Jacob Na Sɛ Esau Fni
33
Ŋga Jacob na yili Peniel na mnaa shie kre, wra nya na Esau na u leele lafɛɛ jijirɛ pre paan, ki tia Jacob na u biile pre yɔɔlɛ mna Leah, na Rachel, na u tnichiɛlɛ shiin pre ŋga. 2 A wra tia u tnichiɛlɛ pre na yiɛklu na pe biile pre ni, a Leah na u biile pre na taa, a Rachel, na Joseph na kro tɔ. 3 Jacob na yiɛ klu pe kro pan, ŋga wre na u nyjɔ Esau na chaa fni kre, a wra lɛɛlɛ mu kosie kan ma gbee kɔɔnashin. 4 La, Esau na fɛ mna sɛ Jacob fni, mna u fa mu yii, mna kɛ le u lagboo, mna u gbenyi shiun. A pe kro shiin naa nyɛni. 5 Ŋga Esau na kna mu le mna chiɛlɛ pre, na biile pre nya kre, a wra Jacob wie mbo, “A leele mblɛ hin?” A Jacob na kna mbo, “Biile mblɛ Nyiɛkpɔɔ mu sumifun dumi mu u ŋga lɛ.”6 A u tnichiɛlɛ pre na pe biile na da wa, mna kosie kan Esau yiɛ. 7 A Leah na u biile pre na da wa, mna kosie kan u yiɛ na. Joseph na Rachel pra kro tɔ, a pra pan mna kosie kan u yiɛ na.
8 A Esau na Jacob wie mbo, “A leele, na yurɛ tataara mblɛ ni fni kolo ŋga, mni kre nyina hin?” A Jacob na kna mbo, “Ni tafun, imi mbe pe mbe mu yiɛshɔ ni na, kre ki tia.” 9 La, Esau na kna mbo, “Ni chunu, mblɛ pee wa ni pan nɛɛ titi, kena mu wolo pre wru.” 10 A Jacob na kna mbo, “Ɔɔhɔn, na mu chin na mu yiɛshɔ ni na, kena jande yurɛ mblɛ ni mu kaan ŋga shɔ. Ŋgi na hin? Imi na mu nyu ni na mu ni shɔ ŋga, ki ni pe na Nyiɛkpɔɔ yiɛ ni nyi mu yire. 11 Jande yurɛ mblɛ ni ni pan mbe mu kɛ ŋga shɔ. Ŋgi na hin? Nyiɛkpɔɔ ni dumi, a ni yirɛ nyjɛ yi ni shian kro ta.” Ŋga Jacob na kro na u tali suwi kre ndra na, ki tia Esau na yurɛ pre shɔ.
12 A Esau na yo mbo, “Ti mbe o kro chaa mbra shie.” 13 La, Jacob na yo Esau pan mbo, “Ni tafun, mu chin na faŋga n wa biile pre nu, a ki fna mbe ni mbaala, na nui mblɛ pan biile ŋgɔɔri pre dɔɔ ta na. Na o yo oo nyaari na pe ni kpakpaa ma to ble nunu, yurɛ pre we ku peii. 14 Kena ni tafun, jande yiɛklu mu sumifun pan mna shie, mbe taa mu kro na yurɛ pre, na biile pre ni brɛbrɛ, imi kie pe mbe o kro jaa le Seir na.”
15 A Esau na kna mbo, “Kena ti mbe ni ni leele pre plɛ ti mu pan.”
La, Jacob na yo mbo, “Ni tafun, ti mbe pe sɛ, kre n shian, la, chaa ni chaa mbe mu yiɛshɔ ni na.” 16 Ki tia ki ble kre, Esau na yire wa mna yiɛ klu na shie Seir na. 17 La, Jacob na sɛ Succoth na mna sɛ katoo ka sin mu tni wa, mna asɛkɛ yɛ sin sin u yurɛ pre pan. Kre ki tia praa lawee kre yeeri Succoth.
18 Ŋga Jacob na yiri Mesopotamia na mna pan mu tni Succoth na kre, mbakɔ wra yiri wa mna sɛ tni Canaan tra nu wejinyiŋge ni, mna sɛ u yoŋgo nyuŋgo kan mu mbra Shechem kakpɔɔ kre na, mna tni wa. 19 Jacob na kre tra kre kokoo ŋga na wra tni kre lɔ Hamor biile pan. Hamor biile pre wa na wi Shechem. Jacob na tra kre lɔ swafinyi lafaa. 20 Bawa wra sragbunu sin mna ki mɛɛ tɛɛ mbo, El-Elohe, Israel Nyiɛkpɔɔ.