Isaac Na Sɛ Tni Gerar Na
26
Kre nyjila kre nu klo ka na to pe tra kre nu, klo ŋga kra to Abraham nyjila kre kɔkro ŋga na to, a Isaac na sɛ Philistine ŋunu Abimelech pan Gerar na. 2 Bawa o Tafun Nyiɛkpɔɔ na uyɛ wɔ mna Isaac nyina mna yo mbo, “Maa shia sɛ Egypt tra nu, tni tra ŋga na ni yo mu pan mbe tni ŋga nu. 3 Tni tra ŋga nu mna nyjila chiɛri. Mbe ya mu na mbe mu dwan. Ŋgi na hin? Ŋu na mu nanae mbe ŋga kre tra ŋga kro. A mbe li ni daŋga ŋga ndaa da mu mu lɛ Abraham ŋga kre na. 4 Mbe ti mu nanae nɛɛ na wɔɛlɛɛ nyjɛ yii wa nyiɛ yiɛ na ŋga yi, a mbe pe ŋga tra ŋga kro. A pre na waŋgrɛ kro we yire mbe dwamu ta. 5 Mbe mu dwan. Ŋgi na hin? Abraham na li ni nyu kee, na ni mbra kro na.”6 Ki tia Isaac na tni Gerar na. 7 Ŋga bawa leele na u chɔ kala wie kre, a Isaac na yo pe pan na u jaa wi. U n naa chaa mbe yo na u chɔ wi. Ŋgi na hin? Wraa fiɛ na aada na u yo ma, pie u gbo mbe Rebekah wru, ŋga Rebekah na nyu titi kre na. 8 Ŋga Isaac na tni wa mna mu kre, ki ble ka Philistine ŋunu Abimelech na yire tokro nu mna Isaac nya na u Rebekah faanri. 9 Abimelech na tia pra Isaac yeeri a wra u wie mbo, “Na mu chin na mu chɔ wi, yira ŋgi ki tia mu yo ni pan na mu jaa wi hin?” A wra kna mbo, “Ni jawa na na ni yo ni chɔ wi, ee ni gbo mbe u wru.”
10 A Abimelech na yo mbo, “Yira ŋgi kala mu pe o na ŋga hin? Ni leele mblɛ wa we na jaa sni na mu chɔ ŋmba ni, a mu na o ŋga mapini.” 11 Abimelech na leele pre kro jaari mbo, “Ndro ŋmba waa blɔ ŋmba, ndee u chɔ pe sisaa oo u gbo.”
12 Isaac na yirɛ luu tra kre nu, a yira nyu, a wra yi kun ma gbee lafaa. Ŋgi na hin? O Tafun Nyiɛkpɔɔ na u dwan. 13 Isaac na swa ta, a uyɛ taara na sɛ yiɛ, mna sɛ su na wra kɔ mna uyɛ ta titi. 14 Wra mbaala, na sikaala, na nui, na sumifɛɛnlɛ tataara ta, a kra tia Philistine leele pre na u le nyibie. 15 Ki tia pra kɔlɔe nyjɛ u lɛ Abraham sumifɛɛnlɛ na tuu nyjila ŋga wraa ŋmaa ni yire yurɔ tra ni peii.
16 A Abimelech na yo Isaac pan mbo, “Mu jaŋga ta mu wɛ o na, kena yili o tra nu.” 17 Ki tia Isaac na yiri wa mna sɛ tra cha lafolo ka mbɛɛ na Gerar lawee yire nu mna tni wa. 18 Isaac na ndru mna kɔlɔe nyjɛ u lɛ Abraham na tuulo, a Philistine leele na yi yurɔ tra ni, u kumu kɔkro kre tuulo na, mna yi ŋga mɛɛ nyjɛ u lɛ na yi ŋga kre chɔɔ.
