28
Ki tia Isaac na Jacob yeeri, mna dwan mu u ŋga, mna yo u pan mbo, “Maa shia Canaan bichable leŋge. 2 La, sɛ Mesopotamia na, mu tolɛɛ Bethuel katoo, mu sɛ mu nalɔ Laban bichiɛlɛ pre wa cha mu leŋge. 3 Jaŋgafun Nyiɛkpɔɔ wre u mu leŋgeere dwan, mbe ti mu biile, na mu nanae nɛɛ, mbe sɛ su na mu pe waŋgrɛ yɛ tolɛɛ. 4 Nyiɛkpɔɔ u mu nɔɔ leele dwan Abraham dwamu kre ni, mbe ki ti mu tra ŋga na mu nyi mu tni na fuŋu wi ŋga ta mbe tni, kre tra ŋga Nyiɛkpɔɔ na Abraham ŋga kre.” 5 A Isaac na Jacob wa kolo, a wra sɛ Mesopotamia na u nalɔ Laban, Bethuel pɔ ŋmba wra pe Aramean wo wre pan. Rebekah biile na lɛ Jacob na Esau, a Rebekah lɛm na wi Laban.Esau Na Chlɔ Fɔŋgɔ Leŋge
6 Esau na chin na u lɛ Isaac Jacob dwan mu u wa kolo, a u sɛ Mesopotamia na chlɔ cha haa mbe leŋge. Wra chin na ŋga Isaac na u dwan kre, wra yo na waa shia Canaan chlɔ leŋge. 7 Wra nya na Jacob na li u lɛ na u lo nyu kee na mu sɛ Mesopotamia na.
8 Esau na chin na u lɛ Isaac yiɛ n nsraa shɔ Canaan chiɛlɛ pre na. 9 Ki tia wra sɛ Abraham pɔ ŋmba praa yeeri Ishmael wre pɔ chlɔ Mahalath wru mu leŋge, Mahalath lɛm na wi Nebaioth.
Jacob Na Ŋunɛ Ŋunu Bethel Na
10 Jacob na yili Beersheba na mna yiɛ le na shie Haran tra nu. 11 Ŋga wraa shie kre, yila na sɛ u to kolo, a wra ŋunuu wa. Ŋga wra yo we sni kre, a wra dnɛ ka wru wa mna tɛɛ mu ndra gbun. 12 Ŋga wra sni kre, wra ŋunɛ ŋunu mna nduu kaan ka nya, na ki yire tra mu sɛ su nyjeeri, a nyjeeri bitumblɔ naa nyaari ki na na shie nyjeeri na paan. 13 Bawa wra yiɛ yire mna o Tafun Nyiɛkpɔɔ nya. A wra yo u pan mbo, “Mi wi mu Tafun wre, mu lɛ Isaac na mu tolɛɛ Abraham Nyiɛkpɔɔ wre. Mbe ŋu na mu nɔɔ leele ŋga tra ŋga na mu nyi mu sni ŋga. 14 Mu nɔɔ leele we nɛɛ na tablɔ yi, mbe sɛ yila tohaa, na yila finhaa, na nyjeeri, na tapan haa, a ŋu na mu nɔɔ leele na tra leele kro we yire mbe dwamu ta. 15 Mbe ya mu na, mbe kɛ tɔ mu na lawee ŋga nu mu sɛ kro nu, a mbe ndru mbe pan na mu ni tra ŋga na. Mba mu ti, mbe sɛ su nyjila ŋga nu mbe ni nyu ŋga ni yo mu pan ŋga kee pe.”
16 Ŋga Jacob na ŋunu mu nyi kre, a wra yo mbo, “Jaa o Tafun Nyiɛkpɔɔ wa lawee ŋga nu, a ni n chin.” 17 Fiɛrɛ na u yii, a wra yo mbo, “Lawee ŋga kala pe fiɛrɛ ni titi! Lawee waa ma, na Nyiɛkpɔɔ katoo bɔkɔ, Nyiɛkpɔɔ katoo jlonwee nyu yi kre.”
18 Ŋga Jacob na yiri bnimi pupu kre, a wra dnɛ ŋga na wra ndra gbun kre yire mna yire sholo, mna olive simi kna mu wo ki na, 19 mna lawee kre mɛɛ tɛɛ Bethel. Jle kre, na chia kre mɛɛ yi Luz. 20 A Jacob na da mna Nyiɛkpɔɔ ŋga mbo, “Nyiɛkpɔɔ, na mi na ŋu oo sɛ, mbe mu kɛ tɔ ni na kolo ŋga ni kuun ŋga nu, mbe mu ni ŋga sro mbe ni li, na yirɛ mbe ni ni wejiŋge krafa, 21 mbe ni sɛ mbe ndruu pan ni lɛ katoo kre, kena mu pe ni Nyiɛkpɔɔ. 22 A dnɛ ŋga ni yire sholo mna ŋga we pe Nyiɛkpɔɔ katoo, a yirɛ nyjɛ mu ni ŋga yire kro, mbe yi yɔ kɛ mbe mu ŋga yi nunu.”