4 Ŋga kra pan ma kre, Jacob na kla Rachel, na Leah pan na pe sɛ u fni lawee ŋga nu u yurɛ pre nyi kre nu. 5 Ŋga pra pan kre, a wra yo pe pan mbo, “Ni nya na e lɛ n na ni pini imi na wraa ni pini jle kre na, la, ni lɛ Nyiɛkpɔɔ wre ya ni na. 6 E kro shiin chin na ni ni faŋga kro tɛɛ mu tnumu tun mu e lɛ ŋga. 7 Ande u ni dnumu, mu ni fɔtɔɔrɔ chinɛ gbee nununu kɛ. La, Nyiɛkpɔɔ nsra u ŋga kolo a wra ja mna ni pe sisaa ka. 8 Nyjila ŋga ni Laban we yo mbo, ‘Na yurɛ pre waa se, a pe nini patipati, pre ni mbe mu fɔlɔ tɔ,’ yire titi e naa nyaa na, na yurɛ pre se, mbe pe biile pre kro nini mbe pe patipati. A na waa yo mbo, ‘Na yurɛ pre waa se, a pe kaanri kaanri, pre ni mbe mu fɔlɔ tɔ,’ e naa nyaa na, na yurɛ pre se, mbe pe biile pre kaanri kaanri kro. 9 Fuŋgaami, Nyiɛkpɔɔ e lɛ yurɛ pre shɔ u kɛɛ mu ni ŋga.

10 Ki ble ka, ndaa ŋunɛ ŋunu yurɛ pre nduu nyjila, na kapilɛ pre pe ndru kre, na pe nini patipati, mu kaanri kaanri. 11 A Nyiɛkpɔɔ nyjeeri bituŋu na yo ni pan ŋunɛ yire nu mbo, ‘Jacob!’ A ndaa yo, ‘Yoo.’ 12 A wra kna mbo, ‘Le imi na kapilɛ mblɛ pe ndru kre kro kaanri kaanri, mu pe patipati. Mi ni tia. Ŋgi na hin? Ni kee nyjɛ Laban mu pini yire kro nya. 13 Mi wi Nyiɛkpɔɔ ŋmba ndaa niyɛ wɔ mna mu nyina Bethel na, lawee ŋga nu mna dnɛ ka tɛɛ mna olive simi kna mu wo ki na, mna da mu ni ŋga kre. Fuŋga rɛ, muyɛ kna nyaanyaa mu ndru mu sɛ tra ŋga nu pra mu se kre nu.’”

14 A Rachel, na Leah na kna mbo, “Yakaa wa ndoo pan mbe o kɔɔ ta krɔyira na ree? 15 Kre yi ŋga, pan o lɛ o pini na fumblɔ lɛ. Wra o prɛ, mna o ndra swa shɔ mu li. 16 Yirɛ nyjɛ mu nya, a Nyiɛkpɔɔ shɔ o lɛ pan nyjɛ krɛrɛ, wre na o biile wee yi. Kena kee ŋga Nyiɛkpɔɔ yo mu pan kro, ki pe.”

17 Ŋga pra yo ma kre, a Jacob na yiri mna uyɛ kna, mna u chiɛlɛ na u biile wru mna taa u nyuuma pre na, 18 mna u yurɛ pre kro kɔɔnri, a pra yiɛ klu u pan, a wra yirɛ nyjɛ wra ta Mesopotamia tra nu wa yire kro wru, mna ndru mu sɛ u lɛ Isaac chia Canaan na. 19 Kre nyjila kre, na Laban sɛ u mbaala yooro knumu haa, a Rachel na u lɛ katoo sɛɛnlɛ ju. 20 Jacob na u nafun Laban Aramean wo wre fana, u nsra u kla mnaa feni mbe sɛ. 21 Ki tia wra ju fɛɛ, mna u yirɛ kro bali mna yili lawee kre nu nyaa nyaa, mna sɛ Euphrates lɔɔ kre kun, mna yiɛ le Gilead nyuɛ tra kre nu.

