Pra Tra Ŋga Kraa Wa Jordan//Lɔɔ Yila Tohaa Kre Yɔɔlɛ
14
Imi pra tra ŋga kraa wa Jordan lɔɔ kre yila tohaa wa yɔɔlɛ mna Israel leele pre ŋga yi kre. Eleazar srawɔfun wre, na Nun biblɔ Joshua, na Israel loplombo pre pra tra kre yɔɔlɛ mu leele pre ŋga. 2 Kɛɛn pra tɛɛ, mna chin imi pie tra kre yɔɔlɛ mbe sele kɔɔnanyjirɛ na yɔɔ nyjɛ yira kro yire ŋga. Imi na o Tafun Nyiɛkpɔɔ na yo Moses pan kre. 3 Moses na klu mu tra ŋga kraa wa Jordan lɔɔ kre yila finhaa kre yɔɔlɛ mna sele shiin na yɔɔ yire ŋga. 4 Joseph bibilɛ shiin pre, Manasseh na Ephraim, pre naa jlom shiin. Levi sele wolo pre rɛ, pe nsra pre ŋga tra, la, pra pe ŋga kakpɔɛ. Pra ta mu tni, mna lawee ta, mna pe yurɛ we na kaa. 5 Israel leele pre na tra kre yɔɔlɛ mna peyɛ ŋga imi na o Tafun Nyiɛkpɔɔ na yo Moses pan kre.Pra Caleb Ŋga Hebron Chia Kre
6 Ki ble ka, Judah wolo plɛ na sɛ Joshua pan Gilgal na. A Jephunneh biblɔ Caleb ŋmba na wi Kenizzite ndro wre na yo u pan mbo, “Mu kee ŋga o Tafun Nyiɛkpɔɔ na yire u sumifun Moses na mu yo mi na ŋu haa, nyjila ŋga ni o naa wa Kadesh-Barnea na kre sɔɔnri? 7 Na ni li yɛlɛ fuloe shiin, a Moses na yire Kadesh-Barnea na wa, mna ni tun na ni paan tra ŋga ju mbe le, mbe sɛ yo u pan. A ndaa pan, mna sɛ kee ŋga ndaa nya yo u pan kpra ni. 8 Bilɛ mblɛ mi na pre na sɛ pre na pan mna o leele pre le fiɛrɛ. La, mi rɛ, ndaa lɛɛ wɔ mna li o Tafun Nyiɛkpɔɔ, ŋmba wi ni Nyiɛkpɔɔ wre kee na. 9 Ki tia ki ble kre Moses na da mu ni ŋga mbo, ‘Tra ŋga na mu sɛ jele kan kre we pe ŋu, na mu biile, na mu nanae kro wo nyjila kro nu.’
10 Kena fuŋgaami ŋga, o Tafun Nyiɛkpɔɔ wre kɛ tɔ ni na, imi na wra nyu yo ni pan kre. A ŋga Nyiɛkpɔɔ na kre kee ŋga yo Moses pan, yɛlɛ fuloe shiin na kunɔ yi kre, a fuŋgaami ni li yɛlɛ fuloe jijirɛ na kunɔ. Kii wa na Israel leele nyaari lawee tataara nu, tablɔ tra kre nu mu tro. U ni ŋga ŋmaa imi na wra ki yo kre. 11 Nde faŋgaa wa ni nu tɛ, na ŋga ble Moses na ni tun kre yi. A faŋgaa wa ni nu mbe ni jaa sɛ ŋunɔ na ni jle kre yi. 12 Kena jande, ni ŋga nyuɛ lawee chiɛ nyjɛ kee o Tafun Nyiɛkpɔɔ na yo na we ni ŋga, ki ble ŋga mi na ni wolo pre na sɛ tra kre ju mu le, mu pan mu bɔ u pan kre. O na sɛ, mna pan mu yo e pan na legbakrɛ mblɛ praa yeeri Anak leele pree wa tra kre na, a praa wa kakpɔɛ nyjɛ pe mboe sin mu fɛ mu kun na. La, na o Tafun Nyiɛkpɔɔ wre ya ni na, mbe pe ni, imi na u ki yo ni pan kre.”
13 Joshua na Jephunneh biblɔ Caleb wre dwan, mna u ŋga Hebron chia kre, na u ki wru mbe pe u wo. 14 Hali aŋga bi, Hebron chia kree wa mu pe Caleb wo, ŋgi na hin? Wra li o Tafun Nyiɛkpɔɔ Israel leele Nyiɛkpɔɔ wre nyu kee na, na lɛɛ nunu ni. 15 Fa kre, na Hebron mɛɛ yi Arba kakpɔɔ. Arba naa wa na mɛɛ ni mu wɛ Anak sele leele pre na kro. Mu yire kre nyjila kre nu na shie, wejinyiŋge na pan tra kre nu, a ŋunɔ nsraa wa na.