2 Ki tia Jacob na yo u sele wolo pre, na leele mblɛ wre na pre naa wa mu tni pre pan mbo, “E sɛɛnlɛ nyjɛ yii wa e pan yire koli e sɛ yi wa, e weli, e e yirɛ kro je, e yirɛ fɔnyi wru e le. 3 O paan mbe yili mna mbe sɛ Bethel na, bawa mbe sragbunu sin mbe Nyiɛkpɔɔ ŋga. Wre wra ni talaa loo, mna ya ni na ni kanyana nyjila nu, a wre chɔɔ u yaa ni na lawee ŋga nu mbe sɛ kro nu.” 4 Ki tia pra pe sɛɛnlɛ yire kro koli mna Jacob ŋga, mna pe ndiile yirɛ wɔ wɔ mna ya u pan, a wra sɛ yi le tra oak tiŋge ŋga kraa wa mu mbra Shechem na kre nɔɔ na.

5 A pra yili na shie, a Nyiɛkpɔɔ fiɛrɛ na chiɛ nyjɛ yiraa wa mu mbra wa yire leele yii kpɔɔ, a pe nsra ja mna pe kɔŋgɔ ni. 6 Jacob na u leele pre kro na sɛ le Luz na, kre pe yeeri Bethel na chɔɔ, a kii wa Canaan tra nu. 7 Bawa wra sragbunu sin, mna lawee kre mɛɛ tɛɛ Bethel Nyiɛkpɔɔ. Ŋgi na hin? Bawa Nyiɛkpɔɔ na uyɛ wɔ mu u nyina, nyjila ŋga ni wraa feni mbe shɔ u nyjɔ Esau kɛɛ kre. 8 Ŋga Deborah, chlɔ ŋmba wra Rebekah pɔɔri wre na ku kre, kre oak tiŋge ŋga kra mbra Bethel na wa kre jaara chɔɔ pra u le. Ki tia pra lawee kre mɛɛ tɛɛ mbo, “Oak tiŋge ŋga jaara leele nyɛni.”

9 Nyjila ŋga ni Jacob na da Bethel na wa kre, na Mesopotamia na u yiri na paan, a Nyiɛkpɔɔ na ndru mna uyɛ wɔ mu u nyina na, mna u dwan Bethel na wa na. 10 Bawa Nyiɛkpɔɔ na yo u pan mbo, “Mu mɛɛ Jacob, la, mu yire aŋga na shie, pia mu yeeri Jacob na, mu mɛɛ yi Israel.” A Nyiɛkpɔɔ na u mɛɛ tɛɛ Israel. 11 A Nyiɛkpɔɔ na yo u pan mbo, “Mi wi Jaŋgafun Nyiɛkpɔɔ. Se mbe mu nɔɔ leele nɛɛ. Mu kaari waŋgra kpɔɔ ka, a waŋgrɛ we yili mu nɔɔ leele nu, a pan ŋulo we yili pe nu. 12 Tra ŋga ndaa Abraham na Isaac ŋga kre, mbe ŋu na mu nanae ŋga ki yi.” 13 A Nyiɛkpɔɔ na Jacob ti mna wra paara na u ni kre, mna sɛ. 14 A Jacob na dnɛ ka yire mu yire sholo lawee ŋga nu Nyiɛkpɔɔ na paara na u ni kre, mna simi gbɔwo, na olive simi kna mu wo ki na. 15 A Jacob na lawee ŋga nu Nyiɛkpɔɔ na paara na u ni kre yeeri Bethel.

16 A Jacob na u leele pre na yili Bethel na, ŋga kra kro chiɛri mbe pe le Ephrath na kre, se lɛɛ naa Rachel yaa, a u see na sheli. 17 Ŋga u see kre na sheli ma kre, a chlɔ ŋmba wra u yii mbe u se wre na yo u pan mbo, “Maa fiɛ Rachel. Ŋgi na hin? Biblɔ wi pɔ wre na.” 18 La, kre nyjila kre na kuu u kuu, a nyjila ŋga nu wra chaa fii kre, wra pɔ wre mɛɛ tɛɛ Ben-Oni, la, u lɛ na u mɛɛ tɛɛ Benjamin.

19 A Rachel na ku, a pra sɛ u le Ephrath kolo mɛɛ na, kre chɔɔ pe yeeri Bethlehem kre. 20 Jacob na dnɛ ka gbila mu yire Rachel faŋga kre na wa, kre dnɛ kre ki Rachel faŋga kre ndoo tnɔ, hali mu pan mu su aŋga na. 21 Israel na yiri wa na mna sɛ u yoŋgo nyuŋgo kan Eder nyuŋgo gedeŋge kre kro.

22 Ŋga Israel naa wa mu tni wa kre, u pɔ Reuben na sɛ sni na u lɛ bichrɔ Bilhah ni, a u lɛ Israel na ki loo, a krɔ na u kun kpɔɔ.

Jacob bibilɛ mblɛ wra se Mesopotamia na pre na lɛ kre.

27 Jacob na sɛ u lɛ Isaac pan Mamre na, chia kre naa wa mu mbra Kiriath-Arba ŋga praa yeeri Hebron kre na, kre chia kre na Abraham, na Isaac na da mu tni kre. 28 Isaac na li yɛlɛ lafaa, na fuloe jijirɛ, 29 wra lɛ blɛlɔɔ, mna chin mu ku, a u biile Esau, na Jacob na u le.