4 Jacob na mbaala lefɛɛnlɛ pre wie mbo, “Ni wolo, sena e yiri hin?” A pra kna mbo, “Haran na o yiri.” 5 A wra kna mbo, “E Laban, Nahor nana wre chiin?” A pra kna mbo, “Ɛnhɛɛn, o u chin.” 6 A wra pe wie mbo, “Uu gbaŋmbaa?” A pra kna mbo, “Ɛnhɛɛn, uu gbaŋmba, le, u bichlɔ Rachel u paan na u mbaala ni wa kre.” 7 Jacob na yo mbo, “Na yila n ta mu kɔ, kena yaa yurɛ pre ble titɛɛ ma, e pe ŋga nyumu e ndru e sɛ na pe ni kahaa.”

8 A mbaala lefɛɛnlɛ pre na kna mbo, “Fɔna mbaala pre kro pan mu fni, mbe o dnɛ kre gbila mbe laa kɔlɔ kre nyu na, mbe pe ŋga nyumu mbe pe gbɔ.”

9 Nyjila ŋga ni Jacob naa paara na pe ni kre, a Rachel na da wa na u lɛ mbaala pre ni. Ŋgi na hin? Wre wraa mbaala pre le. 10 Ŋga Jacob na Rachel nya na u nalɔ Laban mbaala pre ni kre, wra sɛ dnɛ kre gbila mu laa kɔlɔ kre nyu na, mna nyumu ko mu yurɛ pre ŋga a pra gbɔ. 11 A Jacob na sɛ Rachel gbenyi shiun, mna gble fɔɔri mu le na nyɛni. 12 Bawa wra yo Rachel pan na u lɛ sele ndro wi, a u lo mɛɛ Rebekah. A Rachel na fɛ mna sɛ mandiɛ kre bɔ u lɛ pan. 13 Ŋga Laban na u jaa pɔ Jacob kee kre loo kre, a wra fɛ mna sɛ u fni, mna u fa mu yii, mna u gbenyi shiun, mna sɛ na u ni katoo. Bawa Jacob na mandiɛ bɔ Laban pan. 14 Laban na yo mbo, “Yɛŋgɛ yi, ni nyimi ndro titi wi ŋu.” Ŋga Jacob na tni wa kie pe nyiɛpɔ nunu kre, 15 Laban na yo u pan mbo, “Maa yo na ŋga mu sele ndro wi mi kre ndra na, mu tnumu tun ni pan finfin. Ni nyina fɔtɔɔrɔ ŋga ki fna mbe ndaa mu kaan?” 16 Laban bichiɛlɛ naa shiin, lopom wre mɛɛ na yi Leah, a ble wre mɛɛ na yi Rachel. 17 Leah nyiɛlɛ bie na nyu, la, Rachel na nyu titi, mna pe niŋge ni.

18 Jacob na Rachel kori, ki tia wra yo Laban pan mbo, “Na mu ni ŋga Rachel mbe ni leŋge, mbe tnumu tun mu pan yɛlɛ kɔɔnashin.”

19 A Laban na yo mbo, “Na ni mu ŋga u wi prɔ, ŋga mbe letlo ŋga u wi na, kena ti mbe mi na ŋu tni.” 20 Ki tia Jacob na Laban sumi yɛlɛ kɔɔnashin, imi kie pe mbe u Rachel ta mbe leŋge, ande pan yɛlɛ yire na pe u yiɛ na, na ble chiɛri yɛ yi, ŋga wra Rachel kori kre na.

21 A Jacob na yo Laban pan mbo, “Fuŋga rɛ, nyjila kre da, ni ŋga ni chɔ, ni chaa mbe mi na wre tni.” 22 Ki tia Laban na bijasro pe mna kɛ wa mu leele yeeri, a pe kro na chaa mu li. 23 La, ŋga ble na wɔ kre, a Laban na tia pra sɛ Leah sniŋge Jacob kro, ki tia wra sni na u ni, mna Rachel ti. 24 Kre nyjila kre Laban na u tni chlɔ Zilpah wru mu u pɔ Leah ŋga, a wra pe u sumifun. 25 Jacob na jawa na Rachel ni u sni, la, ŋga nyiŋge na se bnimi kre rɛ, jaa na Leah wi. Ki tia wra sɛ Laban wie mbo, “Yira ŋgi kee mu ni pe ŋga hin? Rachel na ni yila mu mu sumi, Mni a mu ni fana ma hin?”

26 A Laban na kna mbo, “O pan mna paala ma na mu klu mbe pɔ ble wru mbe blɔ ŋga, mbe lopom wre ti. 27 Frɔ mu ble kɔɔnashin bijam ŋga pe mu kɔ, mbe ni Rachel wru mbe ya mu pan, na mu ni sumi yɛlɛ kɔɔnashin na mbe ya wala.”

28 Jacob na li ki na, a wre na Leah na bijam kranu kre li mna kɔ, a Laban na u pɔ Rachel wru mna Jacob ŋga na u chɔ wi. 29 Laban na u tnichlɔ Bilhah wru mu Rachel ŋga, a wra pe u sumifun. 30 Jacob na sni na Rachel ni mu ya, mna wre kori mu wɛ Leah na. Ŋga wra Rachel leŋge mu ya Leah na mu kɔ kre, a wra Laban sumi yɛlɛ kɔɔnashin na mu ya.

31 Ŋga o Tafun Nyiɛkpɔɔ na nya na Jacob nsraa Leah kee chaa kre ndra na, wra u ŋga biseere, mna tia Rachel wre na pe gbende. 32 Leah na siire ta, mna biblɔ se, mna u mɛɛ tɛɛ Reuben. Ŋgi na hin? Kee ŋga wra yo yi mbo, “O Tafun Nyiɛkpɔɔ ni kanyana nya. Fuŋga ni chin na ni plɔ we ni kori titi.” 33 Wra ndru mna siire ta, ŋga wra biblɔ se na kre, a wra yo mbo, “Nyiɛkpɔɔ ni ŋga biblɔ na. Ŋgi na hin? O Tafun Nyiɛkpɔɔ nya na ni plɔ n na ni chaa.” Ki tia wra u mɛɛ tɛɛ Simeon. 34 Wra ndru mna siire ta na, mna biblɔ se. A wra yo mbo, “Fuŋga rɛ, ni plɔ we kun mbe mbra ni na. Ŋgi na hin? Ni bibilɛ taarɛ se mu u ŋga.” Ki tia wra u mɛɛ tɛɛ Levi. 35 A wra ndru mna siire ta na mna biblɔ se, mna yo mbo, “Fuŋga rɛ, mbe o Tafun Nyiɛkpɔɔ ŋga mɛɛ.” Ki tia wra u mɛɛ tɛɛ Judah. Kre nyjila kre nu wra yire, u nsraa sii na.