Nyjila ŋga ni praa wa na peyɛ lii pe ŋunumu nu, na peyɛ lii yirɛ chichiele nyjɛ mna pe ŋga yire ni, mna lawee ta mu tni tra taan ŋga mna pe ŋga kre nu kre, pe nsraa mu sumi, a pe nsra laa pe kefuɛn yire kro.

36 La, tinlɛ lɛ wre aŋga, tinlɛ lɛ wre tra ŋga mna o tolɛɛlɛ ŋga kre nu, mna pe ŋga ki yi, mbe pra ki tinyi sɛnyi, na ki sro chichiele ta mbraa lii. 37 O sisam ndra na, tra kre sro nyjɛ yi bɔ o na, a o ta na kuun yire kro sɛ to ŋulo mblɛ mu tɛɛ o na pre kɛɛ. Pre pe ŋunumu lii wre na o yurɛ na imi na pe chaa, ki tia o kanyana wɛ o na.

38 Yire kee nyjɛ o nya ŋga krɛrɛ ndra na, o nyu nunu pini na mu ni mbe ki tɛɛ mbe oyɛ pɔ, mbe ki nyunɔ hlɛ na, mbe o yɛkulo, na o Levi leele pre, na o srawɔfɛɛnlɛ pre kro kɛ le ki jaara.”