22 Blee taarɛ ble na, pra yo Laban pan na Jacob fɛ. 23 A Laban na u leele plɛ wru, a wre na pre na Jacob kɔŋgɔ ni ble kɔɔnashin, mna sɛ u da Gilead nyuɛ mbɛɛ tra kre nu wa. 24 Pe nsra ta mu fni, ki ble kre blee, a Nyiɛkpɔɔ na uyɛ wɔ mu Laban nyina ŋunɛ nu, mna yo u pan mbo, “Dɔɔ ta, mbe ma kee fɔɔn ka yo Jacob na.” 25 Jacob na sɛ u yoŋgo nyuŋgo kan Gilead nyuɛ mbɛɛ tra kre nu, kre lawee kre nu chɔɔ Laban na sɛ u da, a bawa chɔɔ Laban na u leele pre na sɛ pe yonyi nyinyi kan na.

26 Laban na Jacob wie mbo, “Yira ŋgi kee mu pe ŋga hin? Mu ni fana mu ni bichiɛlɛ bali na feni na pe ni, na ŋunɔ mu sɛ pe yii. 27 Yira ŋgi ki tia mu ni fana mu ju brɛmm na feni, a mu n kala ka yo ni pan ŋga hin? Na yoo mna yo ni pan, mbe na juru gbun, mbra yambrawa nyaara, mbra mɛɛ kɔ mbra e wa kolo na yɛshɔɔrɔ ni. 28 Hali mu n na tia ndaa ni nanae, na ni biile ta mu yo pe pan na, ‘E sɛ e pan aao.’ Jijiere kee mu pe kre. 29 Kaa nii wa jaŋga ni mbra jaa mu pe sisaa fuŋgaami, la, aŋge blee, mu lɛ Nyiɛkpɔɔ wre na ni jaari mbo, ‘Dɔɔta mbe ma kee fɔɔn yo Jacob na.’ 30 Ni chin na mu lɛ katoo la ki mu ta, a mna shie. La, ŋgi ki tia mu ni katoo sɛɛnlɛ ju hin?”

31 A Jacob na kna mu yo Laban pan mbo, “Fiɛrɛ kra ni yii. Ŋgi na hin? Ndaa jawa na mu mu bichiɛlɛ pre shɔ ni pan jaŋga na. 32 La, ndro ŋmba pan mu mu sɛɛnlɛ yire nya, u fun fna kumu ni. O yirɛ yire yi kre, yi zaanri o leele mblɛ yiɛ na, na maa mu yira ka nya, mu ki wɔ.” Kre nyjila kre, na Jacob n chin na Rachel wra Laban sɛɛnlɛ yire ju.

33 Ki tia Laban na sɛ le Jacob yoŋgo nyuŋgo nu mna ki zaanri, mna yili mu sɛ le Leah wo nu mu ki zaanri, mna yili wa mu sɛ le pe tnichiɛlɛ shiin pre nyinyi nu mna yi zaanri na, la, u nsra yaka nya. Kre kɔkro Laban na sɛ le Rachel wo nu. 34 Kre nyjila kre, na sɛɛnlɛ yiree wa Rachel pan, a u yi le u nyuuma krɛgɛ tapan mu tni yi na. A Laban na u yoŋgo nyuŋgo kre lamu zaanri kro, la, u nsra yaka nya. 35 Rachel na yo u lɛ pan mbo, “Ndoo, maa shia ti mu krɔkun. Mba jaa yiri mbe yire mu yiɛ. Ŋgi na hin? Ni kɛ ka.” A Laban na u sɛɛnlɛ yire cha mu la, u nsra yi nya.

36 Bawa Jacob krɔ na kun, a wra kna mu Laban wie mbo, “Kena linkuuro kee ŋgi ni pe hin? Ndee sisaa ŋgi ni pe ma, a mna ni tɔɔra ma ŋga hin? 37 Fuŋga mu ni yirɛ yire zaanri mu kɔ rɔ, mu katoo yira ŋgi nunu mu nya hin? Ki wɔ mu tɛɛ fimi na mbe mu leele pre, na ni wolo mblɛ ki nya, mbe o kro shiin kpra kun. 38 Ŋga mi na ŋu tni yɛlɛ fulo yi kre, a mu sikaala, na mu mbaala, wa n da mu lɛɛ wɔ tun, a ni n da mu mu mbapilɛ pre wa yii mu ka tun. 39 Nyaa yurɔ sisaa n da mu mu yurɛ pre wa yii, a ni pan na u kɔɔn ni mu mu nyina tun. Nyjila kro nu, na wa fun mbe ni wa le u titɛɛ. A na ki pan na pe yurɛ pre wa ju blee, ndee lafo na kuraa kre, mu u fɔlɔ shio ni pan. 40 Nyjila tataara nu pan yila naa ni gbuun, a pan weere naa ni kuu weere nyjila, ni nsra ja na sni mbe ŋunu. 41 Pan kra nyi yire yɛlɛ fulo nyjɛ mi na ŋu na tni yire kro nu. Yɛlɛ kɛmbɔjijirɛ ni ndaa tnumu tun mu pan, mu bichiɛlɛ shiin pre ndra na, mna yɛlɛ kɔɔnanu tɛɛ mna mu yurɛ le. A kre naa kɛ ni, mna ni fɔtɔɔrɔ chinɛ gbee nununu kɛ. 42 Na ni lɛ Isaac, na ni tolɛɛ Abraham Nyiɛkpɔɔ, na ni lɛ Isaac wre fiɛrɛ ma ki tia pe Nyiɛkpɔɔ wre yire ni kro, kaa mu na ni ni, mbe ndaa sɛ kɛ waara. La, Nyiɛkpɔɔ ni kanyana, na tnumu ŋga ni tun nya, mna mu yiɛ kee yo mu pan aŋge blee.”

