Trɛ Nyjɛ Yira Kro Mbe Pe Wii Shɔ
13
Ŋga Joshua na lɛ kre, o Tafun Nyiɛkpɔɔ na yo u pan mbo, “Mu lɛ blɛlɔɔ, a trɛɛ wa tataara mbe mu wi mbe shɔ. 2 Yire trɛ yire yi, Philistia leele tra, na Geshur leele tra, 3 mu yire tra ŋga kii wa Shihor lɔɔ kre lawee, a kii wa Egypt tra sam na, na shie yila finhaa kre, mbe sɛ su Ekron ŋga kraa wa na shie tapan haa kre na. Philistia ŋulo praa chiɛ kunɔ nyjɛ le, yire yi Gaza, na Ashdod, na Ashkelon, na Gath, na Ekron, yi krɛrɛ Avvite leele tra na yi. 4 Canaan leele trɛ nyjɛ yiraa wa na shie tapan haa yire na yi, Arah ŋga na yi Sidon leele tra kre. Mu yire wa mu sɛ su Aphek ŋga kraa wa Amora leele sam na kre, 5 na Geba leele tra, na Lebanon tra kre kro, na shie yila finhaa wa. Mu yire Baal-Gad ŋga kii wa nyua Hermon kre tapan haa, mu sɛ su Lebo Hamath na.6 Yire trɛ nyjɛ krɛrɛ, Sidon leele trɛ yi, a yiraa wa nyuɛ lawee yire nu, Lebanon nyua kre na Misrephoth-Maim lalaa. Na Israel leele pre shie, Mi Nyiɛkpɔɔ we pre leele pre kro ni pe yiɛ. Kena le na mu kre tra ŋga yɔɔlɛ mbe pe ŋga mbe pe ta krɔyira, imi na ni ki yo mu pan kre. 7 Kena tra kre yɔɔlɛ mu sele kɔɔnanyjirɛ yire, na Manasseh sele yɔɔ kre ŋga.”
Pra Tra Ŋga Kraa Wa Jordan//Lɔɔ Yila Fin Haa Kre Yɔɔlɛɛ
8 Reuben sele, na Gad sele, na Manasseh sele yɔɔ haŋa kre, o Tafun Nyiɛkpɔɔ sumifun Moses wre na klu mu pre ŋga trɛ Jordan lɔɔ kre kro, na shie yila finhaa.
9 Pe trɛ nyjɛ pra ta yire naa wa mu sni mu sɛ yili Aroer chia ŋga kraa wa Arnon landɛɛ nyu na kre, na chia ŋga kraa wa Arnon landɛɛ kre lalaa, na tra mbrɛrɛ ŋga kra wa Medeba na Dibon lalaa kre kro. 10 Tra kre naa wa mu sni mu sɛ yili Ammon sam na, mu tro Amora chiɛ nyjɛ ŋunu Sihon ŋmba wraa wa Heshbon na wre naa le yire na. 11 Gilead tra kre na chaa, mu sɛ su Geshur, na Maacah trɛ yire na. Hermon nyua kre, na Bashan tra kre kro mu sɛ su Salecah na, yi kro na chaa. 12 Ŋunu Og na wi legbakrɛ mblɛ praa yeeri Raphaite leele pre haŋu, a wra ŋunumu li Ashtaroth na Edrei na, yire trɛ nyjɛ wraa le yire kro na chaa. Moses na klu mu wi na pre leele mblɛ ni mu pe ja, mna pe ni. 13 La, Israel leele pre nsra Geshur leele pre, na Maacah leele pre ni, pre na pre na chaa mu tni.
14 Moses nsra Levi jlom kre ŋga trɛ yire ka, o Tafun Nyiɛkpɔɔ wre na yo Moses pan na ŋga pre we ta yi sra yirɛ nyjɛ ni Israel leele pre we na paan mbra sra woni mbra wre o Tafun Nyiɛkpɔɔ wre kaan yire.
