3 A Joshua na kna mna yo Israel leele pre pan mbo, “Nyjila ŋgi e sri mbe chiin sɛ tra ŋga o Tafun wre, e tolɛɛlɛ Nyiɛkpɔɔ wre e ŋga kre wru hin? 4 E leele tataarɛ wɔ e jlom yire kro na e ni ŋga, mbe ni pe tun, mbe pe sɛ kila mbe tra kre le poŋgo, kokoe nyjɛ pe chaa kre, mbe pe yi le, mbe paan yo ni pan. 5 E tra kre yɔ kɔɔnashin, Judah we tni pe lawee wa tapan haa, a Joseph we tni pe lawee kre nyjeeri haa. 6 E imi ee tra kre yɔɔlɛ gbee kɔɔnashin kre kee nyunɔ e pan e ni ŋga. Mbe kɛɛn tɛɛ, mbe yire yi na mbe yi yɔɔlɛ o Tafun Nyiɛkpɔɔ yiɛ na. 7 La, Levi sele leele pre wa tra kre ka ta, ŋgi na hin? Pre wo yi na, pie na sumi na o Tafun wre srawɔfɛɛnlɛ lɛ. Gad jlom, na Reuben jlom, na Manasseh jlom yɔɔ kre, pre klu mu ta Jordan lɔɔ kre yilafin haa wa. Bawa o Tafun Nyiɛkpɔɔ sumifun Moses wre na pe ŋga.”

8 Joshua na yo leele mblɛ pra wɔ mbe pe sɛ tra kre le pre pan mbo, “E sɛ tra kre le poŋgo, e pan e yo ni pan. Mbe tni Shilo na mna mbe kɛɛn tɛɛ, mbe o Tafun Nyiɛkpɔɔ wre wie imi mbe tra kre yɔɔlɛ mbe e ŋga.” 9 Ŋga Joshua na paara leele pre pan mu kɔ kre, pra sɛ tra kre le, mna imi pra tra kre yɔɔlɛ kɔɔnashin kre kee nyunɔ kro. Chiɛ nyjɛ yiraa wa wa kro, pra yi kee nyunɔ. Ŋga pra kɔ kre, a pra ndru mna sɛ Shilo na wa, mna sɛ Joshua bɔ mandiɛ. 10 A Joshua na kɛɛn tɛɛ mna o Tafun Nyiɛkpɔɔ wie, mna chin mu tra haŋa kre yɔɔlɛ mna Israel leele pre ŋga.

11 Benjamin jlom wolo pra klu mu pe wo ta. Pe tra kre naa wa Judah jlom, na Joseph jlom wolo tra lalaa. 12 A na mu yiɛ le nyjeeri haa, pe tra kre sam na yire Jordan lɔɔ kre na, mna sɛ su landɛɛ ŋga kra wa Jericho nyjeeri haa, mu na shie yila tohaa, mu tro nyuɛ yɛ na mna sɛ to tablɔ tra ŋga praa yeeri Beth-Aven kre na. 13 Sam kre na tro mu sɛ yili chia ŋga praa yeeri Luz kre landɛɛ ŋga kraa wa tapan haa wa kre na, chia kre mɛɛ ka na yi Bethel. Mna yire wa mu sɛ yili Ataroth-Addar ŋga kraa wa nyambie ka na, Beth-Horon tapan wo kre tapan haa.

14 Nyua ka naa wa mu yiɛ kan Beth-Horon chia kre na. Sam kre na da wa, mna kna mu yiɛ tɛɛ tapan haa, mna sɛ yili Kiriath-Jearim ŋga praa yeeri Kiriath-Baal kre na, kre chia kre na pe Judah jlom wolo wo. A bawa na yi pe yila tohaa sam kre nyu.

15 Pe tapan haa sam kre na yire Kiriath-Jearim nyu na, mna sɛ tro bloe nyjɛ praa yeeri Nephtoah kre lawee. 16 Sam kre na yire wa mna sɛ tro nyua ka jaara, a kraa wa mu mbra Hinnon landɛɛ kre na. A na mu sɛ nyjeeri haa, kra sɛ to landɛɛ ŋga praa yeeri Rephaim nu. A na mu sɛ tapan haa, kra sɛ tro Hinnon landɛɛ kre nu mu sɛ to Jebusite leele nyua chuuli kre tapan haa, mna yire wa mu sɛ to En-Rogel bloe yire lawee. 17 Sam kre na kna mu sɛ tro nyjeeri haa, mna sɛ tro En-Shemesh, na Geliloth na. Adummim nyua tro haa kre naa wa mu yiɛ kan Geliloth na. Mna yire wa mu sɛ to Bohan Reuben pɔ blɔ wre dnɛ kre na. 18 Kra yire bawa mu kna mu tii Jordan lɔɔ kre landɛɛ nyjeeri haa wa, mna ndru mu kna mu sɛ to landɛɛ kre nu. 19 Kra yire wa mna tro Beth-Hoglah nyua chuuli ŋga kraa wa na shie nyjeeri haa kre na. Mna yire wa mna sɛ lawee ŋga nu Jordan lɔɔ kre naa lee epo weŋge wo kre nu. Bawa na yi pe sam ŋga kraa wa na shie tapan haa.

20 Jordan lɔɔ kre chɔɔ, kre na yi pe sam na shie yila finhaa. Kena yire sam nyjɛ yira Benjamin jlom trɛ yire yɔɔlɛ.

21 Kakpɔɛ nyjɛ Benjamin sele leele pre na ta yi, Jericho, na Beth-Hoglah, na Emek-Keziz, 22 na Beth-Arabah, na Zemaraim, na Bethel, 23 na Avvim, na Parah, na Ophrah, 24 na Kepar-Ammoni, na Ophni, na Geba. Yi kro naa kakpɔɛ kɛmbɔshiin, yire na yi kabɛɛlɛ nyjɛ yira fɛ mu yi kun ni. 25 Kakpɔɛ nyjɛ yiraa wa mu ya na yi, Gibeon, na Ramah, na Beeroth, 26 na Mizpah na Kephirah, na Mozah, 27 na Rekem, na Irpeel, na Taralah, 28 na Zelah, na Haeleph, na Jebusite, a kre chɔɔ praa yeeri Jerusalem, na Gibeah, na Kiriath-Jearim, yire naa kɛmbɔjijirɛ, yire na yi kabɛɛlɛ ni. Yire trɛ nyjɛ Benjamin jlom na ta.