43 A Laban na kna mu yo Jacob pan mbo, “Bichabɛɛlɛ mblɛ, ni wolo lɛ, a biile mblɛ na yurɛ mblɛ kro ni wolo lɛ. Kpra na, yirɛ nyjɛ mu nyaa ŋga kro, ni wee yi. La, ŋga mba jaa yaka pe mbe ni biile na ni nanae pre yii mbe tɛɛ kre waa, kre ki tia. 44 Kena ti mbe mi na ŋu nyu nunu pe, mbe ki pe dansiɛrɛ kee o lalaa.”

45 Ki tia Jacob na dnɛ ka gbila mna yire sholo lawee kre nu, mbe ki pe sɔɔnri yira. 46 Wra yo u leele pre pan na pe dnɛ yɛ nyu ble titɛɛ, a pra yi ble, mna tni yi jaara wa mna li. 47 A Laban na ki mɛɛ tɛɛ mbo, “Jegar Sahadutha.” A Jacob naa ki yeeri, Galeed. 48 A Laban na yo Jacob pan mbo, “Yire dnɛ nyjɛ o ble imi ŋga we pe dansiɛrɛ yira mi na ŋu lalaa.” Kre ki tia pra lawee kre yeeri Galeed. 49 Laban na lawee kre ŋga mɛɛ Mizpah na. Ŋgi na hin? Wra ndru mna yo mbo, “O Tafun Nyiɛkpɔɔ wra o le, nyjila ŋga mi na ŋu we yɔɔlɛ ŋga.” 50 A Laban na ndru mna yo mbo, “Na maa ni bichiɛlɛ mblɛ fiŋge, ndee na maa chiɛlɛ plɛ wru mu ya pe na, kii wa na ni n na mu nyaa woi, a nde sɔɔnri na Nyiɛkpɔɔ wi dansiɛfun mi na ŋu lalaa.” 51 A Laban na ndru mu yo Jacob pan mbo, “Le, dnɛ nyjɛ o fa mu ble yire yi kre, a dnɛ ŋga ni yire mu yire sholo mbe ki pe sɔɔnri yira mi na ŋu lalaa kre yi kre. 52 Dnɛ nyjɛ o fa mu ble ŋga, na dnɛ ŋga ni yire mu yire sholo ŋga, dansiɛrɛ yirɛ yi mi na ŋu lalaa. Mba daa yi tro, mbe pan mu lawee, mbe paan mu pe kee sisaa ka. A maa shia da mbe yi tro, mbe pan ni lawee mbe paan ni pe kee sisaa ka. 53 Abraham, na Nahor Nyiɛkpɔɔ wre we o kpra kun.” A Jacob na Nyiɛkpɔɔ ŋmba u lɛ Isaac fiɛ wre mɛɛ tɛɛ mna da mu le pe lalaa, na ki fna mbe pe li pe nyu yoo kre na. 54 Jacob na yurɔ gbo nyua kre na mna tɛɛ mu sra wɔ, mna sro pe mu u leele pre yeeri, a pra pan mu li. Ŋga pra li mu kɔ kre, pra sni nyua kre na wa a nyiŋge na se. 55 Ŋga nyiŋge na se bnimi pupu, Laban na u nanae, na u biile pre gbenyi shiun shiun, mna pe dwan, mna ndru mu sɛ u katoo.