Fɛnkaari Chiɛ Yire
20
O Tafun Nyiɛkpɔɔ na yo Joshua pan na. 2 “Yo Israel leele pre pan na, pe fɛnkaari chiɛ nyjɛ kee wra yire Moses na mna yo pe pan yire wɔ. 3 Kena na ki pan na wa punu mu ndro gbo, a pra ufun chaa mbe gbo mbe fɔlɔ tɔ kre, kena u fɛ mbe sɛ ndra wa. 4 Na ki pan ma kre, ndro wre we jaa fɛ mbe sɛ yire chiɛ yire ka jlonwee nyu na, mbe sɛ u mandiɛ kro bɔ loplombo kala lifɛɛnlɛ pre pan. Na ki pan ma pie le na u ni chia kre lam, mbe u ŋga lawee mbe u tni. 5 Na ndro ŋmba u u chaa mbe gbo mbe fɔlɔ tɔ wre waa u kɔŋgɔ ni mu sɛ wa, chia kre leele waa shia u wɔ mbe ŋga. Ki fna mbe pe kɛ tɔ u na, ŋgi na hin? Ble ma u le, ndee mu tuwi mu u gbo. 6 Ki fna u tni chia kre na mbe sɛ su na pie sɛ u yire loplombo lalaa, mbe u kala li. Na ki pan na tuwi ma u tuwi yɛŋgɛ wala, kena u tni chia kre na mbe sɛ su nyjila ŋga nu o Tafun Nyiɛkpɔɔ Srawɔfun lopom ŋmba wraa wa u kee kre pe nyjila kre we ku. Na waa ku, kre we jaa ndru mbe sɛ u katoo, chia ŋga na u yiri kre na.”7 Kra tia pra yiɛ wa Jordan lɔɔ kre yila tohaa, mna Kedesh ŋga kraa wa Galilee tra nu, Naphtali nyambie lawee yire nu kre wɔ. Mna Shechem ŋga kraa wa Ephraim nyambie lawee, na Hebron ŋga kraa wa Judah nyambie lawee yire nu yire wɔ. 8 Jordan lɔɔ kre yila finhaa wa kre, bawa pra Bezer chia kre wɔ. Kraa wa na shie tablɔ tra gbeŋglen ŋga kraa wa Jericho yila finhaa kre nu, Reuben wolo tra nu. Pra Ramoth ŋga kraa wa Gilead lawee, Gad sele wolo tra nu kre wɔ. Na Golan ŋga kraa wa Bashan lawee Manasseh sele wolo tra nu kre. 9 Yire chiɛ nyjɛ Israel leele pre na wɔ, na pe wa, ndee fuŋu ŋmba uu wa mu tni pe tra nu, waa ndro fra mu gbo, a pra u chaa mbe gbo mbe fɔlɔ tɔ kre, mbe u jaa sɛ kaari wa. Na ki pan na wa sɛ kaari yire chiɛ nyjɛ ka na, na pe n u fun wre yire loplombo lalaa mu u kala li, ki n fna pe u gbo.