3 Jacob na u bitumblɔ tun, a pra yiɛ klu mna sɛ u nyjɔ Esau pan Seir tra ŋga kii wa Edom waŋgra nu kre na. 4 Kee ŋga wra le pe nyu na mbe pe sɛ yo Esau pan na yi kre mbo, “Na e sɛ e yo ni tafun Esau pan na, kee ŋga mu sumifun Jacob yo o paan yo mu pan yi kre, mbo, ‘Ŋga ni sɛ tni Laban jaara mu pan mu su aŋga na, 5 ni nui, na bubunlɔ, na mbaala, na sikaala, na tinlɛ ta. Kena ni tafun, mi ni leele mblɛ tuni mu pan, imi kie pe mbe mu yiɛ shɔ.’”

6 Ŋga bitumblɔ pre na sɛ mu pan kre, a pra yo Jacob pan mbo, “O sɛ mu nyjɔ Esau pan wa, wre kuraa paan mbe mu fni. Wre na bilɛ lafɛɛ jijirɛ pe paan.” 7 Ŋga Jacob na loo ma kre, fiɛrɛ na u yii, a gbun na yɔ u na. A wra u leele pre yɔ shiin, mna u mbaala, na u sikaala, na nui, na u nyuuma pree yɔɔlɛ shiin shiin na. 8 Wra jawa na, “Na Esau waa pan mu yɔmu nunu tɔ kre, yɔmu haŋa kre we jaa fɛ mbe shɔ.”

9 A Jacob na nyiɛtali mbo, “Ni tolɛɛ Abraham, na ni lɛ Isaac Nyiɛkpɔɔ, o Tafun Nyiɛkpɔɔ, ŋu mna yo ni pan na, ni ndru mbe sɛ ni tra nu, ni sele leele pan, na mu ya ni na, mbe ni nyu. 10 A mu sumifun, ni n fna na mu latam, na imi na mu nyu ni na ŋga ni. Nyjila ŋga ndaa Jordan lɔɔ kre kun kre, na yaka n wa ni pan, na ni kanyie bɔkɔ, la, fuŋgaami ŋga, mi na ni leele, na ni yurɛ da feko shiin. 11 Ni mu tali, ni shɔ mu yili ni nyjɔ Esau kɛɛ. Ŋgi na hin? Ni fiɛ na we paan mi na ni chiɛlɛ na ni biile tɔ. 12 La, ŋu mna yo ni pan na, ‘mu ti mbe ni nyu, a mu ti mbe ni nanae nɛɛ na epo nyu tanyiɛ yi, mbe ndro wa jaa pe tɔɔnri.’”

13 Ŋga pra sni wa a nyiŋge na se kre, a Jacob na u yurɛ pre plɛ wɔ mbe sɛ u nyjɔ Esau kɛ. 14 Wra wɔ, sikaloolo lafɛɛ shiin, na kapilɛ fulo, na mbaloolo lafɛɛ shiin, na mbapilɛ fulo, 15 na nyuuma fulo na kɛ, na pe biile, na naloolo fuloe shiin, na nabilɛ kɛ, na bubunlɔ chiɛlɛ fulo, na pe bilɛ kɛ ni. 16 A wra yurɛ pre yɔɔlɛ mna u sumifɛɛnlɛ pre ŋga chɛchiɛri, mna yo mbo, “E yiɛ klu ni pan mbe ni taa, mbe e lalaa wa wa eyɛ pan, imi na ni yurɛ pre yɔɔlɛ mu e ŋga kre.” 17 A Jacob na yo u sumifun ŋmba u yiɛ klu pe pan wre pan mbo, “Na ni nyjɔ Esau waa mu fni mu mu wie na, ‘Mu tafun wi ŋmbi, a sena mu shie hin? Ndee, a ŋmbi wolo lɛ yurɛ mblɛ mu yiɛ ŋga hin?’ 18 Yo u pan na, ‘Mu sumifun Jacob wolo lɛ, a wra paan mbe u tafun Esau ŋga pe lɛ, a wre titii wa kro na paan.’” 19 Pan chɔɔ wra yo u sumifɛɛnlɛ pre pra taa yɛklo wre na pre kro pan mbo, “Na e waa Esau fni, e kre kee nunu ŋga chɔɔ yo u pan. 20 E le na e kro we yo Esau pan na, ‘Mu sumifun Jacob wa kro na paan.’” Ŋgi na hin? Jacob na jawa mbo, “Mbe u gbun nyiŋge yirɛ nyjɛ yi yiɛklu, a ndaa shie mbe sɛ u kɛ ŋga ni, kena mbakɔ, na mbaa u fni, aada we ni yiɛ le, mbe ni shɔ.” 21 Ki tia Jacob yurɛ mblɛ wraa shie mbe sɛ Esau kɛ pre na yiɛklu u na, a wre titi na sni pe ŋunu haa wa.

22 Ki ble kre blee, a Jacob na yiri mna u chiɛlɛ shiin pre, na u tnichiɛlɛ shiin pre, na u bibilɛ kɛmbɔnunu pre gbun mu nyi, mna pe wa kolo a pra Jabbok lɔɔ kre kun. 23 Ŋga praa shie kre, pra sɛ na u yirɛ kro ni mna u ti wa. 24 Kra kro Jacob nunu wa, a blɔ wa na pan mna wi na u ni chiin, a nyiŋge na pan na sii. 25 Ŋga blɔ wre na nya na u nsraa Jacob jani kre, a wra u gbun jekpɔlɔ na, a kra kpɔli. 26 A blɔ wre na yo Jacob pan mbo, “Ni wa mbe ni sɛ, nyiŋge chaa se.” A Jacob na kna mbo, “Mba mu wa mbe mu sɛ, fɔna mu ni dwan.”

27 A blɔ wre na kna mu Jacob wie mbo, “Mu mɛɛ ŋgi hin?” A wra kna mbo, “Ni mɛɛ Jacob.” 28 Blɔ wre na yo mbo, “Mu yire aŋga na shie, pia na mu yeeri Jacob na. La, mu mɛɛ yi Israel. Ŋgi na hin? Ŋu na leele wi, a ŋu na Nyiɛkpɔɔ wi, a mu wi mu yili yi nu kro.”

29 A Jacob na kna mu yo blɔ wre pan mbo, “Jande ni nyina mu mɛɛ ɛ!”

La, blɔ wre na kna mu Jacob wie mbo, “Ŋgi ki tia mna ni mɛɛ wie hin?” Titɛɛ kre nu wa to, a wra Jacob dwan. 30 A Jacob na yo mbo, “Ni Nyiɛkpɔɔ nya, mu je mu ŋmaa ta.” Ki tia wra lawee kre mɛɛ tɛɛ Peniel. 31 Nyjila ŋga nu Jacob naa yilii Peniel na kre, na yila fin, a wraa seei u jekpɔlɔ kre na. 32 Hali mu pan mu su aŋga, Israel nɔɔ leele na yurɔ jekpɔlɔ kapra ka, ŋga pra Jacob gbun u jekpɔlɔ na, a kra kpɔli kre ndra na.