Tra Ŋga Pra Reuben Wolo Ŋga
15 Moses na Reuben jlom yire kro ŋga tra. 16 Pe tra kre na yi Aroer ŋga kraa wa Arnon landɛɛ nyu na kre, na chia ŋga kraa wa Arnon landɛɛ lalaa kre, na tra mbrɛrɛ ŋga kra wa Medeba chia kre lawee kre. 17 Yire chiɛ nyjɛ kro pra yi ta mu ya. Yire yi, Heshbon, na Dibon, na Bamoth-Baal, na Beth-Baal-Meon, 18 na Jahaz, na Kedemoth, na Mephaath, 19 na Kiriathaim, na Sibmah, na Zereth Shahar ŋga kraa wa nyambie ka na landɛɛ kre nu kre. 20 Na Beth-Peor, na nyua Pisgah, na Beth-Jeshimoth, 21 na chiɛ nyjɛ yiraa wa nyambie mbrɛrɛ na yire ni kro. Na Amora ŋunu Sihon ŋmba na wi ŋunu Heshbon na wre trɛ nyjɛ wraa le yire kro. Moses na wi mna wre ŋunu wre, na Midian ŋulo kro ja. Pre na ŋunu Evi, na Rekem, na Zur, na Hur, na Reba, a praa trɛ yire le Ŋunu Sihon pan. 22 Leele mblɛ Israel leele na gbo pre, Beor biblɔ ŋmba praa yeeri Balaam, a wra pe chlɛfun wre na chaa pe nu. 23 Jordan lɔɔ kre na yi Reuben jlom leele pre sam ŋga kraa wa na shie yila to haa kre. Kena yire kakpɔɛ nyjɛ, na yi kabɛɛlɛ yire pra Reuben jlom yire ŋga.
Tra Ŋga Gad Wolo Na Ta
24 Moses na klu mu Gad wolo pre ŋga tra jlom jlom. 25 Chiɛ nyjɛ pra ta kre na yi Jazer, na kakpɔɛ nyjɛ yiraa wa Gilead tra nu kre. Na Ammon leele tra kre yɔɔ, mu yire wa mu sɛ su Aroer ŋga kraa wa na shie Rabbah yila fin haa kre. 26 Pe tra kre na yire Heshbon na, mna sɛ to Ramath-Mizpah, na Betonim na. Mu yire wa mu sɛ to Mahanaim na, mu sɛ su Debir na. 27 Yire lawee nyjɛ kro naa wa Jordan landɛɛ kre nu. Beth-Haram landɛɛ kre na chaa pe pan. Kre na Beth-Nimrah, na Succoth, na Zaphon, ŋunu Sihon ŋmba wra ŋunumu li Heshbon na wre trɛ na yi. Pe yila tohaa sam nyu na sɛ su Jordan lɔɔ kre na, mna tro mu sɛ su Kinnereth tapla kre nyjeeri haa. 28 Yire kakpɔɛ yire, na yi kabɛɛlɛ nyjɛ pra Gad jlom wolo pre ŋga.
Tra Ŋga Pra Manasseh//Jlom Yɔɔ Wolo Ŋga
29 Moses na klu mu Manasseh sele yɔɔ ŋga tra Jordan lɔɔ kre kro, a pra chin mu lɔɔ kre kun. 30 Pe tra kre na yire chia ŋga praa yeeri Mahanaim, na Bashan tra ŋga ŋunu Og naa le kre kro, na Jair kabɛɛlɛ fuloe taarɛ nyjɛ yiraa wa Bashan tra nu yire, 31 na Gilead tra kre yɔɔ, na Ashtaroth, na Edrei. Yire chiɛ shiin nyjɛ na yi ŋunu Og kakpɔɛ titi, a yiraa wa Bashan tra nu. Yire tra yire pra Manasseh biblɔ Makir nanae pre yɔɔ ŋga.
32 Nyjila ŋga nu Moses naa wa Moab tra gbeŋglen kre nu, Jordan lɔɔ kre yila finhaa wa na shie Jericho na kre, kre wra trɛ yire yɔɔlɛ mna yire jlom yire ŋga. 33 La, Moses nsra Levi jlom wolo pre ŋga tra. Kee ŋga wra yo pe pan yi na, Israel leele pre srayirɛ nyjɛ pie na o Tafun Nyiɛkpɔɔ kaan yire yɛ pie na taa, imi na Nyiɛkpɔɔ na ki yo Moses pan kre.