5 Ŋga Jacob na loo na Shechem u bichlɔ Dinah kla kre, kre nyjila kre na u bibilɛ pree wa nyaa na u yurɛ pre ni kahaa, ki tia u nsra nyu kun na ki kee ka ni, mna sɛ su na biile pre na yiri nyaa mu le.

6 Shechem lɛ Hamor na sɛ Jacob pan mbe pe sɛ paara. 7 Jacob bibilɛ pre na kee ŋga ki pan kre loo nyaa wa, mna pan katoo. Kee kre na pe yaa, a pe krɔ na kun kpɔɔ, na Shechem kre afuŋgo kee ŋga pe Jacob pɔ na, mu u cha mu pan na yɛkuuro ni Israel leele na. 8 A Hamor na yo Jacob bibilɛ pre pan mbo, “Ni biblɔ Shechem wre mu bichlɔ wre kori, kena jande, u wru mu u ŋga mbe u u leŋge. 9 Ti mbe o na oyɛ leŋgei, mbe e bichiɛlɛ leŋge o nu, mbe wre bichiɛlɛ leŋge e nu. 10 Na ki pan ma, wre na yire we jaa tni o tra ŋga nu, a tra kre ki sni mu sɛ kre, ee jaa tni ki nu, mbe tnumu tun mbe yaka ta ki nu.”

11 A Shechem na yo Dinah lɛ, na u lɛmblɛ pre pan mbo, “E nyu ni na, mbe e ŋga yira ŋga e chaa kro. 12 E ni ŋga fɔlɔ, na yirɛ nyjɛ nyini e chaa mbe shɔ ni pan kro, imi na yie da kpan, e ni nyina, mbe ki tɔ mbe e ŋga. Na ee ni ŋga bichable wre mbe ni leŋge wala.”

13 Ŋga wra pe jaa Dinah kla kre ndra na, kra tia Jacob bibilɛ pre n sra lɛɛ wɔ mu kee kre nyu wɔ Shechem, na u lɛ Hamor pan kpra ni. 14 A pra kna mna yo pe pan mbo, “Waa jaa kre kee ŋga sembremu pe. Waa ja mbe o jaa wru mbe blɔ ŋmba fɛŋgɛ pe n kun ŋga mbe u leŋge. Kie pe yɛkuuro kee mbe o ŋga. 15 Na oo ki nɔɔloo kuraa kre, fɔna e li ki na mbe bilɛ mblɛ pee wa e nu fɛnyi knumu na wre lɛ tun. 16 Na e pe ma, kre oo o bichiɛlɛ wru mbe e ŋga, mbe e leŋge, mbe wre e wolo wru mbe leŋge. Na ki pan ma, oo jaa tni mbe chaa e nu, mbe o pe leele nunu. 17 La, na yaa jaa li ki na mbe pe e fɛnyi knumu naa, kena oo o jaa wru mbe sɛ.”

18 Kre kala ŋga pra yo kre na tna Hamor, na u pɔ Shechem pan. 19 Titɛɛ kre nu, Shechem na pe nyaanyaa mna tia pra u fɛŋgɛ kun. Ŋgi na hin? Wraa Jacob bichlɔ wre chaa titi. Shechem na pe yirifuŋu ŋmba ndro kro naa kaan buuro u lɛ katoo leele nu.

20 Kre kee ŋga na tia Hamor, na u pɔ Shechem na sɛ yire chia kre jlonwee nyu na, mna paara mu pe chia kre leele nyina. 21 Pra yo mbo, “Pre leele mblɛ, leele chichiele lɛ, kena e ti mbe wre na pre tni o tra ŋga nu, tra kre ki sni vɛɛ mu sɛ kre, mbe praa tnumu tuni ki nu. Na ki pan ma oo jaa pe bichiɛlɛ wru mbe leŋge, mbe wre jaa o bichiɛlɛ wru mbe pe ŋga mbe pe leŋge na. 22 La, pre we li ki na mbe wre na pre tni, mbe pe leele nunu, na oo li ki na mbe o bilɛ fɛnyi knumu na pre lɛ wala. 23 Na o pe ma, pe yirɛ, na pe yurɛ kro we pe o wee. Kena e ti o li ki na, mbe wre na pre jaa tni.” 24 Chia kre bilɛ mblɛ pra yili mu sɛ chia kre jlonwee nyu na wa pre kro na li Hamor, na u pɔ Shechem kee kre na, a ki tia pra bilɛ mblɛ praa wa chia kre na kro fɛnyi knumu.

25 Ki ble taarɛwo na, na bilɛ pre fɛnyi klɛ n ta mu ku tun, a Jacob bibilɛ pre shiin, Levi, na Simeon, Dinah lɛmblɛ pre, na pe brɔfiɛnlɛ ŋunu bali mna sɛ chia kre tɔ, mna bilɛ mblɛ praa wa ki na kro gbo, a kra ndro kro fo chia kre na. 26 Pra Hamor, na u pɔ Shechem gbo na. Mna pe jaa Dinah wɔ Shechem katoo mna sɛ na u ni. 27 Ŋga pra leele pre gbo mna kɔ kre, Jacob bibilɛ pre kro na sɛ chia kre yirɛ foolo, pe jaa ŋmba pra kla wa kre ndra na. 28 Pra pe mbaala, na pe sikaala, na pe nui, na pe bubunlɔ, na pe yirɛ nyjɛ yiraa wa chia kre na kro koli, hali mna sɛ le pe seele yirɛ nu. 29 Pra yirɛ nyjɛ yiraa wa pe pan kalonyi nu kro foolo mu ya pe chiɛlɛ na pe biile na mna sɛ.

30 A Jacob na yo Simeon, na Levi pan mbo, “E tia ni kala ta, fuŋga Canaan leele, na Perizzite leele mblɛ pee wa tra ŋga nu ŋga we ni pra. Na kre yi ŋga ni leele n nɛɛ. Na leele mblɛ waa nyu nunu ta, mu pan mu o tɔ, pie o gbo peii.”

31 La, pra kna mna yo pe lɛ pan mbo, “Waa tni mbra le mbe pe o jaa pe na tɛtiɛrɔɔ wi.”