2 A Isaac na yo mbo, “Mu nya na ni lɛ, a ni n chin ŋga ble mbe ku. 3 Kena mu bɛŋɛ na mu snimi bali, mu sɛ nyaa mu sɛ yurɔ gbo, 4 mu pan mu sro ŋga ki tna ni pan pe mu ni ŋga. Na mbaa li mu kɔ, mbe ni mu dwan haŋa mbe chiin ku.”

5 Nyjila ŋga nu Isaac naa paara Esau ni kre, na Rebekah wa na ndru pe pan. Ki tia ŋga Esau na sɛ nyaa yurɔ cha haa mbe pan kre, 6 a Rebekah na yo u pɔ Jacob pan mbo, “Ni loo fuŋgaami na mu lɛ yuu mu nyjɔ Esau pan mbo, 7 ‘Sɛ nyaa lam yurɔ cha mu gbo, mu pan mu sro pe mu ni ŋga. Na ndaa li mu kɔ mbe ni mu dwan o Tafun Nyiɛkpɔɔ yiɛ na, mbe chiin ku.’” 8 A Rebekah na yo na mbo, “Kena ni pɔ, loo ni pan, mu kee ŋga mbe yo ŋga pe. 9 Sɛ le o yurɛ pre nu mu sikaala nyinafɛɛnlɛ shiin wɔ mu pan mu gbo, mbe ni sro ŋga mu lɛ chaa kre ka pe u pan. 10 Na ni ki pe mu kɔ, mbe mu sɛ u ŋga ki yi mbe u li, mbe mu dwan mbe chiin ku.”

11 La, Jacob na yo u lo pan mbo, “Mu chin na Esau rɛ, yooro wa u na, a mi n yɛ ni. 12 Aada ndoo we ni tali mbe le, mbe chin na fana ni u fana. A na ki pan ma, we ni su, wa ni dwan.”

13 A u lo na kna mbo, “Ni pɔ, ti mbe suŋgɔ ŋga kie pan mu na kro kna mbe tuu ni na, sɛ sikaala pre yii mu pan mu ni ŋga.” 14 Ki tia wra sɛ sikaala pre yii mna pan mu u lo ŋga, a wra sro taan ŋga u lɛ chaa kre pe u pan. 15 A Rebekah na Esau dodonyi chichiele titi nyjɛ yiraa wa u pan yire bali mna Jacob le. 16 A wra sugbɔ hlɛ tɛɛ mna u kɛnyi haa na u yulɔ haa mna yooro n wa kre tɔ tɔ. 17 A wra sro taan kre, na paanu ŋga wra fɔ kre bali mu le u pɔ Jacob kɛɛ.

18 A Jacob na sɛ u lɛ pan mna sɛ yo mbo, “Ndoo.” A u lɛ na shɔ mbo, “Ni pɔ. A ni biile pre ŋmbi haa wi ŋu hin?”

19 A Jacob na yo mbo, “Mi wi mu pɔ lopom Esau. Imi mu yo ni pe kre, ni ki pe. Jande, gbeŋmba mu yiri mu tni mu nyaa kaara yire yɛ ka, mu ni dwan.”

20 Isaac na kna mbo, “Ni pɔ, mni mu pe mu ki ta nyaanyaa ma hin?” A Jacob na kna mbo, “O Tafun, mu Nyiɛkpɔɔ wre u ya ni na.” 21 Isaac na yo Jacob pan mbo, “Flo mu da ni na mbe ni kɛ taa mu na mbe le, na Esau titi wi ŋu rɛ.” 22 Jacob na flo mna da u lɛ na, a wra u tali mna yo mbo, “Mu mana Jacob wru, la, mu kɛnyi pe na Esau wee yi.” 23 U nsra chin na Jacob wi. Ŋgi na hin? Na yooro wa u kɛnyi na na Esau wi. A ki tia wraa chaa mbe u dwan, 24 la, wra ndru mu u wie mbo, “Kena ni pɔ Esau wi ŋu yɛŋgɛɛ?” A wra yo mbo, “Ɛnhɛɛn, mi wi Esau.”

25 A Isaac na yo mbo, “Pan na kaara yire ni mu ni ŋga, mbe ni ka mbe mu dwan.” A Jacob na sɛ yi bali mu pan, mna simi ya yi na na, a wra ka mna gbɔ. 26 A u lɛ na yo u pan mbo, “Ni pɔ, flo mu mbra ni na, mu ni gbenyi shiun.”

