2 A Jacob krɔ na kun na Rachel ni, a wra yo mbo, “Mi wi Nyiɛkpɔɔ ra? Nyiɛkpɔɔ u tia mu n na sii, mi ma.”

3 A Rachel na yo mbo, “Ni tnichlɔ Bilhah wi kre, sni na u ni mbe u biile se mbe ni ŋga. Kre kolo ŋga na, pie yire u na mbe ni yeeri biile lo.” 4 Ki tia wra u tnichlɔ Bilhah wre wru mna u plɔ ŋga, a wra sni na u ni. 5 Bilhah na siire ta mna biblɔ se mu Jacob ŋga. 6 A Rachel na yo mbo, “Nyiɛkpɔɔ ni kala li mu ni ŋga. U ni nyiɛtalaa loo mu ni ŋga biblɔ.” Ki tia wra u mɛɛ tɛɛ Dan. 7 Bilhah na siire ta na mna biblɔ shiin wo se mu Jacob ŋga. 8 A Rachel na yo mbo, “Mi na ni nyjɔ nyjira mu mu, la, fuŋga rɛ ni wi mu yili.” Ki tia wra pɔ wre mɛɛ tɛɛ, Naphtali.

9 Ŋga Leah na nya na u yire, u nsraa sii kre, a wre na u tnichlɔ Zilpah wru mna Jacob ŋga, a wra leŋge na. 10 A Leah tnichlɔ Zilpah na biblɔ se mna Jacob ŋga. 11 A Leah na yo mbo, “Ni nyiɛ nyu.” Ki tia wra u pɔ wre mɛɛ tɛɛ Gad. 12 Zilpah na ndru mna biblɔ se mu Jacob ŋga na, 13 A Leah na yo mbo, “Le na ni yiɛ shɔ ma! Fuŋga chiɛlɛ we na ni yeeri yɛshɔɔrɔfun.” Ki tia wra u mɛɛ tɛɛ Asher.

14 Ŋga yua kun nyjila na da kre, Reuben na sɛ nyaa mna sɛ mandrake tiŋge sɛnyi yɛ knumu mu pan mu u lo Leah ŋga. Rachel na yi nya mna yo Leah pan mbo, “Jande, ni ŋga mu pɔ wre mandrake yire yɛ.”

15 La, Leah na kna mbo, “Kena ŋga mu ni plɔ shɔ ŋga, kre n yila ma tun ra? Kena ni biblɔ mandrake mu shɔ mbe yaa?”

A Rachel na kna mbo, “Na mu ni ŋga mandrake yire yɛ, mbe ti ŋu na Jacob sni aŋga.”

16 Ŋga Jacob na yiri nyaa na lee yilakɔŋgɔ kre, Leah na yiri mna sɛ u fni mna yo u pan mbo, “Mu sni na ni ni aŋga. Ŋgi na hin? Ni ni pɔ mandrake yɛ tɛɛ mu mu lɔ, mu mu fɔlɔ tɔ.” Ki tia ki ble kre blee, wra sni na u ni.

17 Nyiɛkpɔɔ na Leah nyiɛtalaa loo, a wra siire ta, mna biblɔ ŋmba u taa kunɔ se. 18 A Leah na yo mbo, “Nyiɛkpɔɔ ni ŋga ni fɔtɔɔrɔ, ŋga ndaa ni tnichlɔ wru mu ni plɔ ŋga kre na.” Ki tia wra u pɔ wre mɛɛ tɛɛ Issachar. 19 Leah na ndru mna siire ta, mna biblɔ ŋmba u taa kɔɔnanu se mu Jacob ŋga. 20 A Leah na yo mbo, “Nyiɛkpɔɔ ni kɛ yira chichie. Fuŋga ni plɔ we ni ŋga buuro. Ŋgi na hin? Ni bibilɛ kɔɔnanu se mu u ŋga.” Ki tia wra u pɔ wre mɛɛ tɛɛ Zebulun. 21 Mbakɔ Leah na bichlɔ se, mna u mɛɛ tɛɛ Dinah.

22 Kre nyjila kre Nyiɛkpɔɔ na nyu Rachel na, mna u nyiɛtalaa loo, mna u ŋga biseere na. 23 A wra siire ta mna biblɔ se. A wra yo mbo, “Nyiɛkpɔɔ ni nyifɛɛrɛ laa ni na.” 24 Ki tia wra pɔ wre mɛɛ tɛɛ Joseph, mna yo mbo, “O Tafun Nyiɛkpɔɔ u ni ŋga biblɔ mbe ya na.”

25 Ŋga Rachel na Joseph se mu kɔ kre, Jacob na yo Laban pan mbo, “Ni ŋga kolo mbe ni ndru mbe sɛ ni chia. 26 Ni ŋga ni chiɛlɛ, na ni biile mblɛ na ni yila mu mu sumi kre, mbe ni sɛ. Ŋgi na hin? Ŋu titi chin imi na ni mu sumi chichie mu da.”