19 Isaac sumifɛɛnlɛ pre na kɔlɔ ka tuu lafolo kre mbɛɛ na mna vru nyumu na, a kraa blo na yilii fimi na. 20 La, Gerar mbaala lefɛɛnlɛ na pan mna tun na Isaac mbaala lefɛɛnlɛ pre ni mna yo mbo, “O wo yi kɔlɔ ŋga.” Ki tia Isaac na kɔlɔ kre ŋga mɛɛ “Esek.” Ki nɔɔ yi kakrɔ. Ŋgi na hin? Pra tun kɔlɔ kre na.
21 A Isaac sumifɛɛnlɛ pre na ndru mna kɔlɔ ka tuu na. A pra ndru mna tun kre na na. Ki tia wra ki mɛɛ tɛɛ Sitnah.a 22 Isaac na kɔ kre lawee kre nu, mna sɛ yiɛ chiɛri mna sɛ kɔlɔ kre ka tuu wa. Wre na ndro nsra tun kre na, ki tia wra ki mɛɛ tɛɛ, Rehoboth, ki nɔɔ yi yɛtaara. Wra yo mbo, “Fuŋga o Tafun Nyiɛkpɔɔ tia o lawee ta mbe tni, mbe nyu.”
23 Isaac na yiri wa mna sɛ Beersheba na. 24 Ki ble ŋga wra le wa kre blee, o Tafun Nyiɛkpɔɔ na uyɛ wɔ mna u nyina mna yo mbo, “Mi wi mu lɛ Abraham Nyiɛkpɔɔ wre. Maa shia fiɛ, nii wa mu kro. Mbe mu dwan, mbe ti mu nɔɔ leele nɛɛ, ni sumifun Abraham ndra na.” 25 Isaac na sragbunu sin wa mnaa o Tafun Nyiɛkpɔɔ mɛɛ cheche kre yeeri na u sumi. Bawa wra u yoŋgo nyuŋgo kan mna tni, a u sumifɛɛnlɛ pre na kɔlɔ ka tuu wa na.
Abimelech Na Isaac Na Nyu Nunu Pe
26 Ŋga Isaac naa wa mu tni Beersheba na wa kre, Abimelech na Ahuzzath, u paaranyinafun wre, na Phicol, u sojae lopom wre na yiri Gerar na mna sɛ Isaac pan mbe wre na pre sɛ paara. 27 A Isaac na pe wie mbo, “Ŋgi ki tia e pan ni pan mna hin? Yire titi chin na e n na ni chaa mbe nya nyini ni, a e yila ki na mu ni ni e waŋgra nu.”
28 A pra kna mbo, “Fuŋga o chin na Nyiɛkpɔɔ wa mu kro, a o jawa mu nya na ki fna mbe o paan mu nya mbe o yira ka, 29 mbe ma o pe sisaa, imi na o nsra kɛ taa mu na, mna mu pe sisaa ka, la, mna tia mna yili na bonyaa ni kre, ti mbe o tni ma. A le, imi na o Tafun Nyiɛkpɔɔ mu dwan fuŋga.” 30 Ki tia Isaac na sukpɔɔ ka pe pe pan, a pra li mna gbɔ. 31 Ŋga nyiŋge na se bnimi pupu kre, a wre na pre na fni, mna da mu yira ka mu le peyɛ lalaa. A Isaac na pe wa kolo, a pra ndru mna sɛ pe lawee bonyaa ni.
32 Ki ble kre lam Isaac sumifɛɛnlɛ pre na pan mu kɔlɔ ŋga pe tuu kre kee yo u pan mbo, “O yili nyumu na.” 33 Ki tia Isaac na kɔlɔ kre mɛɛ tɛɛ, Shibah, a mu pan mu su aŋga na, kakpɔɔ ŋga kii wa wa kre mɛɛ Beersheba.b
34 Ŋga Esau na li yɛlɛ fuloe shiin kre, wra bichabɛɛlɛ shiin plɛ leŋge. Nunu mɛɛ na yi Judith, a u lɛ mɛɛ na yi Beeri, a wra pe Hittite ndro. Nunu wre mɛɛ na yi Basemath, a wre lɛ mɛɛ na yi Elon. Hittite ndro na wi wre na. 35 Chiɛlɛ shiin pre kepele nsra tia Isaac, na Rebekah na wejinyiŋge ta pe tnimu nu kuraa.