27 A Jacob na flo mu da u lɛ na, mna u gbenyi shiun. Ŋga Isaac na u dodoŋgi ŋga kraa wa u na ndiom loo kre, u jawala na u pe na Esau wi yɛŋgɛ. A wra u dwan mna yo mbo,

29 Nyiɛkpɔɔ u ti mbe waŋgrɛ yɛ leele mu sumi, mbe kosie kan mu yiɛ.

30 Ŋga Isaac na Jacob dwan mu kɔ, a wra yili u lɛ yiɛ na shie to, a Esau na yiri nyaa mu le. 31 Ŋga Esau na le kre, a wra sro taan ka pe, mna sɛ u lɛ ŋga, mna yo u pan mbo, “Ndoo, yiri mu ni nyaa kaara kre ka ka mu ni dwan.”

32 A u lɛ Isaac na u wie mbo, “Ŋu wi ŋmbi hin?” A wra kna mbo, “Ndoo, mi wi mu pɔ! Mi wi Esau mu pɔ lopom.”

33 Ŋga Isaac na kee kre loo ma kre to, a wraa seeri poŋgo, mna yo mbo, “A kena ndro ŋmbi u pan mu ni ŋga nyaa kaara fuŋgaami, a ni ka mu kɔ mu u dwan ŋga hin? A imi ni dwan mu u ŋga kre, pan kie pe.”

34 Ŋga Esau na kee kre loo ma kre, a wra gble fɔɔri mu le, mna yo mbo, “Ndoo, ni dwan ka na ɛ!”

35 La, Isaac na yo mbo, “Mu chunu pan mna, mu ni fana mu mu dwamu shɔ.”

36 A Esau na yo mbo, “Shiin wo u ni dnumu kre. U mɛɛ yi Jacob yɛŋgɛ. Wra ni fana mna ni semu lopom shɔ, a fuŋgaami u ndru mu pan mu ni dwamu shɔ na.” A Esau na kna mna u lɛ wie mbo, “Ndoo kena dwamu kre ka n kro mi pan ra?”

37 A Isaac na yo Esau pan mbo, “Ni Jacob pe mu tafun, a ni tia u leele kro pe u sumifɛɛnlɛ. A ni u dwan na we shɔlɔ, na tre sɛnyi simi ŋga ki n sheli ta nɛɛrɛ, kena ni pɔ, yira ŋgi mbe jaa pe mbe mu ŋga na hin?”

38 A Esau na u lɛ wie mbo, “Ndoo, kena dwamu nunu chom mu jaa ŋgaa? Jande ni dwan ka na ɛ!” Ŋga wra yo ma to, mna gble fɔɔri mu le na nyɛni.

39 Ŋga wraa nyɛni ma kre, a u lɛ Isaac na yo u pan mbo,

41 Esau na Jacob le nyibie, ŋga u lɛ na Jacob dwan mu u ti kre ndra na. Ki tia wra jawa mbo, “Ni lɛ kumu pe nyjila dani mna, a kre nyjila kre nu mbe Jacob gbo.”

42 La, ŋga Rebekah na kala ŋga Esau chaa mbe pe kre loo kre, a wra kla Jacob pan mbo, “Mu nyjɔ Esau jawala ŋga u le yi na we mu gbo. 43 Ki tia ni pɔ, kee ŋga mbe yo ŋga, ki pe ma. Yili mna fuŋgaami mu sɛ ni lɛm Laban pan Haran na. 44 Sɛ tni wa nyjila chiɛri mbe sɛ su na mu nyjɔ krɔ we nyjii. 45 Kena na mu nyjɔ gbun waa nyjii, a u kee ŋga mu pe kre fɛɛ, mbe kla mu pan mbe mu yiri wa mbe pan mna. Ni n chin ŋga kie ti mbe ni biile shiin yili ni kɛɛ ble nunu na.”

46 Rebekah na yo Isaac pan mbo, “Fuŋga rɛ, ni fna, Hittite chiɛlɛ mblɛ pee wa mna ŋga kee na. A na Jacob waa Hittite bichabɛɛlɛ mblɛ wa leŋge, kena na ni ku prɔ.”