27 La, Laban na kna mu yo u pan mbo, “Ti mbe ni kee ŋga yo mu pan. Ndaa chlɛ mu nya na, o Tafun Nyiɛkpɔɔ wre yire mu na mu ni dwan. 28 Kena imi mu chaa mbe ni mu fɔlɔ tɔ mbe da nyini, mbe ni ki tɔ mbe mu ŋga.”

29 A Jacob na kna mbo, “Mu chin imi na ni tnumu tun mu pan mu da. A mu chin imi na mu yurɛ pre nyu ni kɛɛ mu da. 30 Yurɛ chiɛri mblɛ praa wa mu pan, a ndaa chin mu pan pre nɛɛ mu ya, a lawee ŋga nu mbe sɛ yurɛ pre ni kro, o Tafun Nyiɛkpɔɔ mu dwan, a yurɛ pre nɛɛ. La, fuŋga ki da mbe ni mi, na ni chiɛlɛ, na ni biile jawa.”

31 A Laban na u wie mbo, “Kena yira ŋgi ni mu chaa mbe ni mu fɔlɔ tɔ hin?”

A Jacob na kna mbo, “Maa ni ŋga yaka, la, kala nunu ŋga mbe yo mu pan ŋga pe mu ni ŋga. Mbe tni mbra mu yurɛ pre le mu pan. 32 Ni chaa mbe mu ti ni le mu yurɛ pre nu aŋga, mbe mbaala na sikaala mblɛ pe nini patipati, mu pe brabra, na mbaala biile mblɛ pe wɔ duu le mbe wɔ mbe yili pe nu, ni fɔtɔɔrɔ ŋga ni chaa kro yi. 33 Kena mbakɔ na maa pan mu ni yurɛ pre le, mu nya na kprafun wi mi, a na maa ni mbaala na ni sikaala pre nya, na pe n nini patipati, ndee mu pe brabra, a mbaala biile pre n wɔ duu kre, kena mu chin na ni mu wolo ju.”

34 A Laban na yo mbo, “Ni loo. Oo ki pe imi na mu yo kre.” 35 La, ki ble kre lam, Laban na kapilɛ mblɛ pra kaanri kaanri, na pe mblɛ pra nini patipati, na sikaloolo mblɛ pra nini patipati, na pe mblɛ nu finyi na chaa, na mbaala biile mblɛ pra wɔ duu kro le mu pe wɔ, mna pe wru mu le u bibilɛ pre kɛɛ, a praa pe le. 36 Laban na uyɛ kun Jacob na na yurɛ pre ni, mna nyaari ble taarɛ, mna sɛ haalee. A Jacob na kro wa mnaa Laban yurɛ pre hamblɛ le.

37 Jacob na almond, na poplar, na plane tinyi klɛ knumu, mna yi krɔɛ yire yɛ gboori yi na, a yi bie yire naa nyaa mu fniŋge. 38 Wra sɛ tinyi klɛ yire tɛɛ tɛɛ yurɛ pre gbɔ haa, imi kie pe na pe pan gbɔ haa mbe pe yi nya. Kena na yurɛ pre nduu nyjila da, a pe pan gbɔ haa kre, 39 kɛɛn yire ndoo wa praa peyɛ ndru, ki tia na yurɛ pre wa se, mu nya na u kaanri kaanri, ndee mu nini patipati.

40 Jacob na yurɛ biile pre wɔ mu tɛɛ titɛɛ mbe pe pe u wolo, mna u yurɛ pre bilɛ pre chaa Laban yurɛ chiɛlɛ pre nu, mbe ki ti na pe se mbe pe biile pre nini patipati mbe pe brabra. Kre kolo ŋga na Jacob na yire mna u yurɛ ta, a u nsra pe chaa Laban wolo pre nu.

41 Na yurɛ pre chiɛlɛ gbagbambla pre nduu nyjila da, mbe Jacob sɛ tinyi klɛ yire tɛɛ tɛɛ pe gbɔ haa wa, imi kie pe mbe pe nduu kɛɛn yire lawee wa. 42 La, na ki pan na faŋga n wa yurɛ pre nu kre, Jacob wa kɛɛn yire tɛɛ wa. Kena na u pe pe ma, yurɛ mblɛ nu faŋga nyi pre we sɛ wre Jacob pan, mbe mblɛ nu faŋga n wa pre kro Laban pan. 43 Kre kolo ŋga Jacob na wru ŋga na tia wra nyu yaari, mna sikaala na mbaala ta tataara, mna tinlɛ chiɛlɛ na bilɛ ta, mna nyuuma, na bubunlɔ ta tataara.