Joshua 17

Joseph biblɔ lopom na wi Manasseh, a Manasseh biblɔ lopom na wi Makir, a Makir biblɔ na wi Gilead. Pe jlom yire yira Gilead, na Bashan trɛ yire ta, ŋgi na hin? Pra ŋunɔ wi mu chin titi. 2 Manasseh jlom haŋa kre, pre na tra ta na shie Jordan lɔɔ kre yila tohaa, sele nyjɛ yira ki ta na lɛ, Abiezer, na Helek, na Asriel, na Shechem, na Hepher, na Shemida. Pre bilɛ mblɛ kro Joseph biblɔ Manasseh wre nanae na lɛ. A pre na lɛ pe sele yire loplombo.

3 Zelophehad lɛ na wi Hepher, a u tolɛɛlɛ na lɛ Gilead, na Makir, na Manasseh. Zelophehad nsra biblɔ se, bichiɛlɛ bri bri wra se, pre na lɛ, Mahlah, na Noah, na Hoglah, na Milcah, na Tirzah. 4 Ki ble ka pra sɛ yo srawɔfun Eliezer, na Nun biblɔ Joshua wre, na Israel loplombo pre pan mbo, “O Tafun Nyiɛkpɔɔ na yo Moses pan na, u o ŋga tra o sele wolo bibilɛ pre nu. Ki tia Joshua na pe ŋga tra pe sele wolo pre lawee, imi na o Tafun Nyiɛkpɔɔ na yo kre.”

5 Ki tia Manasseh nanae pre na trɛ kɛ ta, mu ya Gilead, na Bashan trɛ yire yiraa wa na shie Jordan lɔɔ yila finhaa kre nu. 6 Ŋgi na hin? Pra Manasseh nanae chiɛlɛ pre ŋga trɛ pe sele wolo bilɛ pre lawee. Kena Gilead tra kre, pra ki wru mna Manasseh nanae hamblɛ pre ŋga.

7 Manasseh jlom wolo pre tra ŋga pra ta kre sam na yire Asher chia kre na, mu sɛ to Micmethath ŋga kraa wa Shechem yila finhaa wa kre na. A na mu kna mu yiɛ tɛɛ tapan haa kre, sam kre na sɛ su leele mblɛ praa yeeri En-Tappuah pre sam na. 8 Tappuah naa wa Manasseh, na Ephraim wolo sam na. A, tra ŋga kra fɛ mu Tappuah kun kre rɛ, Manasseh nanae wo yi, la, chia kre titi rɛ, Ephraim nanae wo yi. 9 Na mu kna mu yiɛ tɛɛ tapan haa, pe sam kre na sɛ to Kanah lafolo kre nu. Chiɛ nyjɛ yiraa wa lafolo kre tapan haa kre kro, Ephraim sele leele wee na yi, nde yiraa wa Manasseh nanae tra nu. A, Manasseh wolo sam ŋga kra tro lafolo kre nyjeeri haa kre na sɛ su epo kre na.

10 Ephraim nɔɔ leele pre na ta na shie tapan haa, a Manasseh na ta na shie nyjeeri haa, a epo kre na pe pe sam, na shie yilatohaa. A Asher sele wolo naa wa pe sam na nyjeeri. A Issachar sele wolo naa wa pe sam na, na shie yila fin haa nyjeeri haa. 11 Issachar, na Asher trɛ yire nu chiɛ yɛ naa wa a praa yi yeeri Beth-Shan, na Ibleam, yire chiɛ yire na yi mbɛɛlɛ kabɛɛlɛ, mu wru mu ya Dor ŋga kraa wa na shie epo nyu na kre, na Endor, na Taanach, na Megiddo, na yi mbɛɛlɛ chiɛ yire kro na pe Manasseh jlom yire wee. 12 Manasseh sele wolo pre nsra ja mu Canaan leele mblɛ praa wa yire Kakpɔɛ yire na pre ni, ki tia Canaan leele na kro yire chiɛ yire na. 13 Hali ŋga Israel leele pre na kɔ mu nɛɛ mu ya kre, pe nsra pe ni, la, pra tia pra tni na tnumu tuni pe pan.

14 Ki ble ka, Joseph nanae pre na Joshua wie mbo, “Mni a mu o ŋga tra, a yi yila na o wolo hamblɛ pre ni hin? O sele leele pre nɛɛ, ŋgi na hin? O Tafun Nyiɛkpɔɔ wre o dwan.”

15 A Joshua na kna mbo, “Na e chin na e nɛɛ, a e nya na Ephraim nyuɛ lawee yire fiɛn e pan kre, kena e sɛ klɔ lawee tra kre nu, e sɛ lawee cha, e sɛ bawa fali e tni Perizzite, na Raphaim leele trɛ yire nu.”

16 A pra kna mbo, “Nyuɛ lawee yire n kpɔɔ o pan, a Canaan leele mblɛ pee wa mu tni Beth-Shan tra mbrɛrɛ kre na, na Jezreel landɛɛ kre, na yi mbɛɛlɛ chiɛ yire nu pre kroo wa na tɔɔnrɔ sookɛɛ wi wie ni.”

17 A Joshua na kna mna yo Ephraim, na Manasseh, jlom leelee pre pan mbo, “E nɛɛ, a ee faŋga ni, kena mbe e ŋga tra kre ka mbe ya. 18 Nyuɛ lawee tra kre kro we pe e wo. Kii wa na klɔ yi, ni chin na ee jaa ki fali mbe tni wa. A Canaan leele pre, ee jaa pe ni wa, hali pre na pe faŋga, na pe tɔɔnrɔ sookɛɛ yire ni kro, ee pe ja.”