8
Leele pre kro na sɛ ble titɛɛ lawee ŋga nu leele naa shie na fni kre nu Nyumu Jlonwee kre nu. A pra yo Ezra ŋmba na wi Moses mbra nyinafun wre pan na u Moses Mbra nyjɛ o Tafun Nyiɛkpɔɔ na u ŋga na u Israel leele ŋga yire wru mbe pan. 2 Kena nyiɛpɔ kɔɔnashin wo kre ble ŋga kra yiɛklu na, kre srawɔfun Ezra na sɛ mbra yire wru mna pan mu yire leele pre yiɛ, na pe bilɛ, na chiɛlɛ, na biile mblɛ pie jaa kee nɔɔ loo naa wa wa. 3 Ezra na mbra yire tɔɔnri mna yire bnimi mna sɛ su lafo na, na uu wa mu yire pe fni haa kre nu Nyumu Jlonwee kre nu, leele pre kro yiɛ. A leele pre kro na ndie tɛɛ na ndru u pan, a wraa Mbra Hlɛ kre tɔɔnri kpɔɔ.4 Pra kɛɛn kan Ezra pan, a wra nduu mu yire yi na, a Mattithiah, na Shema, na Anaiah, na Uriah, na Hilkiah, na Maaseiah naa wa mu yire u kalie kɛ, a Pedaiah, na Mishael, na Malkijah, na Hashum, na Hash-Baddanah, na Zechariah, na Meshullam naa wa mu yire u kamɛŋɛ kɛ.
5 Ezra naa wa mu yire lawee ŋga pra pe kɛɛn ni kre na, kra tia leele pre kro naa u nyaa, ŋga wra hlɛ kre nyaa to, a leele pre kro na yiri mu yire sholo. 6 A Ezra na o Tafun Nyiɛkpɔɔ, ŋmba u kpɔɔ wre ŋga mɛɛ, a leele pre kro na kɛnyi yire nyjeeri mna yo mbo, “Ami.” A pra lɛɛlɛ mna yiɛ soo tra, mna o Tafun Nyiɛkpɔɔ wre sumi.
7-8 Ŋga pra kɔ kre, a leele pre na yiri mu yire sholo, a Levi leele mblɛ praa wa wa pre, Jeshua, na Bani, na Sherebiah, na Jamin, na Akkub, na Shabbethai, na Hodiah, na Maaseiah, na Kelita, na Azariah, na Jozabad, na Hanan, na Pelaiah na le leele pre nu mnaa pe nyina mbra nyjɛ Ezra tɔɔnri yire nɔɔ.
9 Ŋga leele pre na mbra yire lam kee loo ma kre, a pe kro naa nyɛni. A mi Nehemiah abani lopom, na srawɔfun Ezra mbra nyinafun wre, na Levi leele mblɛ praa leele pre nyina mbra yire nɔɔ kre na yo pe pan na, “Aŋga pe ble kpɔɔ titi mu o Tafun Nyiɛkpɔɔ wre ŋga, kena yaa fooro li, a yaa nyɛni.” 10 A Nehemiah na yo leele pre pan mbo, “E sɛ katoo, e sɛ sroe tɛɛn pe e li, e simɛɛlɛ chichiele cha e gbɔ, a ŋmba we ka ta, a u ŋmbrɔ n ka ta kre, ufun u u ŋmbrɔ wre ŋga ka. Ble kpɔɔ titi yi aŋga mu o Tafun Nyiɛkpɔɔ wre ŋga, kena yaa ti mbe e yiɛ je, e ti mbe yɛshɔɔrɔ ŋga e ta o Tafun Nyiɛkpɔɔ nu kre e ŋga faŋga.”
11 A Levi leele pre naa paara na leele pre bre, na yuu pe pan mbo, “E pieri, yaa ti mbe e yiɛ je ble kpɔɔ titi ŋga nu.” 12 Ŋga leele pre na ndru mna sɛ pe kalonyi nu kre, a pra sɛ sroe na simɛɛlɛ cha mna li mna gbo, mna mblɛ pe nsra yɛ ta pre ŋga yɛ, a pe kro na yɛshɔɔrɔ tɛɛ mna li, mna gbɔ, ŋgi na hin? Pra kee nyjɛ pra tɔɔnri mna yo pe pan yire nɔɔloo.
Pra Asɛkɛ Ble Kpɔɛ Yire Li
13 Nyiɛpɔ kre ble shiinwo kre na, a jlom loplombo pre, na srawɔfɛɛnlɛ pre, na Levi leele pre kro na sɛ fni mna Ezra ŋmba na wi mbra nyinafun wre wa lalaa, mbe u pe nyina mbra yire. 14 Pra nya mbra nyjɛ o Tafun Nyiɛkpɔɔ na Moses ŋga yire nu na, na Israel leele pre nyiɛpɔ kɔɔnashinwo kre ble kpɔɛ yire lii kre, ki fna mbe pe tni asɛkɛ nu. 15 A ki fna mbe pe ki kpali Jerusalem, na pe chiɛ yire kro na mbe tro. “Ndro kro fna mbe yili mbe sɛ nyambie lawee yire nu, mbe sɛ tinyi klɛ knumu mbe paan asɛkɛ yire pe, olive tinyi, na myrtle, na shuɛ klɛ, na tinyi wrɛ wee ni.”
16 A leele pre na yili mna sɛ tinyi klɛ yire cha mna pan mu asɛkɛ yire pe pe zio yire ndra na, na pe katoe lalaa, na Suminyuŋgo lawee vankam yire nu, na leele fnihaa ŋga kraa wa Nyumu Jlonwee kre nu, na ŋga kraa wa Ephraim Jlonwee wa kre nu. 17 Leele mblɛ pra yiri Babylon na mna pan pre kro na pe asɛkɛ kan mna yili mu sɛ tni yi nu. Mu yire Nun biblɔ ŋmba praa yeeri Joshua wre nyjila, na pe n yire ble yire li ma tun. Ki tia pe yiɛ na shɔ kpɔɔ mu tro. 18 A yire ble kɔɔnashin, nyjɛ nu praa yire ble yire lii yire nu kro, Ezra naa Nyiɛkpɔɔ mbra yire tɔɔnri na leele pre nyina. Ble kɔɔnatarɛ wo kre na, leele pre kro na fni titɛɛ mna Nyiɛkpɔɔ sumi, imi na mbra yire na pe nyina kre.